BAIBEL NI LAIBUMA BIJAB

                                   BAIBEL NI LAIBUMA BIJAB

                      (Baibel no sinirwma ni, Joshua ni simi Ester)

                                                          Part - 3

                                       Rev. Bipin Debbarma

                                        Bethany Christian Ministry

                                        Khumulwng – 2019

                                                                             Bwkhak 7

                                                     Joshua Jisu no hwn kha, chini mwthang nai sengkwrak.

Bugra Kaitor norokno rwna hwn mani, hano segwi naidi (Joshua 1:11). Omo Kaitor se rwnai! Abo no chwng segwi naina nang nai. Smai Kwcham khakjak mani a khaknwi no chwng cheng lai tongo.Omo wng kha Laibuma bijab.Tai kuno bijab aswk khatungrwi man nai kwrwi, sikwrwng khlai man nai kwrwi.omo wng kha kros ni sengkrak bijab Joshua bijab.Omo phola ni kubui kokno sao, phwrwngo.

Joshua bijab wng kha mechenwi seknai kwplai bijab. Canaan ni hukumu mukhumu o choba khalai nairok.O bijab wng kha Jihudi dopha a hao thangwi kami kha lai mani kok no twi swijago.Kaitor, Abraham bai smai tang mano khlai phunuk mani bijab.Omo bu smai tang mani kok? Yaphang 12:1-3).

O bijab ni mung bo Joshua ni mungwi no pharjak kha, Je borok  choba ni sengkrak kotor phan gwnang.Joshua ni mung swkango wng kha  HOSHEA, omo hwn ma khe mwthang nai eba Joshua,Kaitor ni mwthangma. Joshua hwnma khe Jehovah ni seleng hwn mani, Kaitor bai chongwi rohorjak naisa, bini khuk twi Jehovah  dagi rohoro.Bini iak twi no Kaitor bini samung khlai baio- Kaitor ni montri bokhorok.

Joto no nwng sai mano, Kaitor bini bwkhano chongwi phano nai mano,nono sengkrak bokhorok khlai chongna ni.Kros ni sengkrak bokhorok khlai,tai bini kros bodol rok ni logi. Nwng tiar da wng kha?

O bijab wng kha je thaio Uainwi saphaima bijab  thangwi bathagwi kha, aro ni simi se Joshua bijab chengo.Omo wng kha chongjak dophaJihudi rokni  laibumano manjuwi swijak mani.

Chongjak dopha seleng khati tong phuru Moses bai phiogwi tubujak  kha. Smaihao khe Joshua bai twidulwi tlangjak kha. O bijabo Jihudi dopha arirok no simi mechen mani kwlai ia,tamo khe Kaitor rwna hwnwi kok rwmani hano segwi nakha.

MOSES – NASINGTONG MANI

Moses twijwlang kwchak barwi phai kha.

Moses Jihudi dopha khajak tong mani phiogwi tubukha.

Moses poito khlai rwkha.

Moses bohrok ni manthai no sakha.

Uainwi saphima bijabo chwng nasinglai tongo.

Moses samung cheng mano, Joshua khlai pairwkha! Kaitor samung cheng mano Bo phai rwiaui bathak ia. Uansugwi naidi uakwrwng borok uana swkang bini iak ni dano , dongdario hulwi nagrao.A da bai kaham milik khe  uaruk chirwi man na twi khe.Suamungjak na bagwi  kwbang ma borokrok nasingwi tongo. Nwng Jehovah Kaitor no borom khlai  tong manokaham khe borom rwi mano.Nwng khlai na hwnwi samung iago namano.Tai bwkha Chongwi nadi ,nwng Kaitor no bwkha berasugwi rwnai. Je dopha Moses bai tubujagwi phai mani,tabuk Joshua abo twichurwi twina na cheng kha.Moses thwi kha,tamo khe bohrok thang lai mani bathakjak lai lia! Kaitor tabuk  Joshua bai kok sana cheng kha.Chwng bini khorang khwna na muchungwi tong khe ,Bo chwng bai kok sanai.

Apostle Pol thwi kha ,bo pirlang mani kros ni kothoma tabuk bo pirjagwi tong kho. Borok komorwi mano,tamo khe kubui Ojama, nukjakiaui  samung khlai tongo, a samung mwthakjagwi man ia.

“Moses thwi kha,” Hai khe bohrok thanglai mani bathakna nang mani bla,Ojama  kwrwi khe a rwkthar nairok karjak na kok tong mani. Bohrok mwkhang somlaijak. Joshua tabuk samung kotor ma khlai sinai.Bo Jihudi dophano swkang agog rwi ma tlang nai, bohrok kha bailai tong mani jora.

JOSHUA – KHAHABJAK MANI

Joshua Jordan twima bar kha.

Joshua Jihudirok no hamari manrwkha.

Joshua bohrok ni langmao poito charw kha.

Joshua bohrok no ha manrwkha.

Chwng nukha Joshua bijab khahabjak mani.

Bwkha kotor rok chen kha hwn khe,bwkha khamwi khar nai. A bwkha bigra Jihudi dopha uklok usluwi  haching panthoro kharna nailai mani. Sak ni mangkhor khurwi phobjak na nai mani bohrok ni buma bupha ni bekereng  phobjak mani thaio.Bohrok a hano segwi manwi lia tamo ni hwn ba, bohrok ni deul kwrak khe bera rwjak  borok rok bo phan gwnang gwja.Tai bohrok ni auli wng kha chokdeual belai kwrak kuchuk. Bohrok no mechen nani belai tugo.

Sabo omo hai kok sa ? Kaitor saia! Borok kwbangma thwi mano, Borok khoroksa phano kwrwi Kaitor no nangjak ia.Borok kotor tonglang nai hwn khe selengbini samung no bo pai mankhe,Kaitor ni tai lama twngsa tongo, bono rwkthar rwnani.

Omo no swngcharo chini samung ,khristan  suamung nani.   A samung kotoro chwng bo aro ni borok .Nwng aro kwthajak da kwlai,a mungsa samung no khlai lai pai thani. Goireng twi ranwi thang kha twima o twi iorlia.

Jerhovah Kaitor Joshua no nokha bisi kolok romwi bono snamwi ton kha.Bo Egypto seleng khati tong mani jora achai nai borok, tamo khe Kaitor bono aro ni phiyogwi tubu kha.Tai Moses ni iakchu khe snamgwi tonkha.Bo wng kha kirima kwrwi sengkrak.Bo holong khitarwi bwtharjak na tong mani, tamo ni bagwi hwn ba bo Jihudi dophano samani tongo, “agog di Canaan hano segwi nani.”Nokha bisi bwrwichi swkango (Uainwi 14:6-19)

Khwna borok kotor,  kerongphang, rangwnang bephar thwngnai, thwi khe.Aro chwla sikla khoroksa  a samung ni bagwi tiar khlaijak borok ni sakha  samung bokjak nai.Jora man khe sesamung khlai man baio.

Joshua bijab no khuktangwi swrwng tong khe omo muitu khlai di. Jehova rwnai  – Borok khe iachak nai. O bijab khe o kokno sao , Arirok no mechenai kwplai wng mani kok, ha segwi namani.Jehovah Kaitor dagio: “Bebak no nabai di.”

1. Smai hano mechenwi sekdi. Berem 1-12 jora

2. Smaihano baithang ni khlai nadi. Berem13-24 jora

SENGKWRAK ROK NO SAMUNG O PHWNNG MANI

Baibel phil di tai naidi, Joshua 1, 2 no khuktang di.Chwng aro nuknai tabuk Jihudi dopha Canaan ha ari gana bathaklaijak, Jordan twma rukungo.( Joshua 1:4 berem ni kok twi omo Smaiha ni ari Salsi bwkha hwn khe haching panthor,Salgra bwkhak hwn khe Lebanon hathai,Salka bwkhak hwn khe Euphrates twima kotor,salthang bwkhak hwn khe Mediterranean.)

Tabuk Jihudi dopha ni okara wng kha Joshua! Moses thwi thang kha. Joshua khorok bomwi iachak kha,bwkha khamjak bini okra kokbiti kholnai kwrwi kha, logi song thang kha. Tabuk Jehovah bono hai hwnwi sakha: Nini langma tongsak khoroksa phano nono kebengwi bachai man glak.Ang Moses bai tongma hai no,nini logi bo tong nai,Ang nono khibi glak,iabo iaka glak. Ang nono dagia da? Phan rakdi, kiria wng di,sikiri sokoro ta khlaijak di; bwkhabo ta thwi di, tamo ni hwn ba Bugra nini Jehovah Kaitor nwng tongmao, nwng bai baksa tong nai (Joshua 1:5,9).Chwng Kaitor samano bo khwna kha : Ani seleng Moses thwi kha, hake tabuk bachaui nwng tei o borokrok bai Jordan aiang naro Isreal no rwna ni hwn mani a hao thang di (Joshua 1:2).

Jihudi dopha Canaan hao habwi ia sini swkang no Moses thwi kha. Moses bo sak Canaan hao habwi manwi lia,abo ni bagwi khoroksa no phano a hao hab mani kok no sai malang lia.O dopha nasing lai tong kha smai hao habwi nani, Moses thwi iasak.Khristanrok ni bagwi kerong wng kha Moses hai wng kha.Joshua khe Khrosto no kosol.Khristo simi se chwng no,chini ha manthaio tlang man nai. Pol sakha, Omo norok samung khlai ma bai  wngia ba ,oro kok kotor sana ni kusubo kwrwi(Epis 2:9).Joto khristan no bwkha berasugwi rwthai bohrok ni Joshua no.Tai bini kok khwnai tong thai!  Khristo chwng no twidulwi tlang nai bo bini bwthwi  kwthar bai. Moses bai Joshua khoroknwi no wng kha Khristo ni mari, Khristo khlai bai mani samung.

Chwng oro nugo, a dopha bodol Canaan hao habwi lai nai tiar wng mani, khatung lai tong mani nuk kha.Nokha bisi kolokma logwi smai tanglangjak, Kaitor bai  ha rwna hwnjak mani. Nwng o mangpilirok no naharwi nai di bwtang bwtang khe basai nok tangjak, aro tong lai nasik tong lai mano, buphuru jani Joshua ba bohrok no dagilang no , “thangdi “hwnwi. Joshua borok rohorw saklai rwbai kha saltham ni bisingo Jordan twima basuwi mathang lai bai nai. Thang lai nani tiar wnglai bai sidi (Joshua 1:10-11).

Tabuk Jehovah Kaitor Joshua no ringwi sakha,Jihudi dophano tlangwi smaihao habwi bai sidi.Chwng kok khwna horna nango, chwng surisan mano khwna horjak nani,samungo chubajak na bagwi. Ang nono khibo khibi glak, tai iabo iaka glak (Joshua 1:5).

A koktharok chini bagwi belai nang mani kok.

ORO JEHOVAH KAITOR BELAI NANG MANI KOK SALANG KHA

1.Yapri sei kadi.

     Ang Moses no smai rwma twi no nono bo rwo,nini bebak iapri kamani  hano , ang nono                    rwnai  (Joshua 1:3)

2. Bebak nabai di.

      Haching panthor tai Lebanon ni simi twima kotor jora,Euphaties  twima tai

      Bebak Hitties ni hani khe salthang bai phasing twijwlang jora nini ha wng nai.

      (Joshua 1:4)

3. Thang sidi.

      Ani seleng Moses thwi kha,hake tabuk bachaui nwng tai a borokrok bai   

      Jordan  aiang naro  Isrealrok no rwna ni hwn mani a hao thang di.

        (Joshua 1:2)

4. Seng khosai nadi.

    O kerong bijab nini bukhuk ni kwmaui tathang thun, a bisingo swijak

    tongma rokno  kaham khe samung khlai man nani bagwi horsal uansuk di,hai

     khe se Nini samung chanai tai chasanai. (Joshua 1:8)

5. Thang di langma mansuk nai.

     Norokni chamung tiar khlai bai sidi, salthamo norok o Jordan basui Bugra

      Kaitor norokno rwna hwn mani hano manwi nai.(Joshua 1:11)

Kerong bijab se Joshua ni Baibel. Chini Baibel khe tai bo kwbang khe paijak. Abo ni bagwi chwng taibo sai mano Bugra Kaitor ni muchungma no.Tamo ni hwn ba Khristo chwng no a kokrokno kok swbai salang kha. Chwng o kokthairok no twiwi diai mada tong ? A kokthairok ni iaksi iagra bwkha sak no swkak mada tong ? Kaitor Joshua no tamo kok sakha khuktang di, (Joshua 1:7).

Joshua tangphang okra rok no ring bai kha tai  swrai swrai khe saui khwna rwbai kha.Bo tamo sakha khwna bai di, Nwng chwng no bebak dagima twi no chwng abo khlai nai; tai nwng chwng no rohor thanio no chwng thang nai,(Joshua 1:16).Bohrok jesa samung berjak phano khlai lai nani tiar tong baio.

Chwng oro nugo Joshua tai bini borokrok  thang laina bagwi tiar wnglai mani. Muitu khlai naidi,nokha bisi  bwrwichi swkang Joshua Canaan  hao naichom na bagwi rohorjak mani, a  borok khorokchinwi rok bai.Tabuk bo tai dolsarok no bo rohor kha Canaan hano naichom phina ni. A kothoma no khuktang di Rahab bai  naichom nairok ni kothoma no.(Joshua 2).

   Joshua bohrok no naichona rohro mani hwn khe, A Jiricho ni borokrok bwswk phan gwnang tai bohrok ni a chokdeual bwswk kwrak akonrok no nai nani.Tama bai choprobwi nani.Naichomna thang nairok bui bai saimanjak kha bohrok  aro ni borokrok ni ari,tamo khe  bohrok iogwi phai kha Rahab ni chubachu bai.Wng ya khe bohrok bwtharjagwi pai khamun. Bo bohrok no nok saka son rungjak  burungo hui tong bai kha.A naichona thang nai rok sai man bai kha a auli ni joto borok rokno hus wng thang baijak Jihudi ari habphai kha, a kokno bohrok Rahab ni thani khwna kha. Bohrok Rahab no kok rwlai kha bohrok  hasekna phai phuru, Rahab bai bini nok ni borokrok no bwthar glak. Rahab bohrok no a chokdeual twi tiklai rohor bai kha, bini nok wng kha a chokdual sederwi nangjak nok. Bohrok Joshua ni thani kiphilwi phai lai kha tai sapai bai kha aro wng mani kok akonrok no.A kothoma kaham rok no.Bohrok Joshuano hai hwnwi sakha, kubino Bugra bebak hano chini iago iaphar kha tai bebak hano chini iago iaphar kha tai bebak aro ni borok rok chwng no kirijak bai kha, (Joshua 2:24).

Rahab, bo bini nok ni tailamo khe a dwgwi kwchwng no swngwi tonkha, a auli swbaijak phai phuru bohrok ni nok no katirwna bagwi. A gap kwchak  hwn makhe thwi ni kok no samani kwlaio,(Hibru 9:19-22). A bwrwi tailamo ri kwchak khauiton kha (2:21),” Bebak borok no mwthangjak nai hwnwi mari rwi ton kha,Kaitor ni kokni duartailamo.”Baksa borokrok sao, Rahab mwthangjak mani le bo borok kaham chuba nai wng mani bwgwi wngia,tamo khe a gap kwchak thwi ni bagwi se.A bwrwima ni bumung no chwng mano Jisu Khristo ni mungrem swijak tong mao,(Mathai 1:5).

Canaan hani borokrok wng kha ,Canaan ha ni bwsla, Noah ni busuk.Bohrok belai borok hamia peret dopha, tai mwtai tagwi khulum nai dopha. Kaitor bohrok no hus khlai kha, Sodom bai Gomarah no hor bai sok phuru,bohrok ni bwkha kisa phano kiphil lia gwja. Tabuk Kaitor bohrok ni a phan no swkwmai khibi sinai.Tai bohrok ni hano Jihudi dophano iapharwi rwsinai.

BWSKANG AGOGWI THANG MANI (Joshua 3-5)

Khuktang di 3-5 no. a naichomna thang nairok saphai marok no khwnai borok rok khatungjak bai kha. Jihudi dopha bohrok bachai tangwi tonglai mani aro ni kutulwi Shittim o thanglai kha,Jordan ni sini maildok wng anw.Aro ni simi a twidar gwng twima bisi chalthaia maile kaisa swk wnganw. Aro ni habanokphang rok kerong swndwk no tlangwi camp ni  twio ongkhorlai kha,tai borokrok no sakha bohrok, uklogo rwktharwi phai bai thung, bohrok kisa hachalo khe ma tong bai nai , bohrok a kerong swndwk bai khe muksainwi hachal khe ma tong bai nai.

Nwng a lamano siglak,tamo ni hwn ba norok swkango a lama twi uaisa phano himia kho. (Joshua 3:4).A Okra kotor, Joshua bini borokrok no sai khwnarw bai kha, borokrok jotono sak no kwthar khe tong bai wng thung , Khwna Jehovah Kaitor chini thani uanamasingcha samung khlai phai nai. (naidi Joshua 3:5).

Haching panthoro Jihudi bwsarok a chumui no rwktharwi himlai kha. Tabuk khe bohrok a kerong swndwk no rwktharwi ma tong nai, abo wng kha Jehovah Kaitor bohrokni logi tong mani mari.

Haching panthoro  lama kolok himalai mani jora paikha.Sinia nukia hao thangwi tongwi na jora sok phai kha.Bahai jani wnglang no borok ni langma sai man lai lia.Bohrok belai khe no uanajak.Omo wng kha kwtal thaio beraina thangwi manjak mani jora hai.Langmao kwtal kwtal tomung tai wngiarok wngphai mani hai chini langmao.Aro tai omo hai  Khristian langmao wng phlai glak.

Egypt ni lamrw mani ulo twima kotor ma basulai kha, twijwlang kwchak. Lamrwlai mani paithago bohrok tai twima twngsa basulai phinai, abo wng kha Jordan twima. A twima twngnwi no basulai mani omo belai khe muitu khlaijak nai, twi basulai mani, Jihudi dopha ni laibumao. A aswk twima kotor twijwlang kwchak no  basulai mani, abo wng kha basumung kotor,tabuk paithago phaiwi  twi basulai thani a jora ni borok khoroknwi se tong sio, bohrok wng kha Joshua bai Caleb.Tamo wng bai kha a jorani borokrok?

O jora Jordan twima  twi tor mani jora.Jericho ni borokrok uansuk bai kha, aswk twi kotor no barwi bohrok phai manglak. Tai bohrok Jihudi dophano thangwi kasui manwi anw.Jordan twima no barna bagwi Jaijor bo kwrwi tai iakhwrai bo kwrwi. Tabuk ni a jora Jordano twino barnani belai khe tugo. A ha naichomna thang nairok twi iogwi se barwi thang kha tai twi iogwi no barwi phai phi kha.Tamo khe tabuk aswk borok kwbangma, bwrwi chwrai tai manwi khwnwi twiwi bahai khe twima bar nai?

Jehovah ni lama twngsa tongo a twima no bar nani.Bo bohrok nophwrwngwi  dagi kha, tamo khe twima no bar nai.Martin Luther sama tongo,”Ang lama sia, Bo(Khristo) bahai khe ano twidul nai,tamo khe ang kaham sinio ano twidulnai no.”

Muitu khlai di, Khristo tamo sakha, iak hoichak borok no, bo sak abo khlai man ia tong mani -  Bono iak surdi hwnwi sakha. Borok khlai mania tong mano khlai na nai kha,khlai man lia, abo no Khristo khlai phunuk kha.A iak man iano iak surna nang mani, abo no iak sur rwkha.Jordan twima barlai na nang mani, a twino bar rwkha. Joshua, ochairok no a kerong swndwk no twi di,Jordan twimao ongkhor di,Jordan twi ma iang par bai aiang par twi kuplung pupakjak. Je phuru bohrok ni iapri  Jordan twimao kakha,Aro hakung wngwi thang kha, himna cheng kha.Tai joto borok no a twikwran hakung barlai thang bai kha.(Joshua 3: 9-17).Borokrok omo khlai mania,tamo khe Kaitor ni thani mungsa khlai mania hwn mani kwrwi.Khlai man ia samung no Kaitor khlaio.Kaitor dagi mano Bo khlai mano.

Borok khoroksa hai hwnwi sakha, “Kaitor anodagi khe holong thai saka twi barlang di,hake omo ani samung wng nai barwi thang nani.A holongthai no norwi rohor nani abo Kaitor ni samung wng nai.”

Kerong swndwk omo tamo ?  Kaitor tong mani mari.Khristo kubui no chwng bai tongo.O mol pai iasak ang norok bai mang tongo. (Mathai 28:20).

Bo chini bwsakngo himo tai hai hwnwi sao, Ani logi phai diBo Phola Kwthar no chini thani hor nai chwng no saphai na bagwi,Omo se kubui lama, o lama twi no him di. A kwthang kerong swndwk tabuk phano chwng no lama tolwi twi kho.Bo chini langma ni kotor chikon joto samungo no tolwi twi nai.Borok kaham iaphri sema le Bugra Kaitor  dagi ma bai se. (Lobmung 37:23

Baibel chwng no twima basulai mani kok no sao,twi rukung ni simi, a ochairok iaphri kwrak khe iapri sekha,aro ni holngthai rok norjak bai kha  aiang narni twi rukungo, Kaitor pai phlai ia uanmamasingsa samung bohrok ni bagwi khlai kha (Joshua 4:3). Aro bachalai surisan laimani kok swijak kwrwi.Tamo khe holong mukumu kaijak kha.A uanamasingcha khe borok no phiogwi tubu mano muitu khlai bohrok ni poito raksuk kha.

JERICHO SWBAIJAK KHA

Jericho, Jordan twima bai bisi chalthaia gana se minit nwichi him khe no sogwio.Bohrok Gilgal thangwi basai tangwi tongwi lai kha.Tabuk ni Jericho eba Ericha a kami ni mung,abo tabuk mail kaisa swk chalo a swbaijak kwbai Jericho bai. Abo no Ahab raja chaphuru tangjak phio kha..

A Jericho ni chokdeual swbai khrubwi ma khibi nai hai khe se Jihudi dopha a aulio habwi na man nai, mechenwi  smaihano segwi manwi nai. Jericho wng kha Canaan hani salsi bai bwkhak kwlaio.Bahai khe omo no swbai man nai? Jihudi dophano Kaitor dagima ni omo mwlang chajak nai kok. Tamo  khe  Kaitor phwrwngma hai khe no bohrok khlai lai kha,tai a samung no cheng lai kha. Bohrok ni bwkha belai khe kwrak, tamo ni hwn ba bohrok sai mano  bohorkni Ojma tamo khlai na nang ia  sai mano. Bohrok dati no a aulio hablai nai.Bohrok samung khlai na bagwi poja rwjak mani khlai baiwi.Khuktang di Joshua 6.

A chokdeual beremnwi, holong thai bai khe tisajak,phdok rwja khe tisajak.kotor kuar khe tisaja khotol khotol khe.Bising ni chokdeual bai phatar ni chokdeual chalai mani wng kha nwichi feet bai bachi feet chalaio.Abo rwja mani hwn khe nwichi feet rwjao. Sengkrakrok mwrwk mani chokdeual khe ha sogwi takjak it bai tisajak.A chokdeual chuk mani wng kha thamchi feet kuchuk.

Bohrok abo no dokhol nama khe, salbrum ochairok kerong swndwd no balawi a Jericho no kiting lai himbotok himlaio bwrwi chwrai joto borok no, aphuru bohrok mui bokorong subwi kiting laio.Jericho ni borokrok a bohrok ni tomung no nugwi hwnlai khwna omo mungsa wngna ia hwnwi.Abo hai no baksa Jihudrok bo hai no uansukti khwna.Tamo khe Kaitor sai mano, Bo tamo khlai na thang tong.

Baksa borok hai hwnwi sao,omo Kaitor ni uanmasingcha samung wngia, abo scientific se. Kaitor saimano khorang kotor bai jangrwi chokdeual swbai mano.Abo totoro khorang  tai borokrok chirik ma khorang bai swbaijak kha. Jihudi dopha  abo no swbai kha .

Omo bahai khe  wngkha wngia abo kok  kotor wngia, tamo khe uanamasingcha khe  chokdeual swbaijak kha.Jehovah Kaitor a chokdeual no swbaikrubwi khibi kha,scientific no samungo phwnang iawi.Abo ni bising Bugra Kaitor ni se chwngsacha wngo , Joshua ni wng ia. Jephuru borork Jehovah ni kok khwna kha Joshua ni kok twi. Bohrok  Jehovah Kaitor ni phan kotor nuk kha.

Jericho chokdeual baia sini swkang abo Joshua ni mera bokorong supmani bai nobar kotor sibchajak kha,a uanamasingcha wngmano a sikwrwng rok borom khlai lia.Jihudi dopha ni borok rok sai mano bohrok Jehovah ni muchung twi khlailai tongo, hwnwi poito khlai tong laio. A totoro kongsni,salsni himbotok himlai kha Jericho kitingwi, uaisni salsni himbotok himlai kha.Kaitor nukjak ia phan bodol no a kamiyung iaphango tokrwkha.Abo ni bagwi hus wng di Jehovah Kaitor kebo ni iaphango tokthar khe omo belai kirima singcha.Omo sak sakni iaphang phano wngwi mano eba dophani iaphang phano wngwi mano.Hus wng di.

Omo samung kwrak wngia,omo bison se chwng no khiklai nai.Totoro subnani kwlai sa,kisa chokdeual kitingwi  himgurung nani kwlaisa. Tamo khe a samung bai samung kaham khlaijak nani omo se kok kotor.Poito khlai sadi,”Bugra Kaitor nini iapri kaisa chini nango.”

Kebo phano nasing na naia gwja.Samung no dakti no paijak nani hamjak baio.Buphuru ba salsni pailang no, a saldok sal pai mani iagulo, chokdeual no swbai nani muchungjagwi tong bai kha.Kaitor chwng no kwplai khlai nai, butua samungrok ni bising twi, nasing di Jehovah ni jora no.(1 Korinth 1:17-29)

AI SWBAIJAK KHA (Joshua 7;8)

Jericho no mechenwi ha segwi namani iagulo, Jihudi dopha tabuk Canaan ha kwchar no segwina ni lamrwlai kha. Aroni bisingo nangkuk mani tai kaisa kamiyung kotor wng kha AI kwlaio. Aro ni harung bwkhak thang di hwnwi dagijak aiang twi khe no Canaan ni kwchar hao sogwi nai.

Bo Jericho khlai twi khe no, Joshua borok naichomnai rohor kha kamiyung AI o bo.Puila choba khlai kwplai wngma bai belai bwkha torlaiwi , bohrok kiphilwi phaiwi kok kotor salai phai kha, bohrok kwplai se wng nai aro bo.Bohrok hai hwnwi sakha. Borok kwbang nang glak khorokrasanwi eba rasatham khe no wng anw. Borok kisa rohorjak kha  , aro aswk phan nang glak. Tamo khe a sengkrak bodol thangwi  swprak lai kha AI no , bohrok sprakma karwi Jihudi dophani sengkrakrok se  riprik jagwi rohorjak bai sio. Bwkha bailaiwi, bohrok uansuk lai kha, bohrok Kaitor dagima twi tong lai lia.Kaitor ni kok nor kha.Ulo bohrok sai man baisuk khe bohrok sak ni phan no bwkha bwtharwi tong khe , mungsa khlai man mani kwrwi. Nwng phanbai buia,seng bai buia,tamo khe ani phola bai se, hwnwi kwplaisa Bugra sao (Sakaria 4:6).

Khoroksa borok ni sumsok bai se Jihudi dopha mechenjago.(Jihudi dopha kotor wng kha, kebo sak sak mungsa khalai man lia.) Achan rangchak khogwi hui tonkha. Abo ni kokno khuktang di Joshua 7 no. Rangchak budul bai hus wng di!(Joshua 37:13). Aro Achan saichung se chaia khlaio, haiphano chwng khukmatango, Isreal sumsok khlai kha; Ang ta khlai di hwn mani smai no dera rwkha, bohrok swraimung nangjak manwi no nakha, khok kha, tai bandi kha, sak ni manwirok bai baksa abono ton kha (Joshua 7:11).

Kebo ni sumsok phano saichung ni sago simi nang mani wngia, borok sak saichung tongwi bo mania. Khoroksa chwrai classo bisi pajak khe joto school ni chwrairok no solwi pajak baio.  Khoroksa swk Inflienza manjak khe, omo joto kamini borokrok no manjak baio.Khoroksa borok ni sumsok, omo dophani sumsok wngwi thango.

Nwng khlai mani bebak sumsok no nono tola khiklai rwo. Aro ni ioknani lama rutuk di, rwthai tong khe a sumsok ni bagwi rwi paidi,sina khlai di omo hai kuno sumsok swngchar khlaijak mani kwrwi, sumsok khlai satokjakiaui tong mani. Nwng Kaitor ni kerong ni iakni iogwi thang man glak.

SALGRA BWKHAK CHOBA KHLAINA THANG LAI MANI (Joshua 10)

Isrealrok haino hai tai uaisa choba khlai na thang lai phio kha AI kamiyungo. A jora bohrok kwplai wng kha. AI no mechen mani wng kha kaham khe salai chongwi choba khlai mani kokno chwng nugo.Kaitor ni bagwi samung khlai mani, abo wng kha morok samung abo borokrok ni uansukmung. Chonglai samung khlai mani Kaitor ni chongmung kwrwi khe a bo mungsa chukaia. D.L. Moody sao,samung khlai khe sak ni bagwi khlai di, Surisan khe Kaitor ni sago sakbogwi surisan di.

Jihudirok phan gwnang dopha hwnwi tabuk joto hani bwsarok sai man bai kha.Canaan hani Raja tabuk choba khlai na bagwi sengkrak bodol kotor khe thumlai ton kha.Jihudirok bai choba rwlai nani. Tamo khe chwng oro nuk kha, Gibeonites song Jihudirok bai kokkhamani, haiphano bohrok sep naituk mani Jihudirok bai rwlai nani.Abo ni bagwi Gibeonites song kaham bwthai man kha,Joshua bohrok kaham khe swprak kha, Tamo khe bohrok chini bagwi  bolmaphil nai,tai twi ma khoknai (Joshua 9:21).

Ulo Joshua sak ni sengkrakrok no khe lahar tan rwkha. Khuktang di a kothor kwlai mani tai sal kolok khlaijak mano,Abo Kaitor bohrok no chuba na bagwi rohor mani (Joshua 10:10-13).

Joshua sakha, Sal,thong thong khe bathagwi tong di.Bo omo hai kheno kok sao,Kaitor , hayung kiting tong mano bathak rwi tonkha, chinwibwrwi gonta jora, Joshua surisan mano khwnai. Professor Totten, Yale USA  ni borok bo kaisa thikeui swilang mani tongo, swngchar ni laibumao uaisa sal gonta chinwibwrwi ni slai sal lokmani kokno. O sal Gibeon sakao bathgwi tong di.pi.

SALSI BWKHAK CHOBA KHLAI NA THANG LAI MANI

Salgra bwkha ni Cannan hano segwi nabai mani iagulo, bohrok kiching khalai ha segna ni nang kha.Salsi bwkha ni joto rajarok thansa khe kuthumlaiwi Jihudi dopha bai choba khlai lai nani tiar wng lai kha. Jihudirok no mechen na bagwi. Tamo khe Jehovah Kaitor ni phan tongma bagwi Joshua bohrok no mechenwi bwtharwi khibi bai kha.Omo uaisa baino khlai phai kha hai wngia. Eleembago sao omo jora kolok logwi ma khlai kha.Ulo paithago choba mwthakjak kha (Joshua 11:23).

Oro se puila Baibelo Jerusalem ni bumung no mano.Abo ni bagwi chwng uansugwi nai mano, aphuru ni simi no Jerusalem swngchar hakotor bini mung belai kotor wng mani.A sengkrakrok ni thwi twisa ior twi khe ior kha a Canaan hano segwi nathani.General Allenby kirima kwrwi khe khorogo ri kwrwi tai iago silai patham twiaiui no him kha! Omo wng kha a city bini Laibumasalo kwbangma satok pitok khlai jak, buthat tokthar laijak. Tai bini phai nai salo belai khe no kaham wng phai nai.Aro no Khristo swngchar no naikini khlai phai nai Bo tai uaisa phan kwrak iago twiwi swngcharo phai phuru, Bini chwngsacha chwng phlai nai (Luk 21:27).

Chwng oro nuk kha Kaitor borok hamia Canaan songrok no bujthuma mano. Tabuk aphuru ni simi Canaan hani  borok rok kisa hamia wngwi thang bai mani.Tabuk chwng taibo sai mankha bisi 3500 BC o Canaan hano Babylon song phaiwi segwi naphai mani.A hao Babylon ni tomung chamung tai bohrok ni kok a  hao pungsuk kha. Bohrok ni simung rwngmung nai paibai kha. Abo ni ulo khe Egyptian rok a hano segwi naphai phio kha, bohrok ni tomung chamung belai kuchuk kaham kuk. Tell-el-Amarna tablet nokha bisi 1400 BC, Jihudi dopha Canaan no segwi naphai ia sini swkang. Egypt ni Pharoah a hano naikini khlai tong mani.A kokno Babyloni kok bai swijak, swi mani tongo Canaan hani raja ni bwslasong bai.

“A molo Canaan hao bohrok ni sima nuk mani kwbangma mol lai kabu kha, a ha gwnangwi kwbangma. Rwngnok (School),tai bijab nok (Library),tai kwbangma nuiungma tangjak manwi khwnwi bai kuplung.Iakni tak mani uamani submani habanokrok tangjak mano.A city ni twima ganao kwbangma rung kotor kotor bania khlai mani tongo.Baksa thaio khe khuluma lobmani nokthar bo tongo. A hani borok rok hayung gwnangwi bania khlai lai tongo.”

HA BAGLAI MANI (Joshua 13-24)

Joshua chakra wngsuk kha tabuk le.Nokha bisi omor chichuku wng kha.Tabuk phano ha segwi laimani paisugwi manlai ia kho. Tai bo kwbang ma ha segjak na tong  kho.  Jihudi dopha ni bwsarok a samung no khlai thai tong kho.Abo ni bagwi bo bohrok no ha bagwi rwbai kha.

“Omo Judah ni, omo Asher ni, omo wng kha Simeon ni tai omo khe Benjamin ni.”Borokrok omo hai sama no khwnao,khuktang na ni phil khe.Tai omo bo nugo,Amorite song,Jebusites, tai Hiotties song bo a smaihao  tong lai kho(Joshua 13).Ha baglai nani sakhlai ma wng kha, omo bohrok ni mungsa poito no phunuk mani se kwlaio,omo Kaitor bai twiduljak mani kokno gosi namani,aswk bohrok tekto manwi khlai lai phamano.

Bwkha kham nani kok,tabuk bohrok ni uansukma tai nasik mani mokol mwnagwi thang bai kha, bohrok tai hamna chana no uansuklai lia.Chwng swkang uansukma kwrwi iamang nukmani kwrwi hwn khe mwnawi khwnwi bo man glak,tai phola ni hamari bo man ma tong glak.Omo hai kheno Jihudi dopharok bo wnglai kha.Bohrok tabuk omo hai wnglai kha, khaja jaknai bo kwrwi kha, buro thangwi sogwi nai lama bo nuhurlai lia.Bohrok ha baglai phuru kwbang hano segjagwi najak nai tong  kho, buini dopha ni iago kwlaijak.

Hai phano tabuk bo kwbangma ha man bai na tong kho,joto dophano ha bagwi rwphuru phano. A harok David Raja chamani jora se man baio.Joto ha hathai rok bini jora se segwi nai man bai sio.

Phan tong sengla bai ha kaham kaham ha saiwi nai mania,bui no borok kechen man ma bai. Rang gwnang sengla bai kaham manwi khwnwi pai man ia, muchung twi khe naithok naithok manwi bo nai man ia.Bigra sengla bai bohrok no ha hamia sitra rok no rwi man lia.Bohrok Kaitor ni muchung twi khe mang se tong  laisio.Kaitor manwi khwnwi bakthani naichomwi bagwi rwkha.

Nwng omo hai tini wngmarok eba khlai mani akonrok nukda nuk kha? Bugra Kaitor Bini bwsarok no jotono no nakini khlai ojon khe bagwi rwo, Bo tai bo naio kebel borok no phan gwnang sinairok bohrok no iak tolwi tong na bagwi muchungjago.Bugra Jehovah ni kaisa muchungjak mani tongo, o kokrok no twiwi, jora samung tang nairok ni dormai, rangiaphang, tangmari akonrok no.Bugra Kaitor taibo muchungjak makhe hamari no baksa khe baknani, o hayung saka joto dopha no baksa khe bagna ni. Bo naikini khlai ma jora omo hai wng nai, Bohrok bebak no sak sakni angur phang iaphango,khwichang phang iaphango achuklai nai,(Mika 4:4)

Lotari khlai baglai phuru khe kebo kha hamia wngwi man lai lia.Bohrok kerong swndwk no tublai swlng lai kha, Kaitor logi tong mani mari.

Bohrok ni bisingo Moses Lebi rokno khe mungsa ha banta rwlia.(Joshua 14:3)

Sina khlai di, a hoda khe Bugra Kaitor ni samung khlai na bagwi khagwi tonjak dopha, Ochai dopha.

CALEB HA BANTA MAN MANI (Joshua 14)

  Tabuk Caleb ni omor wng kha nokha bisi chichukuba (85) bisi wng kha! A ha naichomna thang nairok ni bising bo bai Joshua tongo.Tamo ni hwnba bohrok khoroknwi Bugra Jehovah no poito chai tong nai! Khorok bwswk no Moses Ha naichomna rohor mani ? O khoroknwi simi no bohrok ni bisingo tongnairok ni thani. Khoroknwi no Bugra Jehovah no poito khlai tong nai.O khoroknwi ni mung no simi no chwng mano. A kok khwnai tong mani bagwi sokat man kha, bohrok ni bongso ni bisingo o khoroknwi no smaiha Canan no habrwjago.

 Caleb bini logi song Joshua no swng kha, a chokdeual kuchuk Jeriko no kitingwi tisajak ni kokno.Omo hai wng khe,Bugra Kaitor ang bai tong khe,ang da bohrok no beng khlai rohor mani wngo,Bugra Kaitor sama hai khe, ( Joshua 14:12).Bo a man mani hano mulaja rwkha,tamo ni hwn ba aswk dukhu khe samung khlai mani bagwi.Bono jora rwjak kha a hano mechenwi segwinani.Joshua bo bini kiching no dakti sini man kha tai dakti khe bwkha chongwi  manthai no nakha, kha kaham bai.Bo hathai hano bono bagwi  rwkha.Bini a chakra borok no hamari rwkha.

Caleb chakra raksuk kha, haiphano samung berjak mano naithok naithok khe khlai thang kha.Khoroksa Helen Keller Phwrwng naisa bono hai hwnwi sakha, O bwrwima belai bwkha kaham khatungjak borok,bo hai borok ang nukia kho,bo wng kha bobi, Mokol nukia phula, kunju khwn ai nathong haiphano bini khatung ma pai ia.Bini mastor bini aswk kaham tomung ni kokno sai khwna rwkhatamo ni hwn ba bo aswk dukhu kosto jwngjal bini langma o haiphano bo bwswk khe kosto khe tong nai bai di.Bohrok ni dopha ni bisingo Caleb wng kha belai khatungwi tong nai borok.Tamo ni hwn ba bo aswk dukhu kostono mechenwi phai kha.Haiphano taibo  samung khlaijak nai tong kho! Horace Mann hai hwnwi sao, “Dokhu kosto jwngjal no,twi tong nai borok no sinijago bo bumo hai borok.”

Bugra Kaitor kuno phuru phano kok rwmani kwrwi borokrok no kwlai sa khe tong na hwnwi.Bono suamung thani, bini samung khlai thani. Kubui kok khe ahai, Jisu Khristo sai kwlang kha,Swngchar norok no satoknai (Johon 16:33). Bo kwlaisa khe ton na bagwi smai tang ia tai kok bo rwia, tamo khe chwng no kwplai khai nani se bo naio.Jisu Khristo sao, Ang swngchar no mechen kha. Chwng arirok ni bising o tongwi se toro logo, abo ni bagwi chwng Bugra Kaitor no bwkha berasugwi tong nani swrwng kha.

Apostle Pol Timothi no samani tongo,Khristo Jisu ni sengkrak kaham wngwi bui bai baksa satokjagwi tong di (2 Timothi 2:3).

“General Booth, ano sadi bahai khe nwng samung khlai sugwi man kha abo ni huijak raida,  sai khwna rwdi.” Dr. J.Willbur Salvation Army ni bokhorok khoroksa bono swng kha.

Twrwksa khe General Booth bono sai khwna rwkha,”Ang nono sai khwna rwanw a huijak raida no,Kaitor se bebak  ano khlai rwo.”

Caleb hai hwnwi gosi kha, Ang Bugra Kaitor ni kok khwnai rwktharwi tonganw. (Joshua 14:3)

A kubui kok no uansuk nai lai anw,Bugra Kaitor chwng no katirwi ton nani tongthai ni kokno.Lekhamung bijab bai Uainwi saphima bijabo sajak tong mani kok swkagwi ton mani kok tabuk nang phai kha.(Lekhamung 35).

JOSHUA NO NAIRWGWI MANI (Joshua 24)

Jashua chakra wngsuk kha bura rakha,Bo saimano  tai bisi kwdwk thang glak kha. Abo ni bagwi bo bini borokrok no kok kwcharwi kwlang na muchungjak kha.Kha rakrwi kwlang bai nani. Puila bo okrarok no ring kha, ulo khe  lukurok no baksa khe ring bai kha,tai Kaitor phan gwnang khairokma kotor ni kokno muitu khlai rwbai kha.Bugra kaitor ni kok khwnai tong di bono borom rwi tong lai di  hwnwi kok kwchar kha. BUGRA  no kiridi, soi khe kok narwgwi bono mondi. (Joshua 24:14).Bo taibo bohrok no hus khlai rwkha, kubui ni (Apostasy) kaknairok bai,Norok BUGRA no mon nani muchungia khe,sabo no mon nai tini no chong di,norok nichuchu song twima aiang naro khulum mano da? Eba khe norok tabuk tong mani hano Amorites song ni mwtairok no da? Tamo khe ang bai ani nukhung le BUGRA no se mon nai (Joshua 24:15).

Omo belai khe kaham borok luku bwsakango sak no gosi mani tai bwkha kwrak mkhe smai tangwi kok rwmani. O chakra borok luku bwsakango kok rwkha smai tangwi.Bo kok rwtwi kheno samung bo khlai kha.

Sikalrok bo kwrak khe poito bai BUGRA ni bagwi bachai tong na nango.Tai luku bwsakngo Khristo no khuk bai gosi nani nango.Tai Motha bai kwthai tong nani. Nwng kubui khe sakno iaphar kha,mungsao kuchugo kalang nani.Phai di nailai anw Pol tamo salang kha, bukhuk bai gosi mani kokno,  Jisu se BUGRA hwnwi bukhuk bai gosi khe, phia Kaitor mbono kwthwi ni mwthangwi tisa kha hwnwi bwkha bai poito khlai khe hake nwng mwthangjak nai. Tamo ni hwn khe bwkha bai poito khlaiwi Kaitor bai kaham hwnwi romjago, bukhuk bai goisui mwthangjago. (Rum 10:9-10).

A salo borokrok hai hwn lai kha,Tamo ni hwn ba Chwng BUGRA Kaitor no se mon nai.

JOSHUA THWI KHA

Nokha bisi 110 omoro Chakra Joshua ni hama thaklang kha. O Bijab Joshua thwi khe no mwthakjak kha.Chwng aro mangkhor khortham nugo, Joshua ni mangkhor tai Ochai Eleazer bai Joshep ni mangkhor, bohrok ni bekereng no Egypt ni tubulai phai mani.Bohrok no tabuk smaiha Canaan no phob lai kha.

Oro chwng nugo bohrok no borom kotor rwlai mani, Isreal ni borokrok Josuah kwthang tonglangsak tai bini ulo okrarok BUGRA Isreal ni bagwi aswk samung khlailang mano nuknairok kwthang tongbaisak BUGRA no mon laikha (Josuah 24:31).

Aswk Jeriko ni chokdeual kuchuk rwja tong mani, abo kwlaiwi piring poroi wngwi thang bai kha,Jihudi dopha ni borokrok uaisni kiting lai kha hake a chokdeual kwlai baithang bai kha.Phatar ni chokdeual rwja makhe feetdok rwjao,tai bising chokdeual khe feetchinwi. Tai chokdeual kaisa bai kaisa chalma khe feetchiba chal laio taichukmani hwn khe feetchitham kuchuk.A chokdeual kaisa bai kaisa thepajak nok tang tangwi, chokdeual sakao. Phatar ni chokdeual phataro tai harbrao   baiwi kwlai kha tai a kwchar ni chokdeual soprejagwi harbrao kwlai lang kha. Abo ni bagwi habna thang nairok a aulio habwi manwi kha. Aro bohrok habwi ….. hor rwi sogwi khibi bai kha .

O kothoma chwng no oro sama khe rutuknai bodol sama ni kok se,Dr. John Garstang,Director of British school of Archeology Jerusalem.Jeriko 1926-1936.Tabuk bo hangar burung tong kho, thaplarok man kho,a chokdeual kwbai no nuk kho,horbai sokjak mani kwchak gap.Manwi khwnwi kwbairokbo man kho. Fourteenth centuay B. C o wng mani tabuk bo nukjagwi tong kho.

A chokdeual kwbai tolao tabuk bo chamung kwkhamrok manwi tongo.Tai achomsa khe borokrok kwmai thang ma bo nukjago.

Joshua tamo salang kha a kokno khuktang di,Chokdeual pwtapsa khe baiwi kwlai kha (Joshua 6:20). Rahab ni nok wng kha,Tamo ni hwn ba bini nok wng kha kamiung chokdeual ni thepajak (Joshua 2:15).

Smaiha Canaan wng kha 180 mail kolok ,tai 40 mail kotor.Salgra bwkhak haching panthor,salsi bwkhak Lebanon, Salka bwkhak wng kha Euphates twima kotor, salthang bwkhak Mediterranean.

Laithang nai laibumani belai khe nang mani thai, tai arono swkang kotor civilaization chengo.

                     EGYPT –    300 mail salsi bwkhak

                     Nineveh – 700 mail salgra salka bwkhak

                     Babylon – 700 mail saka bwkhak

                      Persia –      1000 mail salka

                       Greece –    800 salgra salthang bwkhak

                        Rome -      1500 mail salgra salthang bwkhak    

BWKHAK 8

                                 BIJAB BUJTHUMNAIROK BAi RUT

                              Jisu Khristo chwng no phioknaisa bujthum nai

                               chini sandai Mwthangnaisa

Baksa borok sao Bujthumanairok ni bijab wng kha Jihudi dophani belai jora hamia jora ni kok. Borhok Jehovah Kaitor no poito khlai lailia, iakarwi thang bai kha (Buj 2:13).Hake Jehovah Kaitor bo bohrok no iakarwi ton kha (Buj. 2:23).Kaitor no poito khlai ia Ingersoll hai hwnwi sao, “Borok, bwrwi, chwrarai joto no iokjak.”Kaitor kwrwi o iokjak, sak muchung twi tong nairok.Omo hai jora ni kok rokno no o Bujthumanairo ni bijab swijak. Bujthumnairok ni bijab swjak mani wng kha bohrok ni leader kotor Joshua thwi thang mani igulo se swjago,Raja Saul Jihudi dopha ni Raja chamni jora. Aphur borok rok Bujthunairok bai naikini khlaijak mani, bohrok no Kaitor chong kha satokjak tong borok no phiokna ni.Aphuru ni jora Isreal o habugra kwrwi, sak sak muchung twi se khlai bai sio (Buj.`17:6). Omo nokha bisi, bisiratham khaksa jora laibumani kokrok no swijago, Smaiha Canaan no tong mani.Abo chwng no bohrok sak baithang khlai mani  kok no sai khwna rwo.

Omo wng kha Jihudirok ni kwtal laibuma.Muitu khlai naidi, Jihudi dopha aswk bisi kolok ma nokha bisi bwrwichibwrwi jora haching panthoro himgurung phai lai mani, Egypt hao seleng ma khati tong mani iogwi phai lawi. Tabuk a ma himgurung lai mani phai lai kha.A desouali tongmung tong nairok tabuk thai kwrwng sao tong lai nani cheng kha.Tabuk ni a jora aswk kaham wng nani kok wngia, bohrok sak uansuk twi wng nani bo kok wngia. Abo ni bagwi Bujthunairok ni bijab wng kha kwtal khe chengsa lai phio kha, taiuaisa chwng aro nukmani hwn khekwtal khe bohrok ni dopha tong lai phimani akonrok no.Bohrok kosto bai jwngjal bai kuplunghaiphano bohrok kwtal khe tong na swrwng lai kha.Torlai kha loglai kha, dophano mwthangwi tisalai narwk lai kha.

Bohrok haino hai bwkha chonglaiwi sumsok khlai lai mani oro nugo.Abo hairok ni bisingo phano Jehovah bohrok no mwthang na bagwi kwbang ma raida twi samung khlai tong kho.Khoroksa tai khoroksa bujthumnai ni tomungrok juda juda.

KhorokbachiBujthum nairok Othoniel,Ehud,Shagar,Deborah, Barak,Gideon,Tola,Jair,Jephthah,Ibzan,Elon,Abdon,Samson,Eli, tai Samuel. (Abimelech a naikini khlai nai Kaitor bono Bujthumna ring ia.)

Bujthumnairok mungtham khe khakjak:

1. Choba ni bagwi ringjak nai – Gideon bai Samson.

2. Ochai - Eli

3. Diari – Bujthumnai Samuel.

Bujthumnairok ni bokhorok wng kha,Deborah,Gideon,Samson tai Samuel.Bohrok bwswk bisikolok khe bujthum kha  kaham khe sai mansuk nai kwrwi tamo khe nokha bisi ratham kwchar bujthumlai kha.Bohrok khoroksa tai khoroksa ni logi logino bujthum mani kok wng ia.Bohrok dukhu rwjagwi satokjagwi tong phuru jora jora se  Kaitor bai ringjago, bujthum nani bagwiJuda juda amchaio.

Bijabo kok thaisa saphlai tongo,bijabo kok thaisa saphlai tongo,sak sak muchung twi se khlai baio (Buj.17:6) Mark bijabo nwng o kok bwtang no man nai.Chwng oro nugo borokrok Kaito no pogwi, aro ni mwtairok no khulum lai mani.(Buj.2:13). Bohrok pogwi thang kha,Kaitor bohrok no mungsa samung ni bagwi chongwi ring mani – Kubui kok no swngchar ni borok no sanani, Kubui Kaitor ni kok.Abo ni bagwi Kaitor bohrok no swprak kha, bohrok no bui ni dophani iago iapharwi rohor kha, satoknajak na bagwi.Ulo kaham khe satokjagwi dukhu man khe Kaitor no Khairokja sidi hwnwi koilai surisan laio. Aphuru Jehovah Kaitor bohrok kaplai mani, surisan mano khwnao,bujthumnai no  ringwi rohoro, bohrok ano arirok ni iak ni phiogwi tubu nani.Abo ni bagwi o bjiab khuplung,Kok khwnaia wng mani kok, Satokjak mani kok, Tekto man mani kok, tai phiogwi tubu mani kok akonrok.Aro ioknani  lama ni surani kongsa tongo.

O bijab chengjago tomung hamaia bai kwtha mani, tai paithago khe bwkha ebrum jabrum wngwi sak no Bugra Kaitor ni thani ipharjak ia borok ni langma bo abo hai no ebrumjak.

Khoroksa borok bujthumnairok ni bijab no khuktang bai khe, oro bo nuknai,nokha bisi ratham eba rabwrwi  Jihudi dopha Jehovah Kaitor ni kok khwnalai lia, sumsogo mang tong lai mani.Kaham khe naichomwi nwng o bijab no khuktang khe nwng sai man nai, aswk bisi kolok ni bisingo bohrok nokha rasa kwchar bisi se Kaitor kok khwnlai ia wng mani.

Oro chwng mungsa swrwngwi mano, bujthumnairok ni bijabo Bugra ni kok khwna ia wngwi tong nairok, bohrok langmao hamchai man ia wng mani. Lekhamung bijab khe Jihudi dopha haching panthoro ma himgurung mani kokno sao, tamo khe bujthumnairok ni bijab khe saphalai mang tongo, Kaitor no poito khlai ia wng mani kok, Kaitor ni iak ni khar mani.

O bijab Joshua bijab bai belai kheno pherlaio:

             Joshua Bijab                                       Bujthumnairok ni bijab

            Tongthokma paia                                            Swlwkma thakia

             Chuknoha ni bison                                          Swngchar ni kok

              Kwplai wng kha                                              Mechenjak kha

              Hamchajak                                                       Kongsonjak

               Poito gwnang                                                  Poito kwrwi

                Phiokjak                                                            Khajak

  Professor Moorehead D.D. bujthumnairok ni bijano mari rigwi kwlang kha:

Uaisni poito iakarnai

Uaisni seleng khatimani

Uaisni buini dopha

Uaisni Phiok kha

Oro chwng tai bo khuktangwi man kha, borok rok poito iakarwi thang bai mani,tai Kaitor  khe khairok phlai tong mani.

Jehovah Kaitor chwng no tamo phwrwng na nai abo no swrwng di :

1.Borok ni bwkha sitrasuk bai kha. Joshua 2:11-13;17,19;8:33-35;10:6;13:1.

2. Sithaia borokrok no samungo phwnangwi Bugra kaitor khatungjak o. 1 Korinth 1:26-29) bohrok ni kothoma no naidi.

    Ehud, Borok debra huijagwi borok bwthar nai. Buj.3.

   Deborah, bwrwima khoroksa. Buj.4,tai Buj.9:53.

   Gideon, Nukhung chukia ni bwsa, dopha kusu ni borok. Buj 7.

   Shamgar, musuk painjon twi tong nai letapeta.  Buj.3:31

   Chenglai ni bekerng bai swpraknai Samson.Buj.15:14-19.

3. Bujthumnai rok ni thani Phola Kwthar.

   Othoniel – BUGRA ni phola bini thani phai kha. Buj.3:10.

   Gideon -    BUGRA ni Phola Gideon no chumrw phai kha. Buj.6:34 (ASV Baibel   

   naidi.)

   Jephthah – BUGRA ni Phola, Jephthani thani kwlai phai kha. Buj 11:29.

   Samson – BUGRA ni Phola Samson ni thani samung tang phai kha.

    Buj.13:25; 14:6; 15:14.

O bujthumanai rok ni bijab swijak kha Phola ni kokrok no twi wi, Sacharia sama twi khe, Nwng phan bai buia, seng bai buia,tamo khe ani phola bai se, hwnwi BUGRA sao. (Sakaria 4:6).

Baibel ni kamiyung kotor wng kha Kaitor ni chongjak dopha ni bising twi samung tang mani kokno sao,o jora hamiao bujthumnairok no  samung cheng rwkha,bohrok aphuru kerong twilai lai lia,desouali tomung tong mani, a borok no ulo khe dopha kotor wng kha. A kokrok no BUGRA ni laibuma.Jihudi dopha Kaitor ni kerong twi lai lia hwnwi, aro tai kerong kwrwi kha hwn mani kok wngia. Abo haino tabuk ni jora swngchar ni borokrok dagimung chi no gosi naia phano, tai Khristo ni kok khwna ya wng phano, kothoma kaham ni kok sajak glak hai wngia.

ISREAL CHEN MANI (Buj. 1- 3:4)

Joshua thwi thang kha (Buj 1: 1). Tai bo kwbang ha sekjak nai tong kho. Puila no Jihuidi dopha Kaitor ni muchungma tamo abo no se sina nang gra nai, bohrok paisugwi ha segwi nabai na hwn khe.Swkang bohrok kaham khe no chenglai gramani,Kaitor ni muchung twi khe chenglaiwi.

Kaitor Judah no chong mani, Bugra hoda (Buj.1:2) Khatharwi samung cheng lai kha,tamo khe ulo bohrok ni bwkha belwi thang bai kha.Tamo ni hwn ba bohrok Kaitor ni kok khwna lai lia.

Isral dopha birma man mani wng kha Kaitor ni kok khwna ia wng mani . Bohrok hani arino sokomor lai lia, wngiaui arirok ni mwtai no se khulum laisio bohrok ni tomung hamlia.

Isreal dopha Canaan hao thangwi tongwi lai kha,aro thangwi kami khalai kha tai nukhung khai nani chenglai tong kha. Aro bohrok ni ari achai kha,hodarok romwi khajak bai kha,seleng snamwi tonwijak bai kha. Bohrok ni ari rok wng kha,Bohrok ni arirok wng kha swikwrwng gwja.BUGRA Kaitor bini borokrok no hus khlai rwjak, bohrok bai kagwi tong na hwnwi.

Puila ni berem wng kha mechenjak mani berem. Bohrok arirok no rwkhlaisugwi rwkhlai lia,Kaitor dagima twi khe. Ephraim Canaanites song no rwkhlai lia ……. Zebulun bo aro tongsok nairok no rwkhlai lia ……  Asher bo tongsok nairok no rwkhlai lia ….. rwse rwkhlai lai lia…omo hai uaidok wng kha.

Oro swijak tongmarok wng kha kok khwnaia kok normani kok. Abo hai no beremnwi bo mechenjak mani berem. Kaitor bohrok no je muchung twino khlai di hwnwi iakarwi ton kha. Norok o hao tong bai nai borok rok bai tai mungsa kok khalaiwi man glak, norok bohrok ni haiarok no swbai nai, tamo khe norok ani kok se khwna lia…………Tamo khe ….Bohrok norok ni busu wngwi bacha nai(Buj.2:2-3). Isreal dopha bohrok sakno sak no bujthumrw kha.Bohrok sakno sak no buthar kha. Isreal dopha kwbangma jora no bohrok sakno sokomor na nailai kha.Tamo khe Kaitor bohrok no aro ni mwthang mwthangwi tubukha.

Uaisa uisu chwng uanao tamo wngwi Kaitor a smaihani arirok no sokomorwi khibi ia wng,tamo wngwi Bo Isreal dophano bohrok bai baksa khe ton. Kaitor omo hai khe ton mano mungsa samung tongo( Buj 3:1-4).

Chwng poito belmano Kaitor samung phwnango, tamo ni hwn ba bo  omo no chwng no phunukna naio,chwng sumgwnang borok, kebel.Bo kok rwi smai tang mano pokia. Chini bwkha bel mani,bwkha hamaia wng tong mani  abo rokno Bo samungo phwnagwi bini thani kiphil rwna bagwi se kwlai rwo. Chongjak dophano bwkha uansukrw nani naio bohrok kwthar dopha, Omo se Kaitor ni muchungma. Isreal dopha hamia dopharok bai ta kwthathung, ta tong thung. Bohrok bui bai kaklaisugwi tong nani wng thung.Kaitor sai mano Kakgwi tong khe borok poito kwrwk wngwi tong mano.Khristanrok sai man na nang nai bohrok swngchar bai kagwi tongna nang nai.Kaitor gana tong thai.Sumsok tai chaia sitra bai choba rwlai na nang nai. Kaitor chwng choba khlai nai kwrwng hai khe tongjak na muchungjago (Epis 6:10-18). Naidi bumo twi daseng chwng no iaphar kha.

Naidi chaia khe buino iachak mani kwthai tong mani, abo ni bwthai tamo man nai, Kaitor chongjak dophano tamo rwkha, kok khwna ia wngwi tong nairok no. Buj. 2: 20-22.

BUJTHUM NAIROK (Buj. 3:5-16:31)

Oro uaisni kwlai mani kokno chwng nugo,uaisni seleng ma khati mani,tai uaisni phiogwi tubujak mani kok akonrok.Isreal dophani borok rok bui ni dophani borokrok bai kaijak lai nukhung khamni,bohrok ni hao khulumwi mani, tai bohrok tong twi khe tong mani.

Puila satokjagwi dukhu man mani Buj.3:7-11.

           Sumsok – Takjak mwtai khulum mani

           Satokjak kha - Nokha bisichar (8)

          Phioknai – Othniel bai

Uainwi satokjagwi dukhu man mani Buj.3:12-31.

          Sumsok – Tomung hamia (lucha) tai Mwtai khuluma

           Satokjak kha – Nokha bisi chichar (18)

         Phioknai – Ehud bai Shagar

Uaitham satokjagwi dukhu man mani Buj. 4;5.

        Sumsok – Kaitor ni aro ni kutul thang mani.

         Satokjak kha – Nokha bisi chinwi (20)

          Phioknai - Deborah bai Barak

Uaibwrwi satokjagwi dukhu man mani Buj 6--8:32.

           Sumsok – Kaitor ni aro ni kutul thang mani.

            Satokjak kha – Midinites song ni aro nokha bisi sni.(7)

             Phioknai - Gideon

Uaiba satokjagwi dukhu man mani Buj 6:33 – 10:5.

             Sumsok – Kaitor ni aroni kutul thang mani.

              Satokjak kha -   Sak bai sak tanlai phuilai.

               Phioknai – Tola bai Jair.

Uaidok satokjagwi dukhu man mani Buj. 10:6-12:15.

                Sumsok – Takjak mwtai khulum lai mani lomkha.

                Satokjak kha - Philistines tai Ammorites song bai nokha bisi chichar.

                  Phioknai -     Jephtha

Uaisni satokjagwi dukhu man mani Buj. 13-16.

                 Sumsok – Kaitor ni aroni kutul thang mani.

                  Satokjak kha – Philistines song bai nokha bisi bwrwichi.

                   Phioknai - Samson

Joshua ni iakchu kwrwi, bo thwi mani iagulo. Hodarok sak sak naikini khlai lai kha.Bohrok ni rajakhor bo kwrwi, government bo kwrwi. Bohrok ni bisingo kwthalai mung kwrwi kha, dukhu malai phuru simi thansa wng na naio.Sak hamna bagwi simi thansa wngo. Borokrok Kaitor ni ari wngwi sumsok khlai khe, buini dopha ni borokrok phaiwi bohrok no mechenwi tlang phaio. Seleng ma khatiuio, buini tola ma tongwio. Dukhu man khe bohrok Kaitor no ringwi kaplaio, iokna lama rutugwi,Hake Kaitor a jora ojama kotor chongwi rohoro, bohrok ni arirok ni iak ni phiogwi tubuo.

Tamo ni hwn khe omo seleng ma khati phuru simi wng ia.Bohrok no bebak jora no phiogwi tubuo, Kaitor molbrum no bini borok ni gana tongo.Jephuru borokrok bono ringwi kapkhe, chubachu sanwi surisan khe. Bwsa khasia, kok khwna iarok no Kaitor bohrok ni khorang khwnao, bohrok bono ringhor khe. BUGRA Kaitor kok rwi smai tang mani tongo, Bo chwng no khibi thang glak, iakarwi bo kwlang glak.Chwng nugo borokrok chenmani sumsogo kwlwgwi thang mani,taibo nugo Kaitor borok no phiogwi tisaphi mani. Sumsok bangrw rwk khe Kaitor ni khairokma bo taibo bangrw rwgo. (Rum 5:20).

PUILA RAIDATWI LIA (Apostasy) Buj. 3:7-11)

   Chwng oro nugo Isreal dopha Syrian rok bai baksa tong lai mani. Bohrok a borokrok bai ualai suklai kwrwi khe tonglai na muchungjagwi borok no nornani nai lai lia, tomung deralai ianw hwnwi.(khuktang  di 3:5-8 oro bohrok tamo khlai kha naidi).Bohrok ni bwsarok no a buini borokrok ni bwsa rok bai kailai kha borlai kha.Bohrok Amorties,Hivities,erizzites song bai  thansa khe bania khlai lai kha.Bohrok  ha arino twi bo kok bangna nai lia, ualai suklai da wng no hwnwi. Ulo bohrok, bohrok ni tongthar no se gosi nalai kha, bohrok ni mwtai no se khulum lai sio (Buj.3:7).Tai bohrok ni hamia tongmung chamung no se twi tong lai sio. Tamo khe ulo Mesopotamia ni borokrok phaiwi bohrok no satokna cheng kha (Buj.3:8). Ulo khe Isreal dopha bwkha sisa kha bohrok ni BUGRA Jehovah no muitu manjak bai kha.Bono iakarwi thang mano bohrok saiman kha.Isreal dopha kwmajak sajla hai wng kha.Bohrok Kaitor no khibi thang bai kha, Kaitor bai tong khe bohrok kwplai wngo. Nokha bisichar bohrok no satok kha a salsi bwkha tong nai dopharok.Bisi lairwrwk bohork ni birman bang rwrwk.

Salgra bwkha ni borok no Kaitor rohor kha bohork no chubana bagwi, bohrok ni o kirimasingcha tong mung tai kaplai mano khwnaui (Buj.3:9).A phioknai phainaisa wng kha, Othniel.Bo wng kha Caleb ni bubainasa.Bowng kha  agi Arab ni dakait rok bai ma rwlwi rwlaio, haching panthoro. BUGRA ni Phola bini sakao phai kha,hake bo Isreal ni bujthumnai wng kha, Bo chobao thang kha.(Buj.3:10). Swkang puila bo BUGRA Kaitor no surisan gra kha, ulo choba khlai na ongkhorwi thang kha.

Othniel puila no uansugwi samung khlai grakha, Isreal dopha takjak mwtai khulumarok no mwthak gra nani.Tai Kaitor ni kerong no Isreal dophano phwrwng nani. Tai Bohrok no dopha khlai na bagwi Bugra kaitor ringmano muitu khlai rwnani.Kukubui no bohrok kwplai wng nai tai joto samung no jai jai khe chabai nai, Buj.3:10-11.

Othniel no Puila Isreal dophani Bujthumnai, bo belai borok kaham tai bujthunai kwrwng. Bo Isreal dophano Kaitor no bwkha bai mon nano phwrwngsuk kha.Omo twi uansugwi bo samung khlai kha.Nokha bisi bwrwichi a hao kwchang kwchang khe tong bai kha.

Khoroksa borok phano dophano kaham khe twidulwi twi man ia,BUGRA Kaitor no borom rwia kiria hwn khe.Kwthar khe soichajak khe se ma tong nai, bini dopha bai hano hamjak mani slai.

UAINWI RAIDA TWILIA ( Buj.3:12-31)

Kaitor juda juda borok no samungo phwnango Bini borokrok no phiokna bagwi.Isreal dophani tai khoroksa Bujthumnai hwn khe, Ehud, bo othniel bai belai khe phero, bo hai wngia, bujthumnai kudima kwrwi. Nokha bisi koloma kwchang kwchang khe tonglai kha hao khakchangma kuplung, Mesopotamia song ni sengkrakrokno rwkhlai rohor mani iagulo,a ha hamchai phai kha abo ni bagwi bohrok tai uaisa haino hai Kaitor no poglaijaukha, poito belwi thang ou kha (Buj.3:12). Tabuk khe Moabites song Isreak dopha no choprob kha.Aphuru bohrok nokha bisichichar satokjak kha. Haino hai borokrok Kaitor ni thani kaplai surisan lai phiokha.Tai Aphuru Ehud ni logi Shamgar tongo bijthumnai(Buj. 3:15).Benjamin hoda ni borok debra bini kaida twi khe Moabites ni Raja no bwtharwi khibi kha.Bini chaia wng kha bo chwng no mwnam rwsukha.Abo ni iagulo  nokha bisi chichar jora kwchang kwchang Isreal dopha tong lai kha (Buj.3:30). Shamgar wng kha musuk painjon twi nai.Chuai chanai.

UAITHAM RAIDA TWI LIA (Buj. 4;5)

Tabuk khe Isreal dophao bwrwi diarijwk bacha kha (Buj. 4:4). O bwrwima wng kha bui no belai khe khaswrang rwo,bui bwkha bai tong phuru.Kwbangma isrirok borom bai sikwrwng bai khe ha no naikini khlai lang bai kha, omo hai bwrwirok ni kok bo dopha tisathani  nango.

Isreal dopha nokha bisichinwi satokjak tong kha (Buj. 4:3).Belai kosto rwjagwi tong kha satokjagwi tong kha Sisera ni sengkrakrok bai. Aphuru bo bohrok Kaitor no chubachu sanwi kaplai kha, Kaitor bohrok ni surisan mano khwna kha.Tabuk ni a phiokmani kothoma le hamjaklai mani kothoma, rwchap mung bai musubmung bai, Deborah, luku bai hamjak jaknai bwrwima. Bono borokrok bwkha thwisuk kha, bo bujthumwi man nai. Bono bujthumnai chong lai kha.

Deborah, Barak no ringkha bono chuba na bagwi. Khoroknwi khe Isreal dophano satoknairok ni iak ni phiogwi tubu kha. Bohrok ni hao Canaanites song ni sengkrak rok kuplung, lahar twi himwi thangwi suda man lai lia, choba rwlai mang ma tong kha.Isreal dopha Katina lama kwrwi kha, bohrok dukhu man bai sinai.Tamo khe BUGRA Kaitor bohrok no arini iak ni phiogwi tubu kha.

Canaan hani Raja Jabin no mechen kha. Bini korai malkhung rachuku rokno ulo albai nani langon ni phal snamjak bai kha.Chwng Isreal dophano omo hai khe swrwngjak na muchung mani, Kaitor no iakarwi thang khe belai kirimasingcha wngo. Kaitor bai tong ia hwn khe kwlwi bwsa hai khe belsugwi thango. Bohrok tabuk bo da Kaitor ni thani khorok bwmwi tong glak? Bomna nai ia. Nokha bisi bwrwichi jora bomwi tong kha.Bohrok no slairwi man nai tabuk bo achaia kho.Deborah ni samung hao kwlai lia,bui ni mwtai haiarok no swbai swkwmai khibi bai kha.Tai hano kaham khe tisai tubu kha. Borok joto no hamcha bai khe khet kwtal swbai mwkhwtwng thaikwthwng khai chalai kha, Nok kwtal kwtal tanglai tong lai kha, lama snam lai himlai kha. Tamo khe bohrok agini a tomung kwchamo kiphil lai nani chengsau kha, Canaanites song bai kwthalai tong laiu kha.

Ulo phiokjak mani iagulo bohrok nokha bisi bwrwichi hao kwchang kwchang khe tong lai kha.

UAIBWRWI RAIDA TWI LIA ( 6 -8:32)

Tamo ni hwn khe tabuk bai uaibwrwi raida iakarwi tonglaijau kha.(Khuktang di Bujthumnairok 6:1).Tabuk bohrok ni bujthumnai khe Gideon, borok koinene khet khlai chanaisa. A jora Midinites song bohork no tlang thangwi seleng khlai tonwijau kha. A jora bohrok omo hai khe satokjak bai kha, belai khe no kirimasingcha, baksa holong hakoro huijak na nang bai kha, Gong hakorogo, tai bolong hathairogo kharwi ma tongwi bai kha (Buj.6:2).Aphuru bo bohrok haino hai BUGRA no kabwi surisan lai kha. Gideon no bujthumai chongwi rohorjak kha Isreal dophano phiogwi tubu nani. Gideon Baal mwtai ni haia no swbai khibi bai kha, Isreak dopha no Kaitor no khulumrwna ni cheng rwphio kha .Kok banglai mani se laibumao kaisa belai naijak nai wng kha. Bebak borok no sai man baio Gideon ni kothoma no,bini bodol wng kha borok khorok ratham,bohrok joto no twi gola bai mui bokorong no twio.(Khuktang di Buj, 7: 7-24).

Midinites song no mechen bai khe bohrok Gideon no raja charwna bagwi chaitok lai kha. Bo raja wng nani gosi lia. Gideon raja wng nani chukia. Oro chwng nugo,swijak tong mano, bo omo hai khlai na kok tong mani wngia, Bo Jehovah no poito khlai na nang mani tai Kaitor bono borom rwkha mun.Bo hai khlai khe bo bini mung no poito gwnangrok ni mungremo bumung tisai man khamun, Hibru 11 .

1926- 28 jora hakhurwi natuk lainairok naituk kha, Xenia Seminary song tai America ni school Melvin Grove Kyle ni luajima baitai Albright. Bohrok rutugwi man kha Othniel bai tangjak mani kamiyung no.(1500 BC) Mai ton mani gularok,bohrok ni langma bwswk khe katimania wng tong mani,tai a jora bohrok hamcha mano nukjago.Aphur bohrok bodol  bodol khe phan baksa khe ma tong laio, Midinites song Isreal dophano  choprob choprob phaio.Abo ni bagwi borokrok holong hakhor rogo ma huijago, bolong rogo ma khar laio.

UAIBA RAIDA TWI LIA (Buj. 8:33-10:5)

Uaiba jora chwng sai man kha bohrok takjak mwtai khulumwi sumsok khlai mani. Gideon thwi khe no bohrok Baalism no twi lai kha, bono khulum lai kha.

Gideon thwi mani ulo Isreal rok haino hai Kaitor no iakarwi Baal mwtaino khulum laikha (Buj. 8:33). Borok kotor ni tomung rok bwswk borokrok ni thani nang phai ma kwlai, Bo kwthang tong phuru.Bo thwi khe no bohrok piring poroi wng thango.

Gideon wng kha khoroksa borok belai tong na kwrwng tong mani, Bujthum nai kwrwng. Joto ha gwnangwi no kwchang kwchang khe tong kha, nokha bisi bwrwichi. Gideon no phob bai mani ulo khe no bohrok ni bisingo ualai mung cheng kha. Bini ulo tai kebo bini jaga phai man nai kwrwi kha.Gideon ni bwsla Abimelech wng kha tongna rwngia borok tai bunai toknai borok,Shechem o bo hamia khlai khorom bomrwkha tai Raja wng nani chuklia. Bo borokrok no dukhu rwi nokha bisitham naikini khlai kha.Bo bwrwi khoroksa bai bwtharjak kha tai nokha bisi bwrwichi hao kwchang kwchang khe tong lai kha Tola bai Jair Bujthumnai ni jora. 

Je borok kwsrang pailai ia khe samung khlai tong nai bono swngchar no mechenwi man nai.

UAIDOK RAIDA TWI LIA (Buj.13-16)

Uaidok raida twilai lia wng phuru bohrok bebak no takjak mwtai no khulum bai kha. A jora belai kirimasingcha jora.Tabuk Kaitor bohrok no satok pitok khlai na bagwi Philistines song no rohor kha, nokha bisichichar satokjak kha.Paithago bohrok bwkha baijak baisuk kha, BUGRA ni thani kablai surisan lai kha. Oro tabuk no puila bohrok ni surisan lai mano BUGRA Kaitor khwna ia wng mani nukjago.Bohrok no kwbangma jora romwi phiok phiogwi tubu mani, bohrok bini kok khwnalia.Abo no Kaitor bohrok no muitu khlairwi rwkha, bohrok no phiyogwi tubu mani kokno (Buj.10:13). Bohrok no kubui khe Jehovah hamjak mani kokno chwng oro mano.Hake bo Isrealrok lengma no nugwi belai bwkha khamjak kha (Buj.10:6-12:15).

Jephthah ni iak twi Isreal dopha tai uaisa phiyokjak ukha.Hibru borok rokni thani jora jorao Kaitor no kirinai borok achai achaio. Tabuk ni Arab ha wng kha omo hai ha. Bo kwthar choba ni bagwi khatungjago, abo ni bagwi rara borok thwi bai kha, Alla bohrok ni diari no ring laiwi.Bohrok ni kirima kwrwi.Bo thamchi kutung tai maia bo gwnang. Bo poito kwrwk borokrok no tisai tubuo,ulo swngcharo kwlwk thango. Omo hai mari chwng nugo, Deborah, David,Elijah, tai Jephtha rokni thani.Omo hai kokrok laibumao kwbang khwnathotok kothamarok  chwng nugo.Bo wngkha kha kwrak kwplai.Bo smai tangwi kwplai wng mano khuktang di.Bo bini bwsa ni bagwi kokrw mano (Buj.11:30-40). Bo arirok no mechenwi kwplai wng mani iagulo nokha bisidok bujthumlang kha.

UAISNI RAIDA TWI LIA (Buj.13-16)

Uaisni raida twi ia wng mani kokno omo bai se chengsio. Iserealrok haino hai BUGRA ni thani sumsok khlai phikhua (BUJ 13:1).

O jora bohrok tabuk Philistines song bai phwrwngjak bai kha,kirimasingcha khe bohrok satokjak kha, nokha bisibwrwchi. Oro chwng Samson ni kok no ma khuktango.O kothoma wng kha kwbangma jora kaham tai mechenjak mano kok akonrok.O borok wng kha Achaia sini no chongjak, Isreal dophano Philistines ari ni iak ni phiyokna bagwi (Buj.13:5).

A jora wng kha sak mang phan gwnagrok ni jora.Hakhe se aphuru ojama kotor hwnwi sinijago.Kaitor omo hai borok no se bini samungo phwnango, Philistines song ni iakni phiyoknai. Bebak samungo no Samson no chubajak nai,tamo khe bo samung hamia khlai kha, abo ni bagwi no sak sak belkha.Paithao bo Gazao kaham khe chen kha.(Khuktang di 16 berem no) Omo hai khairokma singcha tai kwrwi Samson ni bagwi.Mokol ekheregwi khaui tongjak kha,Philistines rokni holong pherei ma tong kha. Bo bohrok ni iak ni dophano phiokna ni kok tong mani (Buj.16:20-21).

O kothoma mwthakjak kha Samson no twiwi, 1 Samuel bijab jora.

KOKBARAH (Buj. 17-21)

Paithak ni beremwng kha oroi poroi nang mani mangpili tai miling malang chajak.Isreal dopha Kaitor no iakarwi thang bai kha.Bohrok kuthuk ni slai tai bo kuthugo se kwlai thang bai sio.Khuktang di Buj.17:6 no tai tamo wng bai ma kwlai kha nwng sai man bai nai.

Puila chwng nugo, Bohrok ni dophani tongthar langma ebrumjabrum wngjak (Buj.17, 18).

Tai kaisao chwng nugo, Bohrok ni dopha ni langma ni tomung hamsuk lia ubrumjabrum. (Buj.19).

Paithago chwng nugo, Bohrok ni dophani political langma bo ubrumjabrum nangjak (Buj.19).

Joshua thwi mani iagulo omorok bebak wng bai mani kwlai kha. omo wng kha chongjak dopha ni bisingo wng mani tomung chamung akonrok. Omo taibo wng mani kok khe borok sak sak ukolok kiphilwi thango,abo ni logi logi no dopha bo okolok usluwi thang o.

Paithak ni berem khe omono  phunugo Isreal dopha tabuk lama korojak BUGRA ni noktharo thangna ni, bohrok ni bwkha sumsogo kwlwkjak.Oro chwng nugo bohrok poito kwrwi gwja, chenjak sengkrakrok bai kitingwi tonjak.Tamo khe BUGRA Kaitor belai khe bini borokrok no hamjago.

Mothani laibumao bo chwng nugo, aswk bisi romwi omorok hai no wng mani,o borokrok  bai,Luther,Knox,tai Wesley bohrok bo mothano phiyogwi tubu mani.Kwbangma khristan rok ni langma bo omo hai mang no nugo.Bugra Kaitor langma ni duglam phiyogwi rwo, tai samung kotor khlai na bagwi bono khairokma kuplung khe rwi tono.Aphuru chwng bono pogwi thango, ulo chwng swngchar ni tomung chamung rok no rwktharwi thango.Abo rok chwng no mechenwi tono,chwng Kaitor ni iak ni kwmai thango. Tamo khe chwng bwkha kiphilwi Kaitor ni thani suri san khe bo chini surisan mano khwnao.Bo chwng no hamia ni iak ni phiogwi tubuo.

O kothoma khwnathotok no khuktang di, Bujthunairok ni bijab ni puila ni berem bai khe baksa khe naiwi. oro chwng nugo Isreal dophani nok nukhung ni tomung chamungo, a uburum jaburum  jora ni kokrok. Samuel no bijab no swi khwna. Tamo khe kebo kaham khe sai man nai kwrwi o bijab buro swijak kha, buphru ba swi kha. o kothoma gothok ma khe Gideon bai Jephtha Bujthumani jora ni kothoma se.O bijab juda muikur budulo swijak, tai kubun bijab bai kwrwngsa khe swijak mani wngia.Omo penticost bosojora luku bwskango khuktangjago, muikwthwng thaikwthwng chamung panda.

Ruth wng kha David ni makoto (Great Grandmother) O bijab wng kha David  bosong ni Khristo ni chwchwi borarachi . Omo tai bo sao omo Masia ni nukhung ni kok akonrok. Tai masia dophani bising twi bisi kolokma iagul ni ulo Masia phai nani kok no salango.

Aro kaisa khwnathotok kok no muitu narwk thai,Ruth wng kha Moabites dopha ni borok,bohrok Lotni gusti kwlaio. Bohrok Kaitor no khulum ia dopha. BUGRA Kaitor omo hai nukhung kharw kha,a nukhung ni bising twi swngchar ni mwthang naisa achai nai.Abo ni bagwi Kaitor no khlum ia nukhung ni bwrwi naithok no chongwi Bethlehamo tubu kha.Boaz ni bihik snam kha.Omo no Kaitor ni khairokma.Bo Kaitor no khulum ia gentile no Khristo ni nukhungo daphai kha.Puila khe bini bwsai ulo Noami ni thani Kubui Kaitor ni kokno sai man phai kha.

 Boaz wng kha Rahab ni bwsla,Jeriko ni sak phalwi chanai bwrwi.Mathai 1:5 no naidi.David ni makoto bo Mobites dophani Canaan song bai bo gusti sogo. Masia ni bahan bwthwi ni borok.

                                          BWKHAK 9

                                                        1 Samuel Jisu no hwno, Chini Habugra

Tabuk chwng Raja rok ni kokrok no swrwng na thangwi tongo, o thaidok no puila nailai grana:

                             I Samuel – Borok chong mani- Saul

                             II Samuel - Kaitor chong mani - David

                             I Habugra – Solomon tai Isreal.

                             II Habugra – Isreal ni Habugra rok.

                              I Bosong – Solomon bai Nokthar nok

                              II Bosong - Habugra rok bai Nokthar nok.

Samuel bijab wng kha bugrasong ni laibuma.Samuel nukjak phai khe no Bujthumanairok ni bijab paithang kha.Aphuru borok rokni tomung belai khe lachima singcha.Bohrok kubui kubuino Kaitor no iakarwi thang bai kha,tai bohrok habugra sanlaiwi kok banglai kha, (1 Samuel 8:4-7).O bijab nokha bisi raba jorani Isreal habugra rokni  laibumani kok no sai khwna rwo.(Abo 1095 – 586 BC).

Samuel bijabo swijak tong mani kok wng kha nokha bisi rasa tai bachi bisi jora ni kok sajago. Samuel chwrai phuru ni simi dopha jwngjal patijak Saul habugra chamani jora,tai Kaitor chongwi David no habugra charwma jora. A khoroktham ni langma no twiwi o bijab swijago, bohrok ni tomung chamung  ni kothoma rok no chwng no sai khwna rwo . Samuel wng kha paithak ni bujthumnai, Saul wng kha Puila Isreal dopha ni Habugra . Oro swijak tong mani kothomarok wng kha, David bugrasong no thiti khe khwlang mani jora. BUGRA Kaitor David ni singason no kwrak khlai kha(Lobmung 89).

O Bijab no khaktham khe khagwi mano borok khoroktham ni mungwi:

                          1. Samuel (1-7)

                           2. Habugra Saul (8-15) 

                           3.  Habugra David (16-31).

O Laibuma chwng no sai khwna rwi kwlang male borok ni biography no twiwi.Borokrok kubui kothama no khwna na muchungjak baio. O kothoma no chwng joto sai man o tai chajag o 1 Samuel bijabo swijak tong rokno. Sabo Samuel ni kothoma sai mania tong (1 Samurl 3).David bai Goliath ni kotham  (1 Samuel 17). Tai David bai Jonathan kiching kuma ni kerang kotham (1 Samuel 18)?

O Bijab ni mung bo, sinijak nai borok kotor ni mung twi no pharjak kha, SAMUEL. Aroni kwbangkuk kok bo sak baithang no swilang khwna,berem 24 jora. Nathan bai Gad  se o bijab no swi pairwo. (1 Bosong 29:29 tai 1 Samuel10:25).

SAMUEL, HABUGRA CHONG NAISA (1 Samuel 1-7)

Samuel hwn ma khe - “Kaitor ni thani sanjak!” O bijab chengjak mani hwn khe  Hannah ni kothoma no saui,Samuel ni buma.Bwsa chwla man na bagwi kabwi Kaitor no surisan mani.Bwsa chwla man khe a chwrai Kaitor ni samung tang nai. Samuel wng kha paithak  bujthum nai khoroksa.Bo surisan mano Kaitor khwna kha. A chwrai Samuel BUGRA no monwi tongo(1 Samuel 2:18).

Bini aswk omor kolok langma no bo Kaitor ni samungo phwnang kha. Bo wng kha BUGRA Kaitor ni borok.Bo wng kha achaidrob ni simi no surisan phlai tong nai borok. Puila bini bijab wng kha bini mung no twiwi swrwngjak nai, bo surisan mani thai tai bini phan ni kok akonrok.Bini langma wng kha kaisa phunkjak nai langma. Bo wng kha chwrai khoroksa surisan naisa (1 Samuel 3:1-19); Bo wng kha surisan mani bising twi dopha no kwplai khlai nai (7:5-10) Isreal dopha bohrok ni habugra nangjagwi tong lai phuru bo BUGRA Kaitor no surisan kha (12:19-23).

O mol wng kha mwnak mol kirimasingcha jora tong mani,a jora chwng nuk kha,khoroksa bwrwima ni poito no, tai bo bwswk khe BUGRA Kaitor no bwkha thwisugwi poito khlai mani, Bo wng kha Hannah. Bo chwla bwsa man na bagwi BUGRA Kaitor no surisan kha, Bo chwla bwsa man khe a chwrai no Kaitor ni samung tangna bagwi iapharwi rwnai(1 Samunel 1:9-19).

Samuel achai khe no Hannah bono Shiloh ni Tambunoktharo tubu kha, A jora ochai rok ni tomungrok belai kirimasingcha chaia tong mani,abo rokni Samuel no katirwi tongjak kha, hai twi khe no bo torkha loka kha, Kaitor no poito khlai torkha (1 Samuel 1:24-28;2:12-26;3:1-21).

A Jora Eli wng kha Bujthunaitai ochai tong mani.Bo nokha bisibwrwchi Bujthum kha. Bo wng kha saknang ia bupha, bwsa khorok nwi Hophni bai Phinehas no pusina rwngia,bohrok obo ochai hai phano bohrok ni tomung belai sitra leta peta.Kaitor chajak lia.Abo ni bagwi Kaitor Eli no hus khlai rwkha bini nukhung no swbai khibijak nai.

Buphang no yong chamani, sal kolokma romwi naijak lia.Saka sak kaham haino ma tongo, achomsa buphang bai khe, aphuru se sai mano buphang yong chajak.

Isreal dopha sumsok khlai lai mani baloksuk kha.Aswk sal kolok wngwi tongma bagwi dopha kwlai dukhu man kha a kok rokno swijak tongo.(1 Samuel 4).

Philistines bohrok ni ari ha segwi naphai phuru Isreal dopha lachima singcha khe mechenjak kha. Kerong swndwk segwi tlangjak kha,tai Eli ni bwslasong takhuknwi no bwtharjak kha.A kokno Eli khwna khe, chakra bura omor nokha bisi chichukuchar omor,Bwkha dukhu manwi thwi kha.(1 Samuel 4).

SIKRIJAK PHLAI TONG KHA

Philistines song kerong swndwk segwi naphai mani laibuma no khuk tang di. Puila philistines song ni kok no Bujthumanairok ni bijabo mano, berem 13-16 no. Bohrok nokha bisibrwichi jora satokjagwi ma tong kha (Buj.13:1).Abo Samuel bujthumani jora sok phai kha(1 Samuel7:2). A choba bohrok ma rwlai male Jerusalem ni salsisalthang bwkha mailbrwi chalo.

Philistines song wng kha Isreal dopha ni phan gwnang ari kotor,bohrok salgrasalthang bwkha tongo, twima kotor rukungo. Omo kwtal khe khlai laiphi kha Samson thwi mani iagulo. A choba Isreal dopha no swprak kha.Bohrok uanalai kha tamo wngwi Kaitor bohrok no iakarwi rwkha.Kaitor ni ari wngwi bachama bagwi. Bohrok Kaitor no surisan lai kha bohrok ni wngwi choba khlaina ni.Mizpeh o  borokrok bwkha kiphil mani khuktang di. (1 Samurl 7).

Chwng kwplai wngwi man ia, kaitor ni ari wngwi tong twtwi! Abo ni ulo bo Kaitor ni kok khwnalai lia,kok norlai kha.Omo puila ni iaphang birman man mani. Borok rok sibai mani jora Kaitor no muitu khlai lai lia,Kaitor ni chwngsacha khlai thai tai BUGRA ni muchung twi tong na nang thai.

Au o langma le choba mase ma khlai thai, choba kwplai wng nani se khlai thai.Chwng no mwthang nai sengkrak ni bana tola sakno iapharwi ton khe, kwplai mang wngwi tong nai.Bini muchungma se chini muchungma wng thai.Bebago no kwplai ni slai taibo kwplai wngo!(Rum 8:37).

 HAMYA BAI BODOLOKJAK MANI

Philistines song bai puila mechenjak mani iagulo, bohrok kubui khe da tong lai kha Kaitor ni kerong bokhok no twi wi, katirwjakna ni.  (1 Samuel 4: 3-7, 10)

Kaitor ni smai bokhok Kaitor ni slai belai kheno hamya wng kha.Kwbangma borok no uansugo, bohrok tongthar kanmung chumung tong khe, eba tongthar tong khe, mwthangjago tai satokjak nani yogwi thango.Bigra khangrarok no chamung nwngmung bai chuba kha hwn khe  mwthangjago hwnwi kha kai tongo, abo twi khlai wi borok mwthangjagwi man ia, mwbo mwthangjak ia. Abo hai khlai khe abo muani tabis khe bohrok kwplai wng mano hwnwi kha kai tong baio.

Rev. Bipion Debbarma sao,“Borok  khlai manlia thaksuk kha,  Kaitor  ni  jora cheng kha!” A jora bohrok ni jora hamia jora, haiphano Kaitor a jora no samung kaham khlaina jora nakha, BUGRA Kaitor Samuel ni bising twi saumung khlai na cheng kha.

1) Philistines song ni iakni phiyogwi tubu kha.

2. Bugraha snam nani jugali kha.

3. Thiti khlaisugwi nokthar tang kha tai tambunok ni nothar kwrwi kha.

4. Ochai kaham kwrwng snamwi tisa kha.

SAMUEL, DIARI

Samuel no  paithak ni bujthum nai. Puila  Diari kotor, Puila Isreal dopha ni habugra chong nai. Abo rokni slai taibo samung kotor khlai lang kha, diari rokni rwngnoksongcha kha, tabuk ni Baibel seminar hai. O borok kotor ni langmao kunu sejajaknai kwrwi. Samuel hamia khlai mani mungsa phano kwrwi.

Kaitor chwng no kaham manwi mang iapharo, chwng man mani akonrok. Kaitor ni khairokma wng kha molbrum brum tong nai.Chwng sak chongwi samung khlai na bagwi phiyogwi rwjak borok. Chwng sak sakno jesa sumung khlai nani phan tongo, Kaham khlai nabo eba hamia khlai nabo.Tamo khe a samung ni bwthai nwng manjak nai. Kaham khlai tong khe kaham bwthai man nai ni, hamia khlai khe hamia ni bwthai man nai,satok pitok nwng man nai. Kaitor ni kaham no chwng chongwi nathai,chini bwkha muchung twi khe.

JORAO THANGSA PHIKHA

BUGRA Shiloh o nukjak, nukjak phai kha(1 Samuel 3:21). Shiloh ni ongkhorwi phailajak (khuktsang di Buj. 21:19-21). Kaitor no lobwi rwchablai mani thaio se, chama bai nwng mani thai snam lai sio.Shiloh wng kha kaisa Kaitor tong mani thai , Joshua ni simi Samuel ni jora. Abo no David seui tlang kha Jerusalem o. Kerong bokhok no Philistines song seui nor kha,Samuel chwrai phuru tong mani thai ni.Abo ni bagwi Shiloh kaisa belai nang mani thai tong mani.( 1 Samuel 4:3,11).

 RIBAIBEL TAMO TUBU KHA

Mungtham tubu kha:

1. Surisan nai Buma, Berem 1

2. Borok rok no swpragwi phwrwng mani, Berem 2.

3. Kok khwna nai Dirari kaham, Berem 3.

Surisan nai khristian bodol nango, bohrok ni nangma rok no sai man nai, tai kwthar kothoma pirnai mwthangwi tisa phina ni. Philistines song bai naikini khlaijak tong phuru Isreal dophani thai snamjak kwrwi Kaitor no lobwi khulum na ni . Samuel torwi logwi sikla sogwi phai kha tai je samung ni bagwi bo achai mani a samung tang nani. Isreal dopha kok khwna ia wnglai tong phuru bohrok kaisa mari nukh kha, bohrok Kaitor no nangsugwi tong mani.Tabuk bohrok Kaitor no san lai kha.Tabuk bohrok dhuku man mani kokno Jehovah no salai kha.Jihudi dopha ni borok rok abo hai no tai uaisa khlai phinai.(Zacharia 12:110-11) Bohrok buthar mani Jisu tai uaisa phai mani salo.Jehovah bo sak no bini borokrok bai nukjak phuru.

Kaitor borok rokni thani samung khlai mania, borok rok Kaitor no nangjak ia hwn khe.Mungsa swk man nani muchungjak ia hwn khe.Kaitor a borok no kha nangjago.Je borok sak sakno kaham hwnwi tong nairok no.

Samuel bohrok no hwn kha, hake “phai di” norok nangjaksuk tong khe hake norok ano khlai phunuk di. Bahai khe khlai phunuk nai sadi? Norok mwtai khulum tong mano khibi rohor bai di.”(1 Samuel 7:3) “Khibi rohor bai di” sinia nukia mwtairok no. Khibi rohor di, hwn ma khe halok swbaiwi khibi di hwn mani se.Norok kok rwkhe Kaitor bo norok no kok rwnai.BUGRA kok rwi samung khlai nai.Tongthar (religion) le haino sak ni bwkha muchung twi khlai ma bai wng ia, Tamo khe bwkha bising ni muchungma bai se khlai thai.

Omo belai khe kwlai, Uram uram chwng “kok kotor” samani, tamo khe tai thaisa kok khe ahai se a kok satwi khe chwng tongwi da man. Chwng Kaitor no kok rwi smairok tango, tamo a smai tang twi khe tongwi da mano. Khlai mania wngwi thango. Omo bwswk khe bwkha kham nani kok satwi khe tong ia “tatal” sama kwlaio. Bukhuk bai samani simi se kwlaio.

Bohrok bwkha bailaijak, kablaijak tai Samuel omo hai jora no samungo phwnang kha tai bohrok no BUGRA Kaitor ni thani kiphilwi phai nani kobok kha.Mwtai takjak no khibirwi rohor rwkha. Samuel Haia kaisa tisa kha abono Ebenezar hwno.(1 Samuel 7:12). Ebenezar hwn makhe “ chuba nai holong”, Khristo chini kwplai no  “Holong” hwno, abo Smai kwcham tai Smai kwtalo bo sao.(Daniel 2:35; Mathai 21:42).

Kok barahsa khe sakhe, Samuel ni kothoma no, Bini nok wng kha Ramah o. Aro Bini kami ni simi no bo bisio uaisa joto thai no berai naio, Bethe,Gilgal,tai Mizpeh akonrogo. Aro tong twtwi no bo borok rokno naikini khlaio, kaham hamia o chubao.(1 Samuel 7:15-17). Tabuk ni jora o bo chwng nugo Missinarirok abo hai khlai tong mano. Bohrok kwrwngsa thaio no kwcharo chongwi achugo, tai aro ni simi amchai gwnangwi berai samung khlaio.

Samuel dirariok ni bagwi Ramah o rwngnok  khungsa tang kha.Aphuru ni simi no diari song ni tomung chamung jai jai khe khlaijago. Kaitor ni bijon man na twi khe. Kerong bokhok bui bai tlangjak bai khe no ochairok piring poroi wngwi thang bai kha. Samuel Ramah o samung khlai nani bathak  khe no omo hai wng kha. Samuel ni iak twi Kaitor Isreal dopha no kwtal khe tongna chana, juda khe kwtal khlai kha. Bo Diari rok no ring kha a diari rok ni khuk twi Kaitor bini kokno borok rokno sakhlai nani. Diari rok kok samani Isreal dopha ni kaisa tong mung wng kha Samuelni iaktwi. Samuel borok rokno thumwi kuthumrwkha, diari phwrwng nani, A borok rokno Diari bwsarok hwnwi ringo. A borok rokno chwng buro nuk hwnba, Shiloh, Gilgal, Bethel, Samaria tai Ramah akonrogo.(Samung 3:24).

Samuel Samung kotor khlai langma wng kha bohrok ni hano thiki khlai songchai kwlang mani. A hoda kaisa kaisa khe bohrok borok phiokjak khe dopha kotor wngwi bacha kha.Tai kubun dopha kotor rok bai baksa bachai man kha. Isreal dopha tabuk phan gwnang dopha wng kha. Bohrok Kaitor no aswk kaham twina nailai lia, kok bo khwna na nailai lia.Bo dagimani no khwna na nai lai .Abo ni bagwi bo Samuel no dagi rwkha Raja chong na bagwi. Isreal dopha taI kubun dopha ni Raja tong ma hai bohrok Raja man na muchungjak bai kha. Tamo khe Kaitor bohrok no tai kubun dopha hai khe ton na muchungjak mani wngia. Uainwi saphaima 17:14-20 o diari kok samani tongo, Bohrok nibo habugra tong nai,tamo khe bohrok sak phiyokjak wng thai tong mani wngia, Kaitor bohrok no twidul nai.

SAUL, HABUGRA CHONGJAK KHA (1 Samuel 8-15)

Kaitor bohrok no habugra rwna ni muchungjak mani wngia tamo  khe bo sakno bohrokno naikini khlai nai.Bugra bohrokno ojama kotor khoroksa rohor kha mun tai bohrok BUGRA bai kok sakhlaijak khamun. Tamo khe Isreal dopha sak ni bwkha ubrum jabeum wngma bai pwtapsa kwlwi kha. Bohrok habugra se nango hwnwi kudilai kha tai bohrok no kitingwi tong nai dopha rok hai khe. Aro chwng nukha Kaitor bohrok ni san mani khwna mani.Aro chini swrwngjak nai tongo,Kaitor muchungwi rwmano da man na muchung eba sanjagwi rwmano da man na muchung.Sanjagwi tong khe Kaitor rwi rwo, abo no da nwng iachak nai, eba sanjagwi ma muchung kha, hake dagi marwkha.

Saul, bohrok ni puila habugra. Bo belai kheno chwla naithok, kuchuk kotor.saka saka belai khe kaham kwrwng.Bo belai chwngsacha khe samung cheng mani.Bo wng kha sengkrak kotor phan gwnang.Bo arirok no dakti dakti no mechenwi khibio, arirok bini bwsakango tiki tong mania.Bini ari Philistines, Amalekites, tai Ammonites song no bo mechen kha.

Saul puila phuru borok koinene tong mani ulo khe bo belai khe no kung chuk kha, Kaitor ni kok khwna lia. Saul hai kebo aswk jora kaham man nai kwrwi.Abo hai khe no Saul hai tai kebo kwrwi aswk lachima singsa khe chenwi pwtap kwlai nai.Saul, David no kobor kobor chaui naslejago. Isreal dopha sumsok bai kuplwng twtwi san mani bohrok ni habugra,abo bohrok no rwkha, Saul wng kha bohrok ni habugra, omo BUGRA Kaitor ni muchungma wngia. Saul kaitor ni bwskango kaham da wngwi man kha? Omo hai jora Saul kaham khe samung paisugwi khlai da man kha? Bo samung chengia sini swkang no chenwi thang kha, abo ni bagwi bo Kaitor bai hamia hwnjak kha. BUGRA Kaitor bono kha phurlia.

A kokno Kaitor elembago swraisa khe sakha. 1 Samuel 12:12-15 oro Kaitor ni diari salang kha, bohrok sanmani habugra to man kha, bohrok Kaitor no khuk bai gosi lai ia wngwi tong phuru phano (Bt 12). Bohrok tai bohrok ni habugra Jehovah Kaitor no kiri  kok khwnai tong khe , hai khe belai hamchanai, tai hamari kuplung man nai. o kokno Samuel tamo hwn kha naidi, (bt 16-18).Ulo naidi tamo wngkha habugra san lai mani logi sumsok gwnwng Isreal dopha bohrok ni sumsok gosilai mani.(bt 19).

Aphuru Samuel bohrok no kok rwi saka, bohrok Kaitor ni thani sumsok gosi iaka bai khe, hake Kaitor bohrok no hamari rwnai.

Tamo wngwi borokrok Kaitor bai chajak ia wng kha tai Kaitor bai norjak bai  hwn khe, bohrok ni phola Kaitor no iakarwi thangma bagwi.Kaitor se puila hamjak na chengo,Chwng bonohamjago, tamo ni hwn ba bo se puila chwng no hamjago.(1 Johon 4:19).Borok se puila sumsok khlai nani chengo (1 Samuel 15:23).

SAUL, CHONGJAK PHURU MUNGBWRWI WNGMANO MUITU KHLAI DI

1. Chuknoha bai chongjago: (1 Samuel 9:3-20), Bo phataro ongkhor lang phuru iago korai jing twijak, tamo khe nogo kiphlil phai phuru khe habugra ni phan iago twiwi nogo habphaio.

2. Diari bai chongjago: (1 Samuel 10:1), Samuel wng kha bini kiching tai bono phwrwng nai mastor. Omo bwswk kaham tong mani tamo khe bo iakrwi khibi rwkha.Omo chwng bo tabuk khlai lai tongo!

3. Phola bai chongjago: Kaitor ni phola achomsa bini thani phai kha(1 Samuel 10:10). Bo a Phola no bwkha dukhu rwkha, tai Phola no ransa rwkha. Bo Phola Kwthar no twi tong na hwn khe,bo bono hamjak na nang nai tai kokma khwna nai.

4. Luku bai chongjago: Omo se Bugra chong mani borok! Chini bisingo khoroksa phano omo hai kwrwi.(1 Samuel 10:24)

                                                                       PHUNUKMA BWLAI

1. Kaitor ni haia o Saul bwkha chongwi namani (1 Samuel 13:11-13).

2. Bwsla Jonathan no bwkha sitra bai nai mani (1 Samuel 14:44).

3. Amalek no twi kok khwna ia wng mani (1 Samuel 15:23).

4. David no sejaui naslejak mani (1 Samuel 18:29).

5. Endor ni swkaljwk mani thani kok swngwi sumsok khlai mani (1 Samuel 28:7).

SAUL CHOBA KHLAI MANI

1. Ammonites song bai choba khlai mani:

Bugraphan ni swkang, paiphlai kasujak tong mani ari wngwi, sengkwrwk bodol phan kwrwk khe songchajak kha, Ammonites song no sokomwi khibijak kha, Habugra Saul ni borom torkha tai ha phan gwnang wng kha.

2. Philistines song bai choba khlai mani:

Saul ni sumsok, ochaini samung kebengwi tang mani,Kaitor Saul no  iakarwi rwkha, Jonathan bwkha kotor, khoroksa bai no Philistines song bono kirijak bai kha,

3. Amalekites song bai choba khlai mani:

Saul arirok no haching panthoro riphrik rohior kha,Kok khwna nairok no bwthar kibi bai kha,Manwi kaham kaham segwi tubu kha,Samuel no tatal saio,Dari saphikha Kaitor bono iakar thang kha.

4. Philistines song bai choba khlai mani :                                     

Saul Philistines song bai choba khlaimphlai ma tong kha,Divid sikla chasolok nukjak phai kha chongjak mani iagulo, Goliath bai nang lai kha, Philistines ni phan gwnangsa,Bono bwthar khibi kha, kirijak bai kha, David kwplai wngwi phai kha.

5. David ni ari wngwi rwlai mani :

Kusta ia kusta ia Saul David no sejakha,bono bwtharna nai kha. David rwkhlaijak kha,David kemni iokphlai mang tong kha, Saul thwi ia sak David ni ari wnglang kha,David ni kagphlai ia kiching wng kha Saul ni bwsla Jonathan.

6. Philistines song bai choba khlai mani:

Chobani harung Esdraelon no, Saul ni jora hamia wngwi tong phuru Endor ni swkaljwk mani thani thang mani,b Samuel ring hormani, mechenwi bwtharjak kha,Isreal dopha mechenjak kha, Saul tai bwslasong takhuk tham bo bwtharjak bai pha.

KAITOR NO RWDI BINI MUCHUNG TWI KHE

Samuel kwthang tonglang phuru, Saul ni belai khe dukhu man mani jora tong mani.Bo je phuru chen chenwi thango, aphuru Samuel bono hus khlai rwmang tongo. Tai kha khamjagwi bo bwkha dukhu manjago.Kwbang baibel bwtang rogo no a kokrok mano (1 Samuel 15:35).

Philistines song bai choba khlai phur Saul bwsla song takhuktham bai bakasa bwtharwi khibija kha.Oro aswk smai tangwi kok rwjak tong mani orono pailang kha tai mechenjagwi pai kha. Saul Kaitor ni kok khwnasuklia abo kubui. Rom di ang rasa acres bui no ha phal kha, a ha kwcharo ang acre kaisa ha narwigwi rwkha,hake ang ani hao thang na bagwi a rasa acres hano kaui no mathang nai. Chini jwngjal bo abo hai no ha khasa soitan bagwi bwkhao narwgwi ton mani.Soitan chini bwkhao phaio, phai mano.Raja Saul ni langmao omo hai no wng kha.

Uansugwi naidi Tarsus ni Saul (Pol) bai Raja saul ni tomung tamo pher lai! Khoroksa puila Kaitor no se langmao twio, tai khoroksa khe sak sakno. O bijab chwng no tamo phunuk hwn male Kaitor chini langmao jotoni slai puila kwplai ma wng nai.Abo ni bagwi bini bwsarok hamari man glak bono puila sago twi ia hwn khe.

Raja Saul dukhu man ma le belai khe swrai swrai joto no sai man baio.Abo ni bagwi Saul ni langmao mwnagwi phai kha,daktino Saul ni langmao sanja mwnagwi habkha.Kaham khe nai swrwng di, bo bahai khe  borok torkha,bahai khe dophano naikini khlai kha,tai habai khe gurum kwlai lang kha.

DAVID, KUBUI HABUGRA PHUNUK LANGMA NI

O bijab khaktham khe bakjak no chwng philwi nai khe, aro Samuel bwkha khamjak mani nugo, Raja Saul ni bagwi. Kaitor Samuel no kutugwi hwn kha, bacha di kwtal Habugra chongwi di.(1 Samuel 16:1).

David, “Kaitor ni mokol ni rangjak”a joran ni joto ni slai borok kaham kwplai kotor. Isreal dophani laibumao joto ni slai kaham kwplai Phola bo tai mang borom.

O Bijab o chwng David no nugo bo wng kha mera lakhua sikla, rwchabnai kwrwng, sengkwrak kotor tai Habugra ni bwchamari.Bo Lobmung bijab swilang nai bo.Tai bo kharwi huijak phlai mang ma tongo.Bo wng kha uaitham chongjak kha tai bugrarok ni Bugra achai nani nukhung ni nokphang.

David, Jesse ni bwsla tai Ruth bai Boaz ni busuk, Bethlehemo achaio.Khorokchar takhuk song ni bisingo joto ni slai takhuk kusu .David je phuru omor nokha bisichichar aphuru no Kaitor Samuel no Habugra chong di hwnwi dakhi kha, Raja Saul ni iagulo.Bo chwrai phuru buphani merarok no mwrwk nai. David wng kha bwkha kotor, chwrai phuru mera uathar na phai nai geguma masa buthar mano chwng nuk kha.Bo mera mwrwk nai lakhua kaham.

Bo wng kha bwtwng tamnai kwrwng, David ni a mung kotor kokno Raja Saul khwna kha.Saul ni bwkha belai kheno hamlia abo ni bagwi David no ring na nang kha, bini tam mano khwna rwnani. Swngcharo omo hai khe kiching kuma hamjak lai mani tai kebo kwrwi, David bai Jonathaon Saul ni bwsla hamajak lai mani hai khe.

Je phuru David choba kotor choba khlai mani iagulo, Raja Saul bono jolijaksuk kha, abo ni bagwi David no bwtharna nai kha.Raja Saul uaiba jora David no bwthar nai nai kha (1 Samuel 19:10, 15, 20, 21, 23, 14,). Haiphano BUGRA Kaitor David no katirwi mwthang nanrwk kha. Kaitor se chini bwkhak hwn khe chwng no sabo kebengwi manb nai (Rum 8:31)? David joto khem ni katirwi tonjak kha. David tamo hwnwi sakha, khuktang di Lobmung 59 taibo khuktang di Lobmung 37.

O jora wng kha a sikla David ni swrwng nani jora, Bo habugra khlai chongjak kha.Abo ni bagwi no bini khem phai mani saiman khe kati tong na bagwi Samunel ni aro thangwi tongwi thai. Abo wng kha bini rwngswrwng na jora tong mani. Kaitor bono rajsingson no achuk rwna bagwi tiar khe jugali tong mani. Bo borok rok no bahai khe twidul nai abo no swrwng mani,tai sak sakno bo bahai khe twi dulnani abo bo swrwng thai . Bo bwkha kotor khe sak sak no phiogwi tong nani jora. Bo swrwng kha  a phwrwng jakma jora ni salo. Kaitor no se bwkha berasugwi tong nani, borok ni thani wngia. Bo Kaitor ni jora no mang nasingwi tongo.

Bo chaiarok khlaima kwrwi phano kharwi ma tong kha, chaia khlai nai borok hai khe. Tamo ni hwn ba Raja Saul bono jolijagwi tong ma bagwi, man khe bwtharjak nai. Omo hai jwngjal dukhu ni bising twi no David torkha lok kha. Raja Saul bai naslegwi tong phano bini8 bwkhao jolima phai lia, Bo a naslejak tong mano hamjak ma bai suphungwi rwkha/.

A jora bo choba khlai na bagwi kaham khe choba khlai na swrwng kha. Bo a dopha kotor ni okra wng na nango.Abo ni bagwi bono Kaitor rwngsawrwng rwi phwrwng mani, ulo samung kaham khe khlai man na bagwi.

NORJAGWI TONGNAISA HABUGRA WNG KHA

David paithago khartw twi sak kati ma tong kha. A jora Samuel thwi paikha. David uainwi jora man kha Saul no bwthar nani, haiphano bo bono bwthar lia, kwthang narwk kha. Bo saimano Saul bono salsa ia salsa bwthar nai.Bo Philistines song ni aro thangwi sak kati tongwi kha.                         Lobmung 56 no aro tong phuru no swilango. Ulo Saul bai bwsla song bwtharjak mani iagulo se bo makhar mani thango.

Paithakni berem mwthak kha mwnakma kuplung khe.Omo wng kha omo hai jora ni kokno sao, kirimasingcha khe sak chen mani kokno.Saul choba khlai tong phuru no thwi kha,bo sakno, sakno ma bwthar kha. Sikla jora khlai man ma bai abo no paisugwi khlai kha hwnwi mania, borok chakra wngwi thwilang mani jorao.Borok khoroksa Kaitor bai tongsugwi tong na nango. Saul Kaitor ni kok khwnasugwi tong ia, khwna twi khwnaia twi khe tongo( 1 Samuel 15). Bini sak kwsa hwn khe kungchuk mani tai buino naslemani.

                                                                               BWKHAK 10

                                                               II Samuel Jisu no hwno, Chini Habugra.

    Jisu Khristo no chini Bugra hwnwi twi tong nani kok simi wngia tamo khe bono bini achukthaio ma tonthai.

Bijab I Samung wng kha Borok bai chongjak habugra Saul mechen -jagwi chen mani kok no twi swijak.Tamo II Samuel bijab wngkha Kaitor David no habugra khalai chong mani kok tai Davik ni nukhung no chengsai rwmani. Bini nukhung ni bising twi swngcharno mwthang nai Masia Jisu Khristo phai nani.Jisu tai uaisa phai phuru khe bo chwngsacha khe David ni singason achuk phai nai.(Jisaia 9:7;Luk 1:32)

Bijab II Samuel wng kha David habugra chama ni kok bai kuplung (II Samuel 5:3). Oro bebak kpothoma swijak bai iakho, I Samuel ni simi chengwi I Habugra,I Bosong jora khe komor nani lama thang mani kok swijak.Omo khe tai khaksa bwkha thang mani kok akonrok no sao.

Oro ni bijab rok ni kok rokno muitu khe tong nani belai kheno kwlaisa,tamo ni hwn ba omo wng kha borok ni biography ni kok mang se.Tabuk David ni naharmung no naharwi samung tang mani.Bo bini sak baithang no khlai na phai mani.Tho I Samuel 1:16 bai cheng lai anw.

DAVID JUGALI GRAMANI

Omo wng kha David ni amjokjak mani sal:

1. David Mera mwrwgwi tong phuru ringjak mani I Samuel 16:11-13.

2. David Goliatha no mechenwi kwplai wng mani I Samuel 17.

3. David Habugra Saul bai Satokjak mani I Samuel 18, paithak jora.

Isreal dopha Habugra nangjak mani. Kaitor bohrok no habugra rwkha, bohrok chajak ma borok Saul no. Tamo khe bo bohrok no habugra rwkha Kaitor chajakma borok, bini bwkha ni borok David no.

Omo rok wng kha II Samuel bijabo sama ni kothairok:

1. David Judah ni habugra snamjak mani II Samuel 1-4.

2. David Isreal ni habugra snamjak mani II Samuel 5-24.

Kaitor chong mano iachak nairok hamchajak tai kubui Bugra no bwkhao ton nairok.Omo hai bwkha no lelamung thai.

Omo hai langma no banchithai thai, Nwng isareal rok no twidul kha, Bugra nono hai hwnwi sakha, nwng ani Isreal borok rokni mwrwk nai tai nwng bohrok ni bubagra wng nai ( II Samuel 5:2).

Omo hai langma no nai charwjak nai langma, Nwng ani Isreal borokrok no mwrwk nai (II Samuel 5:2; Tai Lobmung 23:1-2).

Omo hai langma wng kha kwplai langma, Khristo ni kwplai wngma bai, Nwng bohrok ni bubagra nwng nai,(II Samuel 5:2).

Jisu hai hwnwi sakha, Ani logi phai di, nwng bini kok khwnai tong khe,Bo nono bini kotoba kaiwi ton nai.Bo mwrwgwi tong nai tai nwng kwplai wng se wngnai!

II Samuel 7:18-22; 8:14-15 no khuktang khe,David no chwng aro nugo bo sak belai khe no kaham. Bo a jora hamchai tong phuru.Bo Kaitor ni thani sak berasugwi tong ma bai, omo hai jora kaham bo man kha, bo kaham khe no tong langsugwi man kha.

David wng kha Kaitor bai bwkha rwi chongjak borok- Bo sakno kotor hwnwi tong mani bagwi kubui wng ma ni wngia tamo khe kaitor ni thani sak ni kebel tongma rok no Kaitor ni thani gosi tongma bagwi se.Bo Kaitor ni thani sakno berasugwi tono. Chwng sumsok khlai khe tamo khlai na nang, omo no Kaitor tamo sakha naidi, 1 Johon 1:9.

Mera mwrwk nai lakhua David ni kothaoma no chwng man0 ,1 Samuel 16 -17 beremo.Tai bono chwng dorbar nogo mano, 1 Samuel 18-20; paithago kharwi ma tong mani kothoma hwn khe, 1 Samuel 21-31.

Kaitor ni kok elembago tai kebono nukia aswk sikwrwng David hai khe, Bo wng kha David,mera mwrwknai lakhua chwrai, dorbar nogo tammung kwrwng,phan gwnang sengkwrak, kubui kiching kaham,bui bai norjak sengkwrak, habugra, sengkwrak kwplai,hamjak nai pha,kok- lob swikwrwng, sumsok gwnangsa, bwkha baijak chakra borok, tamo khe Kaitor bai hamjak lai tong nai borok. Bo wng kha Baibel ni Robin Hood. Chwng belai khe khatungwi khuktango bini bwkha kotor khe choba khlai mano.Mwsa Gong bai solai bwthang mani,tai a borok kotor kuchuk Golieth.

Bo wng kha omo hai borok belai uanamasingcha,bini phan bini tomung belai no uanamasingcha.Nwng o bijab no khuktang khe omorok no man nai:

·         Bwkhaberjak

·         Borok kwchang thotok

·         Bwkha kolok

·         Bwkha kotor

·         Bwkha kaham

·         Poito chajak nai borok

·         Khanangjak borok

Saul bao David no sui nai thai tongo, bohrok ni tomung chamung no, tamo ni hwn ba bohrok khoroknwi no Isreal dopah ni habugra tong mani. Khorok nwnwi no jora kolok khe Isreal dophano naikini khlai lang kha, nokha bisi bwrwichi jora.

Bohorok khoroknwi no borokrok bai khaphurjak baio,tai kaitor bai kokrwjak bohrok no chubachu rwna hwnwi, chubajak. Tamo khe Saul chasuk rwi man lia bini langmao, bumuk chalia, David wng kha langmao bo je khlai mani joto no pat pat chai thang bai kha.Chasukjak borok.

Isreal dopha ni laibumao Saul ni bumung wng kha khain gwnang. Tamo khe David ni mung wng kha joto bai no borom khlaijagp, Jihudi tai buini borok rok bai.

Bohrok kwnwi tamo o pherlai ma kwlai? Omo no chwng naitugwi tikhlai na nango, omo hai no chini langmao wngwi mano. Omorok chwng no sopereui tlang mano, kahamo phano tlang mano tai hamiao phano tlang mano.

 Saul kaham khe no Sinai hai khe chengsa gramani, swrapsa belai kaham khe khlai kha, Abo ni bagwi no sak sak kung chukjak kha.(Khuktang di Phwrwngmung 16:18). Nokha bisithamchi bo raja chai tong phuru belai khe chaia hamia bang kha, kirimasingcha.Bo Kaitor no romwi tong lia. Ulo bo sak no ma bwthar kha choba kholao. Arirok bai Choba paia sini swkang no bo ha iakwrwi ma thang kha.Hani borokrok bui ni thani khorok ma bomkha. (1 Samuel 31).

Paithak ni berem no kaham khe ma nailai gra nai, omo bahai wng khamun. David, Saul no bwthar iaui mwthang mani ulo no (1 Samuel 26) Bo sai man kha bini langmao khem phai sinai.Aphur bo kaisa samung chaia khlai kha, Philistines song bai thangwi kwthai mani, BUGRA Kaitor no bwkha rwia karwi,(1 Samuel 27). Abo ni bagwi paithago bini langma ni tomung chwng nugo, kirimasingcha wng kha Saul ni langmao ((1 Samuel 28-31). Saul thwima sai mwnwi David bwkha khamjak kha,aro no naidi bini tomung no bo bwswk khe borok kaham. Tabuk lama swrai swrai wng kha David ni bagwi, Kaitor ni muchung mano samungo phwnang nani.Isreal Dophani Habugra wng nani.

I SAMUEL BAI II SAMUEL NO NAIDI

Tabuk II Samuel chwng no phuk kha, Aro kuno pherlai mani kwrwi I Samuel bijab bai II Samuel bijabo. Iaphango omo bijab kangsa no tong mani.O bijab Samuel ni langma ni simi chengwi David aro thangwi paiwio. Tamo khe II Samuel bijab wng kha David ni kothoma no twi mang sajago.

Aro aswk kaham khe sajak kwrwi II Samuel 2 o David Judah  hao raja chama ni.Tamo khe 1 Bosong 11 bai 12 o sajak tongo aro ni borokrok David ni thani phai laiwi bono Bugra chong lamani.Kwthalaiwi thansa khe ha kaisa ni borok wnglai mani. Saul borok bai chongjago tai David khe Kaitor bai chongjago.

Gilboa o wng mani ulo, Saul, Habugra tai bikiching Jonathan oro no thwio, David kaisa bwkhao muchung ma phaijak kha,aro tamo khlai man.Abo ni bagwi David Kaitor no swng kha. (II Samuel 2:1). Bo Habugra hwnwi swng mani wngia,tamo khe bo aro thangwi da man hwnwi se swngo.Jihudi dopha khoroksa okra borok nangjagwi tong mani jora,a jora  Bugra Kaitor ni khorang bai sakhlaijak kha,Bo Hebron no thang nase nango (bt 3).

Hebron wng kha khungsa kwcham kamiung tong mani (Lekhamung 13:22). O kami Abraham tonglang phuru tor rwjak kha. Canaan hano segwi namani ulo, ha baglai phuru Hebron kami no Caleb man kha.A kami wng kha sak kati tongjak nai kami.( Joshua 14:13-15;21:11-13). David puila habugra wng phuru aro nokha biusisni aro tong lang kha.Omo tabuk bo belai nangkuk mani kamiung.Omo Jerusalem ni salgra bwkha bachi mail chalo.Omo Juda ni kwchar ha tai belai phan kwrak thai.Omo tabuk ha kwtal ni rajakhor wng khe kaham.Tamo ni hwn ba khaksa bwkha ari Philistines song tai khaksa bwkha hwn khe Saul ni borok rok David ni ari.

Saul no bwtharwi man na tong phuru, David ni iak gana no aphuru Saul tong mani, bo bwtharwi pai man kha mun.Bo Kaitor ni jora no se nasing tongo, bo a jora kaham no nai man khamun.(I Samuel 26). David wng kha hamchama jora.David ni rwngswrwngma paikha. Borok hamchama jora soitan borok no hao khiklai rwi mano. Soitan David no hao khiklai rw. Tabuk David omo hai jora twi lai tong mani jora, bini langmao mwnakma, hamsukia ni jora.A jora wng kha nokha bisisa kwchar (I Samuel 27:1). David wng kha phola ni hathai sakani tola kwlai thang kha, tai mwnak ma harungo kwlwgwi thang kha.Aro ni bo bachai manlia.Bwkha baijak kebel bachana ni phan kwrwi kha, jora kolok romwi kwlai tong kha. Hai twtwi no bo Kaitor ni thani bwkha kiphil kha. Aphuru Kaitor bono bachai kwplai wng nani phan rwkha, ari no mechen kha.Jephuru bo Kaitor no twidulna bagwi koikha, Kaitor bono Hebron no tlang thang kha. Aro bono tlangwi Habugra snamwi kha.

David ni poito belwi thang kha.Kaitor no swngia karwi bo Kaitor ni borokrok no iakarwi thang kha,tai arirok ni hao tongwi kha.Saul ni iak ni kati tong na bagwi, bwkha baijaksugwi khar lang mani.Gath ni habugra Achish bai thangwi kwthai kha,bo bono Ziklago tong na thai rwkha          (I Samuel 27:1-7)

David aro tatal kok sakha, Achish ni bwkha paina bagwi,bo judah ni borokrok no iaksugwi phaikha.Aphur David derasuk kha.Paithago bo BUGRA Kaitor ni thani kachigwi phai kha, Bo sak no bwkha kiphilwi BUGRA Kaitor ni thani rwktharwi phai kha (I Samuel 30:6). Bo tabuk tamo khlai nai Kaitor no swng kha.Kaitor bo surisan mano khwnai bono twidul phai kha,  bo kwplai wng kha (I Samuel 30).

Tabuk naidi,Saul ni langma bai David ni langma khoroknwi no tomung  chamung kaisa hai,Saul wng kha bwkha kiphil ia sumgwnang borok.Sak no bwthar kha, nukhung swkwma kha,bini logi hano bo kochok rwi kwlang kha(I Samuel 31: 3-7) David hwn khe bwkha kiphiljak sumsok gwnang borok,Ari rokni iakni kwplai wngwi bachanai borok.bini logi kwbangma borokrok no mwthangjak bai kha.(I Samuel 31:17-20). Chwng joto no sumsok gwnang borok.chwng chini langma no nada nang, omo salsa painai?

 Saul bai Jonathan thwimani bagwi David bwkha khamjak mano, khuktang di II Samuel 1:17-27.

Saul bahai khe thwi kha? (I Samuel 31:4). Tamo wngwi sak bwthar mani chaia? Sabo sakno butharna bagwi chukili swk? Saul bai sabo a choba butharjak kha? (I Samuel 31:2). Bohrok thwimano khwnaui David bahai ma tong kha? Tabuk phano David Ziklag no tong kho, arirok ni hao.David Kaitor no swng kha bo tabuk tamo khlai nai.Tabuk no da bo Habugra wngwi Sinai (II Samuel 2:1). Bo Kaitor samano khwna kha, Hebron kiphil lang kha, aro bono Judah song habugra chong lai kha. O kothairok no swrwng na khlai di II Samuel 2:9; 4:12.Aswk jwngjal pati tong phano David iak tisa lia isreal hano segna ni. Je chajakia wngwi tong nairok bohrok sak sakno belwi thang kha, abo ni bagwi bo phan kwrwk wngwi bacha kha. Judah o Raja chamani nokha bisisni kwchar ni ulo David Isrealni bo Habugra snamjak kha.

Tamo wngwi chwng uansuklai David Habugra wng khe hamcha nai? Saul bo sak uansuk twi tongo, tamo khe David khe Kaitor ni muchung twi tongo. Abo ni bagwi Kaitor bono hai hwnwi ringo, Ani bwkha ni borok. Oro naidi Saul thwimani ulo phano David Isreal hano segwina nani nailia.Judah song bono Habugra snam mani, nokha bisisni khaksa ulo se Isreal bono Habugra hwnwi gosi nalaio.David saimano Isreal hao bini wng nai hwnwi,omo no Kaitor ni muchungma, hai phano bo jorano nasingwi tong kha,

Baksa borok poja bokjamano twi toro,bui baksa khe torjago.O tomung no chwng Saul ni thani swrwngjak nai tongo.BUGRA Kaitor ni thani sak no iapharwi rwkhe se man nai, kubui khe hamchasukna hwn khe.

DAVID, HAMCHA KHA – PHAN GNANG TAI RAIDA (II Samuel 1-10)

Bijab no phil khe aro chwng nugo, David Amalekites song no mechenwi kwplai wngwi Ziklag kiphil phai mani kok akonrok. David sak lengjagwi phai phano, Pholao khe belai khatungjak, tamo ni hwn ba kwplai kotor wng ma bagwi. Kuno uanajak nai kwrwi a chobani ulo tamo wng no, Gilboa o choba kotor khlai phai mani. Bini bwkhani bikiching Jonathan bai Habugra Saul tabuk choba kholao choba khlai tongo.

David aswk sal kolok romwi bathak tong na nang lia. Amalekites song tai aswk hachal wnglia Isreal rok ni batham ni, David no sana bwgwi khoroksa borok khachigwi saphai kha bohrok ni khem phai tong mani kokno. A kok saphai nai belai khe kok snamwi saphai kha,a borok no David kaham khe swprak kha (khuktang di II Samuel 1:1-16).

Tabuk David ni omor wng kha nokha bisi thamchi (II Samuel 5:4). A omor ni borok eba jesa omro ni borok phano omo hai khlai glak. Bo aswk bwkha kaham Saul bini bagwi je samung kaham khlai mani abo no poklia.Tamo khe bo muitu manjak kha Saul bini bagwi je samung khlai langma akon rokno. Tai muitu khlai naidi Saul, David ni bagwi samung hamia chaia khlai ma akonrok no.

Omo bwswk khe uansuk ma kaham David ni, hamia chaia no nakar mani.Tai Kroso nai di, Khristo no kroso bwtharwi tong phuru bini Phola, bohrok ni bagwi nakar san mani (Luk 23:34).Borok rok holong bai stiphan no butharwi tong phuru (Samung 7:60). David tangja rwchabmung swikha,abo no “Badukhung smai ni rwchabmung”. Aro bini bwkha kuphur kaham bai kuplung bini hamjak mani kiching ni kokno twiwi. (II Samuel 1:19-27).

Habugra Saul thwi mani ulo bo David ni birma pailang lia. Bo Achish bai thangwi kwthai kha.Bo dophano phemlok nairok ni thani thang kha, kwthai kha bohrok bai choba khlaia karwi.

Bini sak ni dopha Judah song bai bohrok wng kha ari kotor.Bohrok kwthalai mania. Bohrok sai mano Saul bono bwswk khe satok kha tai bwthar na nai kha. Abo ni bagwi David sakno Achish bai thangwi ma kwthai kha, bohrok ni hao huijagwi ma tongwi kha.

 David Kaitor ni thani kok biti nai kha, bo buro tongwi hano naikini khlai nai.BUGRA Kaitor bono Hebron tongwi khlai di hwnwi sakha. Judah ni borok rok bono ring phai iasak bo a kamiungo thang lia.Tai Judah song bono Habugra hwnwi chong phai ia sak. David no omo smai tangwi kok rwmani wngia, tamo khe Judah wng kha Raja ni bongso. Abo rok wng kha borok kwbangma bai gosi naui chongjak mani.

David ni samung wng kha twrwk twrwk bwkha baithotok. Tamo khe David belai khe Kaitor no poito khlai tongo.Bo belai bwkha kolok, Kaitor ni jora no nasing tongo, Kaitor bai twiduljak na muchungjago. Bo wng kha belai khe koinene borok, Kaitor ni thani tai borok rok ni thani bo. Bo kwplai wngwi tong phuru phano koinene khe tongo.Sumsok khlai ma tong khe dakti no bwkha kiphilwi phaio, BUGRA Kaitor ni thani. David wng kha borok naikol nai.Kaitor bono je samung khlaina phan rwmani, Kaitor ni chwngsacha ni bagwi no khlaio.Borok rok no kaham khe naiwi tono Kaitor muchung twi khe. David Isreal dopha no kuchuk khe chwngsacha khlai kha.Tai bo Isreal hano kotor khlai kha, ha ari wng kha Meditarian simi Euphrates jora choba khlai segwi nakha. Bo dopha no kotor kuchuk tomung chamung khlai tisa kha.Abo rok wng kha,Phan gwnang dopha,Rang gwnang dopha, Borom gwnang dopha,tai rwchabmung musub bai kuolung khlai tisa kha.Abo rokni slai taibo kotor khlai Khla tisa kha BUGRA Kaitor no borom rwi phunuk kha.

Chwng David khlai lang mano swrwng lai glak diba? Bo kubui bai cheng kha Kaitor bai cheng kha. Bo je khlaina cheng mani bebak Kaitor ni thani iapharwi no khlai lang kha.(Lobmung 37:5). Kaitor kwplai abo no David poklang ia . Bo sumsok khlai kha hwn khe bwkha khamwi Kaitor ni thani khorok bomwi kiphilwi phaio.Aphur Kaitor bini sumsok no nakarwi rwo.

Judah ni borokrok David bai malai na phai narok wng kha, dopha ni okra chakrarok se phaio, Bini sak ni dopha ni borok. Bohrok bono Habugra chongna se phai laio. Bo Samuel bai sak sakno chongjagwi paijak,Kaitor bai chongwi paijak.Tabuk omo hai khe dopha bai chongjak phina nang phiro, luku bwskango chongjak phina ni.Lukurok sai man baina nango, bo raja chamano.

Saul boo mo hai khe sak sak habugra chongjak kha.(I Samuel 10:1). Khorok thok lukhlai chong mani wng kha Kaitor bai chongjak mani. Saul bo abo hai khe no swkagwi habugra samung ni bagwi chongjak kha.Bono luku naikini khlai na bagwi samung iapharjak kha.

Haiphano David Habugra khlai chongjak mani lukurok joto sai man baima kwrwi.Abner, Saul ni sengkwrak bokhorok Saul ni bwslano Habugra khlai chong nani nai kha, Buphani achuk thaio.

David kaphrai naisuk kha Isreal dophano thansa khe ton nani tai bono Habugra hwnwi gosi tong nani,abo mungsa bo chuklia, khlai man lia. Saul ni tomung bwkha hamia, omo tabuk bo David ni kena ari wngwi tong kho.A tongmung tabuk bo Abner ni bising twi nukjagwi tong kho.Bo Isreal dophani hano thumwi ton na nai mani Saul ni nukhung ni borok ni bising twi. David no iakarwi (II Samuel 2:8-10).

Borok rok Jehovah no kok thaisa phano swng lai lia. Tamo khe David a berdom no nailai kha.Bono no nasiklai tong lai kha.

   Arphuru sak sak bwthar laikha, paithago Daivid ni bari  wng kha, Bo Isreal Dophani Habugra ma chakha. Isrea dopha o habugra chanairok sak sakni muchung twi tong nairok wngia (I Samuel 10:25;1 Habugra 12:3).

   Puila bini langmao, nokha bisithamchi jora bo bini manthai tong mano, iago chobwi nabai kha.O samung no Kaitor bono khlai nadi hwnwi dagi mani. Bo nokha bisibwrwichi habugra chaka, Hebron no nokha bisisni kwchar no khobwi, Judah hao habugra chama bai, tai Jerusalemo hwn khe nokha bisichitham tham. Bebak Isreal hano khobwi. Jerusalem tabuk bo Jebisites song ni iago, David Habugra wng mani logi logi no abo no segwi nai paikha (II Samuel 5:6-10).

  David Habugra wng mani kaisa belai nangkuk mani wng kha Isreal dopha thansa khe thumjak kha.Bo dopha ni bokhorok wng ma bai. Bo aswk kok banglai tong mano thansa khe kok baksa khlai kha.Chwng oro nugo a sikla borok thansa khlai mani, Kaitor ni thani thansa. Hibru dopha ni borokrok sikla leader ni kok khwnai tong thai,hake bohrok torma ni slai taibo torkuk nai.Tai David ni bwsla ni kok khwnai ma tong thai , hake chwngsacha ni slai taibo chwngsacha wng nai.

David, Bugra Kaitor no bwkha bai poito khlaisugwi tongo tai bo bini sak uansugwi tong ma simi tong ia. Bo bini lamao Kaitor no logi twi samung khlaio,abo ni bagwi Kaitor bono twidulwi twio(Phwrwngmung 3:6).David bahai khe Kaitor twiduljak ? Kaitor no surisanwi,Kaitor bahai khe bo surisan mano khwna  a kok swikwlangjak kwrwi,salangma bo kwrwi.Kaitor chwng kok rwi kok khai kwlangjak, chwng bono mungsa swk san khe Bo abo no rwnai (Johon 5:14-15;Jeremia 33:3). Kaitor bo kok rwmano kok swbai man ia. Abo ni bagwi chwng uansugwi ma naithai jorabrum brum chini langma no twi wi. Chwng Khristo no swrwngwi tong mano, swrwng phlai tong nai da? Chwng chaia iapri senai da eba kaham samungo iapri senai.Bugra kaitor chwng no mungsa chongwi khlai rwkhe, chwng chaia wngwi da kwlai thang no?

Saul ni nukhung bai David ni nukhung jora kolok jora romwi choba khlai lai ma tong kha.Tamo khe David ni nukhung khe phan kwrwk ni slai taibo se phan kwrwk wngwi phai sio,tai Saul ni nukhung khe belmani slai taibo se bel langsio. (II Samuel 2 – 3). Saul ni nukhung ma bela mani hwn khe, bini nukhung no Kaitor chajak ia.

Nokha bisisni kwchar Raja chai tong phuru David no chajaia borok kwbangma tong mani, ulo bo borokrok ni bwkha no paikha,tamo ni hwn ba bini  bujthumani kaham tai bo wng kha bwkha kaham borok.Tabuk tai bono chajakia wng nai kwrwi kha.Joto dopha ni adong song Hebron no  phai bai kha, bono Habugra khlai chong nani,Dopha kotor ni Habugra .(II Samuel 5).

Hebron no David no khorok thok lulwi Habugra chong mani logi logi no chwng bo bai baksa choba khola thang lai kha.

 David Puila Jerusalem no segwi nagra kha, Zion hathai ni phan kwrak hano. Joshua ni simi no Jerusalem ni borokrok Isreal dophano sitra rwsugwi phai mani.Bohrok no mecheni maia tong mani.David uansugwi nakha Jerusalem no rajakhor khlai man khe hamsuk nai. Ulo abo David ni tongthai wng kha, tai a hani rajakhor bo snamjak kha.

Kaitor ni kok twi uansugwi naikhe, tamo ni bagwi Jerusalem aswk nangkuk mani thai wng kha? Bahai khe Jerusalem Kaitor ni bwsarok no iapharsugwi rwjak kha,a kok akonrokno swi khatijak tongo,II Samuel 5:6-9; I Bosong 11:4-8.

David Jerusalem no rajakhor khlai mani ulo, Kaitor ni kerong swndwk no bini rajakhoro tubuna hwnwi bwkha chongwi nakha. Bo sai man kha bini borokrok Kaitor no nangjak mani kokno. Chwng sai man ia aphuru bo Kaitor no swngda swng kha swng ia. Aphuru aro dukhu man bai kha.Tamo abo ? (II Samuel 6:1-19).Nwng tamo sai mano kerong swndak no tai Kaitor tamo no phunuk lang?

Chwng tamo uansugwi tong abo wng ia,tamo  khe Kaitor tamo sai khlai di hwn  abo se belai nangmani. Uzzah borok wngwi uansuk kha, a swndwk no romwi narwk kha kwlai thang mano, bini bwkha kwthar,tamo khe abo Kaitor satwi wnglia, omo Kaitor ni muchung twi khlaijak lia.Bo aro no thwi thang kha.Chwng sai mansugo, Kaitor tamo sana nai,chwng bini kok kwthang no swrwngwi tong na nango.Bo smai tanglang mani kok no  bwkha bwthar sugwi tongna nango (Johon 7:7)

David bu samung kotor khlai kha, bini borok rok ni bagwi?

Bo Jerusalem no iago chobwi nakha,abo no tor rwkha phan gwnang khe tisa kha,Philistines song no mechen kha,tai borokrok no thansa khe thumwi ton bai kha.A samungrok aswk nang mani wngia,Kaitor no logi twi tong ia hwn khe.Kaitor no logi twi khe khe dopha kwrwk kotor phan gwnang wngo .Dopha phano sak sak phano kotor wngwi man ia Khristo  logi kwrwi hwn khe.

David raja chai tong phuru je wngma rok, abo Jerusalem no iago chob ma bai no saklaijakma kwlai kha. David phan gwnang wngrw rwk wng kha,tamo ni hwn ba phan gwnang BUGRA se bo bai tongo (I Bosong 11:9). Kaitor David no jugali sugwi ton kha bono Habugra snam nani.Rwngswng male beli khe kuthuk.Sikla jora a pojano twina swrwng mani belai kaham.Borok kotor rok a kokno salango. Jerusalem o  tong phai mani ulo David puila uansugwi khlai na naima khe, a kerong swndwk no tubu grana ni. Bo Zion Hathaio abo no tubuna nai mani, tubui man lia,tamo ni ba a naharna thang nairok Kaitor no borom rwlia. Ulo nokha taltham ni iagulo se rinitambu nokthar tangjak sio (A kothoma no khuktang di II Samuel 6).

David wng kha borok kwsrang.Bo samung tangnai borok, selerma kwrwi.Bui bai choba khlai mani tabuk le thak kha.Tabuk bo naikha bahai khe bini hano naithok kaham khlai tisa nai.Bo tongma nok bai Kaitor ni nokthar no sui nai kha, bole jolma jola nogo tongo, Jehovah tong ma nokthar le rini tambu nok se. Bo omo hai khe Jehovah no juda khai ton na muchungjak lia.David diari Nathan no ringkha, kok biti kholai  kha,    bahai khe Jehovah ni nokthar no tang lai nai.Kaitor ni muchungma khe David khlai gra thung, hai phano Kaitor ni tai thaisa uansuk ma tongo David no twiwi. (Khuktangwi naidi Kaitor Nathano tamo sakha David no sana bagwi (II Samuel 7:4-17). David oro Kaitor ni muchung twi bini phola no iaphar mani chwng nugo. Kaitor bono nok tangna bagwi nang mani manwi khwnwi aji jugalirwkha, bwsla a manwi bai nokthar tang man na bagwi.

Kaitor ni seleng rok kha thwi thang ia, jephuru bohrok muchungwi chong mani samung rok khlai mania phano.Kubui BUGRA Kaitor ni seleng hwn khe Kaitor ni muchungma tamo, abo no kaham khe sina naio.Tai bini BUGRA ni kok khwnai tongo!

O kothoma no karwi tathang di iakung iak mani chwrai khorok sa no David hamia nai mani, bini kiching ni bwsla, bo wng kha Mephibosheth (II Samuel 9).

David wng kha phan gwnang choba khlai nai kwrwng, joto choba no bo khlai mano.Haiphano bo wng kha kwchang kwchang khe tongna nai nai borok.Beremchio kaisa bejua wng kha, David phan gwnang wng wi phai mani kothoma paithak.Tai paithang na bagwi jugali mani kwlai kha, bo chen nai tai kwmasugwi thang nai.

David raja chamani bagwi kaisa kotor mari nuk kha Isreal dophao.A jora no rangchak ni jora hwnjago, Isreal dophani.Aro tai hamia bolong kwrwi,takjak mwtai no  khulum nai bo kwrwi kha,tai swngchar ni tomung no twi nai bo kwrwi kha.Aphuru Isreal dopha rwchabmung kwtwi chwchab nai ,Bethlehem ni mera mwrwknai lakhua kaham se tongsio.Bo a hachingkhung twi bania khlaio dopha ni bagwi ajio ,abo Nile twma ni simi Tigris twma ntai Euphrates jora bini bania khola.A jora Isreal dopha ni hamchama ni jora.Isreal dopha Kaitor bai kaham khe kwthai kok khwnai tong khe,bini khem phai phuru Kaitor nukjak iaui  bini  ni logi tongo.

DAVID GURUM KWLAI KHA (II Samuel 11-20)

   David ni langma berem II ni swkang pai khe belai hamkhamun. Bohrok ni rangchak ni jora pai thang kha.Tamo tong rwkh kha hwn male sumsok sitra se tong rwk sio, satokjak nani se tong rwk sio. Joto Kaitor ni kokthai rogo omo ni slai berem dukhu kosto tai Kaitor ni bwsarok no hus khe rwjak mani kwrwi. Omo wng kha David sumsogo kwlai mani kokno sao.Omo sal grohon nangma hai se wng sio. Bo sumsok khlai ma wng kha chuta uaijamani tai borok bwthar mani , omo hai sumsok kotor tai kwrwi.Bo borok hamia sitra wngsuk kha.Kaitor bono nakar kha, tamo khe Kaitor ni kogo sajak tongo, “Chopba ni seng bini nukhungo kaglia.”Bo maichwlwi sartwi khe no mabo ma rakha.Chwng nukh kha bini nukhungo chaia wngmarok tai dopha birman man mani.

David tola kwlwk mano chwng nukh kha, bini iapri semani belai chaia, dopha tola kwlwk Sinai.

  Puila,Bo seler wng kha,(II Samuel 11:1-2). O jora wng kha choba khlai nani jora, tamo khe bo choba khola o kwrwi, thang lia.Bo Jerusalemo tong rwkha, belokjak kha. Sarigo thuma bachai nok ni nukhung saka kasai himgrungwi tongwi kha.Bo selerduru khe samung kwrwi hai khe belokjagwi tong kha. Bethsheba bwrwi naithok no nuhur kha,a bwrwi tukui tong mani, bo bono man na muchung kha. Bini puila sumsok  bo nuk kha. Hamia no ta nasik di.Kaitor no suirisan di nini mokol no twidul ton nani.Nini bwkhao sumsok no achukthai ta rwdi.David belokjak phuru khar kha hwn khe,bo bini langma no mwthangwi man khamun, swngchar ni dukhu man glak kha mun, Kirimasingcha sumsogo kwlai glak khamun. Aroni khar ia kwrwi bo a sumsogo se tongthok tong sio.

David borok rohorwi a bwrwi sabo, nairw horkha (II Samuel 11:3).A bwrwi sabo nai rwhorwi, a bwrwi nakha,(bt 4).David a bwrwi no bini nogo tubui phaikha. Bo pogwi thang kha aswk kok khwna nai bini sengkwrwk ni bihik hwnwi.

Tai kaisa samung se belai khe chaia khlai kha – Uriah no kena nangwi sumsok khlai kha. Uriah wng kha bwkha kotor choba khlai na kwrwng. David bo bai kena nangjak anw hwnwi bo bai iak kakna nai kha.David Joab no sumsuk khlai thani logi twi kha, bono bwthar rwkha.

O sumsok se taibo kotor sumsok, tamo ni hwn ba dopha ni adong okra se a samung hamia khlai sio. Abo no kaisa mari Kaitor bono chajak mani. Bo sikla lia chakra wng kha sikha nukha borok sikwrwng.Bini langmao kwbangma tomung chamung manjak, khlai phaijak. A aswk samung kaham ni bagwi bo sokat se man na tong mani, Bwtharjak nani kok wngia.

Nwng tamo uansuk tamo wngwi Baibelo kothoma no swi phunukjak khwna? Omo kaisa chini langma kologo tongna chana no phunugwi samani. Chwng bo omo hai langma kologo rojong usta khui mano. Hus kwrwi ta wng di iaksi iagra nasik tong nani, tai suri sanwi tongna ni.Delila ni maia bai bini khuri muktrwi thangjak. Sumsok bai butua ta snamjak di, uansugwi phano ta naidi.Nini bagwi lama kotor khe phiokjak phano mano, sumsok khumpai erthani. Hor mwswng na bagwi horkhok ni bwchwlwi kongsa se nango, bebak horkhok ni bwchwlwi nang ia. Hokhok ni bwchwlwi kongsano hor chasarwi mano!

SUMSOK SATOKJAK KHA

  Bisi kisa ni ulo diari Nathan David ni thani berai na phai kha,tai bini sumsok ni bagwi bono hwn phai kha.David ni bwkha iokjak sukha a bisio.Chwng khuktangwi naimano David kukubui no bwkha dukhu nangjagwi kha kiphil mani (Lobmung 51). BUGRA Kaitor David no sakha bini sumsok ni bagwi bwsla ma thwi nai. Naidi tabuk David bahai khe a satokjak mano sago khiklai na kha. (II Samuel 12:13-32). A bwsa thwi mani ulo, Daivd Kaitor ni thani thangwi bono khulumwi kha.

“Thwi thang mani salai kwthang tongwi dukhuk man mani tuk kugo.” Hai hwnwi phwrwmung sao.Bwsa thwijagwi David belai khe kha khamwi dukhu man kha.David kwthang tongwi dukhu ma man ni thak lia, bo hamjakma bwsla Absalom thwi mani bagwi.A koikno chwng tabuk uansuk horwi suda man lia.A kok khwnai sikla bwsa ni tomung belai khe no chaia kaklai philai wngjak.Bo wng kha borok hamia poito swbai nai, bo buphani borok rokno chukili swk kha loi hamia ia bai.Bo auli ni duglamo achugwi tang chanai rokno hai hwnwi sakha,bo bohrok ni Raja wng khe, bohrok ni kaham nai nai. Tang chanairok khorok bomwi bono borom rwkha, hake bo bohrok ni iak romwi motom sukha.Bo bohrok no Korai malkhung bai khachingwi ton kha.Bo bohrok bai hamjak kha bohrok ni bwkha no mansuk kha.

Bo naichom nairok no rohorwi bupha ni hano sekna ni nai kha. David bini rajakhor Jerusalem seui tlang kha Absalom khe Hebron no tong rwkha. Absalom sengkwrwk bodol kotor snam kha Hebron no,tai auli bwkhak thang lai kha buphan ni hano segwina nani. Aphuru David bwsla Absalom bai choba ma rwlai kha. Ajora Absalom ni bwkhwnai kolok wng ma bai buphang bedego kwcha kha.Bolongo thangwi manjagwi kha.

Absalom wng kha borok hamia bwkha sitra.David belai khe tekto man kha Absalom ni bagwi.A jora hamia phuru no Absalom no mechenwi David kwplai wng kha.Absalom no bwtharwi ma khibi kha. (David belai bwkha khamjak kha bwsla Absalom bwtharjak mani kok no khwnai, abono khuktang di (II Samuel 18:-19:4).

DAVID NI PAITHAK SAL (II Samuel 20-24)

   Ari rokno mechenwi paimani ulo David Habugra nogo kiphgilwi phai kha. Kwtal tangphang okra chong kha tai kwtal khe samung barja bogwi rwbai kha. Chwng oro nugo Daivd sumsok khlai mani, borok lekhaui. Tamo ni hwn ba Kaitor bono borok lekha di hwnwi samani kwrwi.Abo ni bagwi saltham borok rok bemar hamia manjak bai kha.

Bo Kaitor Nokthar tangna bagwi nang mani bebak manwi khwnwi jugali bai kha.Tai bwsla Solomon no Kaitor ni Nokthar tang di hwnwi dagikha.David thwi phuru bini omor wng kha nokha bisisnichi omor ni borok.

David wng kha joto ni slai Habugra kotor tai choba khlai nai kwrwng.Bo wng kha Abraham, Moses tai Paul bai khe sujago.Bini phola ni bwkha tormani chwng nugo Lobmung bijabo.Bo swimani bijab. Tamo khe bo wng kha sumsok gwnang borok.Aswk bai no kok pai thang ia, tamo khe bo wng kha bwkha kiphiljak, Kaitor ni thani bwkha kiphlwi phai nai borok.David sumsok gosimano chwng nugo Lobmung 51, omo no khuktang di.

Bono Kaitor ni bwkha ni borok. Chwng David ni langma no sina nang nai , Lobmung bijab no sina thang khe. Chwng omo no bo sina nang nai tamo wngwi Jisu Khristo no David ni sajla hwn. (Naidi Samung 13:22-23).David wng kha lama kwchar ni borok Abraham bai Jisu Khristo ni kwcharo.David bini chaia kwbangma tongo. Bo kwbangma chaia samung khlai ma tongo, tamo ni hwn ba bo bini dophano takjak mwtarok no khulum rwkha. Bo sak sumsok khlai ma bo belai sumsok kotor.Bo Jehovah ni holong thai hai khe bachai tong kha. David sumsok khlai kha haiphano bwkha kiphilwi Kaitor ni thani kiphilwi phai phikha.Bono nakarna bagwi Kaitor no jora rwkha. Bono kwthar khlai phina ni.Bini khaphermani kokno Paul swbai sakha Rum 7 no. Bo wng kha kwthar borok, sumsok gwnang phano.

David Chaia sitra Isreal dophano, bo kaisa Rajani dopha snamwi tisai tubu kha.A dopha se bui bai khaui tlangjak bui ni hao, nokha bisirabwrwi bachi jora. David hai choba khlai nai kwrwng tai sikwrwng o hasaka kwrwi. Isreal dopha no bo Asia ni salkabai bwkhago kwplai dopha snam tisa kha.II Samuel ni paithak bwtango sao David Raja Araunah ni mai lammani khola no pai mani kokno. Aro bo haia kaisa tang kha. Omo nangkuk mani kok khe ahai se aro ulo Solomon Jerusalemo Kaitor kotor ni nokthar tang kha. A kwthar thaio tabuk thuruksa rok ni Omar Mosque bachajak tongo. Isreal dopha ni bagwi tabuk omo totra khajak hai bohrok ni a kwthar thaio, thuruksarok sekjagwi tong kha. Jihudi rok aro iapri suda kai manwi lia,a agini nothar tong mani thai o.

 Surisandi samung kotor khlai na bagwi, Samung kotor khlai na muchung nai ni phan le bo sakno Kaitor ni thani iapharma bising twi se.Nwng sabo tai nwng tamo khlai man abo kok kotor wngia tamo khe Kaitor bai nwng twijagwi da tong?

                                                BWKHAK 11     

                                             Habugrarok bai Bosong Jisuno, Habugra hwno

     Chwng Kaitor no iakar khe Kaitor bo chwng no iakar nai,Chwng Kaitor ni kok khwnai tong khe Bo chwng no hamari rwnai.A jorao BUGRA Isreal ni hano khochor rwkha (II Habugra 10:32).

Iaphango Hibru kok bai swijak bijab I Habugrarok bai II Habugrarok a  bijab kangsa tong mani. Tai I Samuel bai II Samuel bijab o kangsa no tong mani, Bosong bijab kangnwirok bo Kangsa bijab tong mani. Omorok a Hibruk kok bai swijak bijab bo kangsa mang tong bai mani.  A Hibruk kok ni Greek kogo slai phuru se kangnwi kangnwi khe swkakjago.A kok slainairok se abo rok no khago. Bijab kangsa khe abo rokno swikhe belai kolok kotor bijab wngo hwnwi. Tai se Greek kok bai kok slai phuru Hibru kok ni slai swi lai bang thango.Muikuro bodol doljak swijak tong mani Hibru kok bai abo khe belai no swilai kisa chikon.

Habugra bijab no swinai wngkhwna diari Jeremia.Puila Kaitor ni nokthar tangjak mani logi no o bijab swijago.

I Habura bai II Habugra wng Kha Samuel bijab ni bokocho swijak lang nai.A bijabrok ni mung no sai tongo, omo Solomon Habugra chamani kok akonrok tai Judah bai Isreal hani kothomarok swijak.Abo nokha bisirabwrwi bisi ni laibumani kokrok swijak tongo. Aro bohrok ni dopha tormani hamcha mani kok tai a dopha mechenwi lachima singcha ma wng mani kothomarok swijak. Aro chwng taibo nugo, a dopha kaklai kha dopha kaisa se kwnwi wngwi thang kha tai Ha baklai pailai kha. Aro taibo chwng nukh phiro a dopha kwnwi nwino buini dopha bai khaui tlang thangjak mani, seleng ma khati mani.Judah bai Isreal dopha bui ni seleng ma khati kha.Salgra bwkha ni ha wng Judah ha, bohrok habugra khorokchinwi chalang kha.Tai salsi bwkha ni ha wng kha Isrealrok ni ha, bohrok habugra wng kha khorokchichuku.

O Bijab kangnwi no Swngchai ni jotoni slai laibuma bijab kotor.Tabuk ni jora borokrok ha khurwi rutugwi a dophani laibumano rutuk phlai tongo bohrok laibuma man phlai bo tong kho. Habugra bijab o swilangjak ia tai bo kwtal kwtal kothoma manwi tongo.Nini thani omo khwnathokia phano wngwi mano, haiphano bijab ni kothoma no abo sai tongo.

1. Kaitor borok ni bwkha narwgwi kok saia (Samung 10:34).

2. Chini tongmani bebak Kaitor ni haia o berajak hwn khe,Kaitor chwng no nasing rwia (I Habugra 18:38). Omo phola ni kok twi tamo sama kwlai kha ?

3. Paithago bohrok seleng snamwi khai tlangjak mani wng kha,tamo ni hwn ba bohrok Bugra Kaitor ni kok khwnalia gwja. A kokno agi no diari saklai mani tongo (Uanswisaphima 28:49). Aro Kaitor tamo sakha hwn male, khoroksa swk borok Kaitor no pogw thang khe, bohrok ni kwplao tamo wng phai no ?

Habugra chengjak kha David Habugra chama bai, Pai thang kha Babylon ni habugra bai.

Habugra bai Nothar kwthar khe chengjak kha, tamo khe paithago a nothar sogwi khibijak kha.

David puila bini iakchu Habugra snam kha, bini hani habugra wng kha, Solomon bini achukthai o achuk kha.Paithago khe Divid ni bosong ni habugra wng kha Jehoiachin. Babylon ni habugra bai seleng ni phiogwi rohorjak bai kha.

Habugra nokthat kwthar cheng kha,tai paithago Babylon song bai seleng khlai tlangjak bai kha,tai nothar sogwi swbai khibijak kha.

O bijab Habugrarok ni bijab wng kha chongjak dopha sak naikini khlai lai mani kok no sao, abo no muitu khlai di.Solomon Habugra chai tong phuru a ha wng kha belai hamchajak, nothok tongthok bai kuplung tong mani. Solomon thwi mani ulo kheno,bo Habugra chamani pai thang kheno Kaitor bini borok no chuba mani thak thang kha. A jora ni simi no Diarirok ni jora habphai kha, Elijah diari kotor nukjak phai kha.                 I Habugrarok ni bijab mwthakjak kha dirari rokni kokno saui. Elijah ni kokno twi II Habugra chengsajak kha.A ha kwma mano chwng nuk kha,Isreal bai Judah bui bai khaui tlangjak mani,  seleng khlai tlangjak mani ulo.

SOLOMON HABUGRA CHAUI HAMCHAMANI (I Habugra 1-10).

   Tabuk chwng nukh kha, David chakra wngsuk kha, sak mang hamlia dukhu manjagwi tong kha. Bo daktino bura rakha tamo ni hwn ba bini omor aphuru nokha bisi snichi sikho. Bwsla Solomon wng kha nokha bisi 19  ni borok.Tamo ni hwn ba bini sak hamia wngwi sak belaijak, abo ni bagwi borok rok bini kok khwna na nailia gwja.Ari wngwi bacha bai kha. Adonijah bwsla habugra sek nani nai kha, bwsla okra ba manthai tong mani (II Habugra 3:4). Aboni bagwi Diari Nathan samung khlai na nang kha. David sai mano Splomon se Habugra wng nani chugo, Adonijah wngia. Solomon wng kha Kaitor bai chongjak borok (I Bosong 22:9; I Habugra 2:15). Adonijah sai man kha bo nang khrub mani mungsa chuk lia. David thwi ia sini swkang no Solomon n     o Habugra chongjak kha II Hubugra 1:30, 39,53).

Solomon wng kha diari Nathan bai kaham khe phwrwngwi tubujak nai borok. A sikwrwng diaria Nathan Solom no markhe no hamjago.Abo ni bagwi Nathan bono mung phar mani tongo, “Jedidiah,”Kaitor ni khachuksa.(II Samuel 12:25).Solomon belai kaham chwngsacha khe hano naikolwi tong kha.Uanamasingsa khe bo chaia bai kagwi tong kha. Ulo khe bo Saul hai wng kha bwkha hamia chaia wng kha. Bupha David hai bo bini Bugra kaitor ni thani khir khir khe tong lia (I Habugra 11:4). Kaitor chini bwkha uansuk tong mano se naio.

Haipano Solomon Belai khe naithothok Habugra tong mani, Swngcharo bini ha belai kotor kaham tong mani. Bini langmao khatunmgma khakchangma bai kuplung, naithothok. Bini ha tormani wng kha 60,000 square mile, bupha bono ha kwlang mani slai kotor.

SOLOMON NI TOMUNG CHAMUNG NO NAILAI ANW

1. Solomon borok kotor tai borok kaham.

 a) Bo tongthar ni tomung twi khe ha no naikol o. Sikwrwng diari Nathan bono mung phar kha “Jedidah”  Kaitor ni khachuksa (II Samuel 12:25).

b) Bo Habugra chamani wng kha swrai swrai. Bebak kamyung ni borok rok no kha phurjak baio, hamjago.Kwchang kwchang khe no tong baio. (I Habugra 1:46).

c) Bupha bai barja bokja mani wng kha kwbangma kok rwjak, smai tangjak. (I Habugra 2: 1-9).

d) Bo simani rwng mani wng kha Kaitor ni aro ni se, Kaitor ni muchung twi khe. ( I Habugra 3)

e) Bini adong okra song wng kha joto habugraok ni slai kotor Sinai nuk nai rok. (I Habugra 4)

f) Bini langma ni samung kotor wng kha Kaitor ni nokthar tang mani.Abo no tang na bagwi sai sai rang swbai kha. Aro ni samung humungrok wng kha belai khe no kwthar tai kaham.

g) Bini Rangri tai simani sikwrwng wng mani swchar ni bebak borokrok khwna bai kha, Sheba ni ishri bo sai man kha. Abo no nugui bo hama phaijak lia tai kwmam kha (I Habugra 10:5).

h) Lobmung 45 o  Bo borok kaham abo no chwng mano.

i) Bo bwswk khe hamjak na rwng abono chwng nugo (Solomon ni Rwchabmung bijabo)

Solomon wng kha belai kaham kubui chwngsacha, haiphano ulokhe bo tola kwlai mani chwng nugo.

2. Solomon chaia khlai nai kebel borok

1. Bupha David hai wng lia, Bini takhuk Adonijah no bo belai satok pitok khlai kha (I Habugra 2:24-25).

2. Saul hai khe kungchuk kha,( I Habugra  10: 18-29)

3. Buini dopha ni bwrwi rok bai twitherjak kha, Takjak mwtairok no khulum kha. I Habugra 11). Poito kwrwi rok bai jual thansa ta wng di    ( II korinth 6:14).

4.Bo sina muchung mani  wng kha Kaitor ni aro ni, chuknokha chong twi. 1 Habugra 3).

5. Bini montri rok wng kha Israel ni  joto ni slai Sinai nuknai, buni ni slai. (1 Habugra 4).

6. Bo langma o samung khlaima wng kha Kaitor ni nokthar tang mani. ra ra rang swbai ha.  Bo sak yapharwi samung khlai mani  belai no koinene khe.

7.

Solomon Phola simano phunuk lia.Omo hai khebo tonglia.Phwrwng mani kokmung bijabo omo swrisa khe swi kha, bwkha baijagwi abo rok no swimani. Bo bini bwkhao Kaitor bai kwthai tong mani lia, khakchangma manlia.

David bono paithak ni kok kwcharmao swrai swrai khe no salang mani tongo, Jehovah no borom rwi kok khwnai tong nani kok.Habugra David thwi kha nokha bisi bwrwichi raja chamni iagulo.

Sikla rajkumari Victoria salsa phung jora o England ni Isri chongjak kha,abo ni ulo bo puila samung cheng grama wng kha, Cantebury ni Archbishop no ringwi bini bagwi surilai gra kha.Archbisho tai Lord Chamberlain iasku sungwi Bugra Kaitor ni thani surilai kha,bono phan rwnani sikwrwng khe England no naikini khlai nani. Thwi iasak kaham khe kwrwng khe sorkar tlang thang nani. Governing khlai nani omo belai kuthuk samung. Solomon omo no kaham khe no sai mano, bo chwrai sikla ba suri san mani bising twi raja chanani cheng kha.

Kaitor imango Solomon bai nukjak phai khe, bo habugra wngwi tong phuru.Bono hai hwnwi sakha, nwng je muchung mano san di, hake ang nono rwnai. Solomon sikla ba bo sai man kha, bo bebak samung no sai mansuk ia, khlai bo man bai glak. Bono samung ni poja berjak bai marok no. Bo Bugra Kaitor no tamo sankha? Kaitor bono sikwrwng akol rwkha bo san mani rokno. Kaitor chwng bai tamo smai tang lang kha? (Jakob 1:5). Nwng ani thani tamo nai?  (I Habugra 3:5). Bebak borok ni bagwi  no jora kaham. Bebak borok ni langma o no swngjako, nwng tamo no sanwi tong . Tamo khlai na bagwi nini bwkhao chongwi nakha? Solomon Kaitor ni thani san kha “Khwna nai bwkha”(Hearing heart) Bini bwkha wng kha phola kok sama no khwna nai.

Swngcharo joto ni slai Sinai nukhnai kwrwng borok kotor wng kha Habugra Solomon, Khristo Jisu abo ni bagwi no hai hwnwi sao, Solomon ni slai bo taibo mungsa kotor tongo. (Mathai 12:42). Solomon swngchar ni joto borok bai no sinijago bo borok sinai borok kotor, Solomon ni slai kotor phai kha, bini borok ni bagwi phai mani se, binio borok bono iachak soklia.(Johon1:11). Omo no talikha hamsuklia.Tamo khe nwng bono poito khlai da iachaksok kha?

Puila Solomon bini samung tang nai okrarok no kaham khe bodol kha ka. Bo bini iaksi iagra kaham kaham samung tang man nai borokrok no ton kha.Khoroksa khoroksa no bo mungsa mungsa samung khlai na bagwi okra chongwi ton bai kha. Bohrok kaisa samung ni bagwi barja bokjak.Abo hai khe samung khlai rwmani bagwi bini hao belai hamari phai kha tai hamcha bai kha.Solomon habugra chai tong phuru kaham khe sinijak ma le bo Bugra kaitor ni nothar tang mani bagwi. A samung wng kha bupha David Kaitor ni nothar tanglang na bagwi chaitok lang mani. Aswk kwrwk khe nok iaphang tangjak ma le holong kaham khe tanwi tangjak, Solomon tang mani nokthar ni holong tabuk bo hatola manwi tong kho.Holong thaisa no chithamchar feet tai chuku inches kolok. Aswk kotor kolok holong tai cedar buphang no rangchak bai khobwi naithotok khe tangjak.

A nokthar tong mani thai wng kha tabuk touristrok ni laibumani naijak nai thai.Moriah hathaio Abraham bwsla Isack no Kaitor no iaphar mani hathai.(Yaphang 22:2). Chwng oro nukha David bahai khe Araunah ni mai lam chama ni khola no segwi na kha, a kholao no tabuk nokthar kwbai ni holongrok no rokojakrok mano.Omo tabuk thuruksa rok ni kwthar ha khola. Jihudirok no mana khlaijak, kebo aro iapri ta kaidi, omo wng kha kwthar khola. Tabuk chwng nugo Jihudirok aro kuthum kuthumwi pal khe surilai mani gana tong nai eba hachal ni phai nairok.A chokdeual ni phataro bachai kabwi surilaio, Kaitor ni khairokma sanwi. Tai arirok ni iakni phiok di hwnwi surilaijao. Agini a holong kotorma abo wng kha Solomon nokthar tang phur kaimani.

Borokrok aro thang laio, berai kwthart berailaio, a notharo thngwi Kaitor bai malai nani. Tamo khe tabuk chwng sai mano chini bwsak mang se Kaitor ni nothar kwthar.(I Korinth 3:16;6:19). Nini bwsak mang Kaitor ni nothar da wng kha? Kaitor nwng bai se tong na muchungjago, Tamo khe bo nwng bai tongwi man glak, nwng sak mang bai sumsok khlai tong khe.

Elembago chwng nugo swngcharo nothar khungtham ni kok.Puila ni hwn khe Solomon tang mani nokthar,abo Babylon ni habugra bai swbai khibijak kha nokha bisi 587 B.C o.(II Habugra 25:8-9) Tai khungsa hwn khe Zerubbabel ni nokthar, (Ezra 5:2;6:15-18).O nokthar Solomon ni nokthar bai suthai kwrwi naithokmao.Nokthar kwtham hwn khe Herod tangmani holong kotor kotor bai tangjak,omo no tangnani cheng ma khe nokha bisi 20 B.C tai tangjak kha nokha bisi 64 AD jora.  O nokthar no Titus swbai khibi kha 70 A.D o. Aro tabuk Omar ni Mosque, thuruksa rok ni nokthar bachai tongo.

SOLOMON HABUGRA CHAI TONG PHURU HAMCHA MANI

Khuktang di I Habugra 9: 1-28 tai 10:14-29 Tamo khe wng kha sai man nani, tai bahai khe wng khwna hwn na buia.Solomon aswk khe hamchai tong mani,kem kotor phai kha. Aswk kotor achukthaio achuk mani, aswk khe sikwrwng tong mani,thiki bai ia bini rang ri manwi khwnwi rokno. Aswk khe hamchai tong mani jora Kaitor no pogwi thang nani kok tong nani wngia.Solomon aswk gwnang wng mani bagwi no,a hamchamani bo ma mwran no.

Tamo ni hwn ba,Kaitor ni aro ni sak nor mani bagwi no,Bugra kaitor Solomon ni arirok no tisai tubuo bono dukhu rwnani. Phwrwng naini kokmung bijabo kok swbaiwi swijak kha Solomon sak dukhu man mani, bini langma ni a jora ni kok no swilango.

Solomon habugra wngwi tong phuru Sheba hani Isri bono nukh phai kha bini hamchai tongmarok no.Tai Bupha David bono hamari rwui suri sanmani nang phaima akonrok no.David thwinani bisa ni swkang surilang mani.

Solomon ni kok kaham  pinjak  kha swngchar gwnangwi.Bo rung bania khlai mani bising twi pinjak kha (IHabugra 9:21-28).Solomon ni mung tormani bising twi Jehovah ni mung bo kuchuk wngo.Bini mung tormani bagwi no Bugra no no bui khatungjak bai kha,Sheba hani Isri bo, bo bai malai na phai kha.A Isrijwkma bono belai khe uanajak kha,(1) Solomon no tai bini rangri no tai bo sikwrwng wngmarok no twiwi I Habugra 10:1,7; (2)  tai bini samung tang nairok no nugwi bt 8 (3) Bini Bugra Kaitor no bo chajak kha bt 9.

BINI HA SWKAGWI KHIBIJAK KHA (I Habugra 11-16)

Solomon nokha bisi bwrwichi habugra chakha, bono tai khoroksa nokha bisi bwrwichi habugra chanai Jihudi rok ni hao (I Habugra 11). Swkang puila bebak no kaham khe tong bai mani, hamcha mani.Tamo khe ulo belai jwngjal kotor nang phai kha. Nwng sai man khwna Saul, David tai Solomon bohrok khoroktham no nokha bisi bwrwichi habugra wng nairok.(Samung 13:21;II Samuel 5:4; I Habugra 11:42).

Solomon Habugra chai tong phuru tex namani no borok bono kwlai khe nukha. Tongbai ia chabaia tai mwtai takjak no khulu mani abo rokno bohrok ni tomung sitra rwsio. Tabuk ha ma baklai Sinai.Aswk khe hamcha mani tongthok chathok tong mani tabuk kwmana jora phai sok phai kha.Borok ni tongmani chamani morok kha,tex marwmani bang kha,borok rok chajak ia bang rwk rwk, borok ni sago poja hilik bokjak kha,abo ni bagwi thamchi kajak baiwi kok norlai kha ualai nani cheng lai kha, bulai kha toklai kha.

Solomon kaham khe Jerusalemo bini nukhung no snamwi tisa kha, nothar bo tang kha,phatar hani kwrwng tang nairok tubu tang rwkha, manwi khwnwi bo phatar hani no nahar kha. Bini bagwi naithothok khe tangwi tisa bai kha, phatar hani borok berai phai nairok no bo kha bai iachak kha.

  A jora borokrok chaia sitra khlai kha, chaia lama rom lai kha. A hamia bang rwk rwk ma bai borokrok hamjak lia gwja, kok norlai kha, kok khwnalia gwja.Borokrok ni bwkha ubrum jabrum wng bai kha, ualai nani swrwng kha.

Omorok hai wng mani bagwi borok rok kaglai kha, kwthalai manlia. Nokha bisi kwbang ma romwi salgra Judah hani borok bai salsi Isreal hani borok rok kwthalai lia, khoroksa tai khoroksa bai nasle lai kha. A nasle lai mani nokha bisi ratham kalai kha,abo ni bagwi Ephraim hoda bai Judah hoda kwthalai lia. Naidi bahai khe Jacob Ephraim no hamari rwmani (Yaphang 48:17-22;49:22-26). Joshua ni jora ni simi no Ephraim dophani borok rokno twidulwi phai kha.David ni jora ni simi a phan slaijak kha Judah ni thani, David Judah hoda ni borok.Tai juda hoda ni borok rok naslaiksuk mani wng kha,Solomon ni a uansukma kwrwi khe borok no dukhu rwmani bagwi se.Bini a man na muchung mani bang mani bagwi se tai Bugra kaitor ni kok nor rwi tong mani bagwi se, Kaitor bono bujthumo (IHabugra 11:26-43;12:4).

Solomon ni bwsla Rehoboam taibo poja hilik rw phikha,borokrok ni thani levy boksin phikha.Bo chai khe khe khuknang iatwi khe samung khlai mani bagwi, borok ni bwkha hor chwng lai kha, aswk nokha bisi kolok khe nasle ualai phai mani tai bo bang kuk kha, uar kha. Bujthum nairok ni jora ni simi cheng mani.

Hodachi ni borokrok dakti no themrang kha bai kha.(I Habugra12:16). Tamo khe hoda kwnwi Judah bai Benjam simi se bini kok khwnai bo bai tong sio(I Habugra 12:17). Omo hai khe kok banglai mani bagwi salsi hani borok rok Jeroboam no habugra khlai chong laio bt. 20

KWLWK MANI LAMA

  O kothoma o nangkuk mani mung kotor wngwi achai kha: JEROBOM. O sikla borok nukhung chikon ni borok tamo khe bo belai khe kok khwna nai , borokrok no samung bai chubanai borok. Samung kaham khe tang nai. Diari Ahijah Jeroboan no kok phunugwi sakha,belai kok kotor khe sakha, bini chum mani kamchwlai kwtal no khugwi chikha chinwi bwtwng khe chirwi phunuk kha.Tai hai hwnwi sakha,Nwng nini banta chikhakakchi nadi; tamo ni hwn ba Bugra Isreal ni Kaitor ahai hwnwi sao,Naidi ang Solomon ni iaKni hano segwi na nani naiwi tong kha tai ang nono bosong kaichirok no nini iago rwnai ( IHabugra11:31).

Ha bakjak kha. Solomon buhthumjak kha, bini bolai dangor tong mani,kung chukmani tai phan phunuk mani bagwi. Okra naikol nai kaham nai nani nuk nani nango tai hano nai nani poja rwjak mano kaham khe nai ni nango. Bini iak ni phan rosaida tlangjak tangjakia abo no nasikna nang ia.

Tabuk ni salo bo chwng nugo,borok dakti no rangri gwnang, phan gwnangwi bachao,gwnang ni slai taibo gwnang wngo. Bohrok no mwthagwi man nai kwrwitamo khe ulo kirimasingcha khe bujthumjak mani.

Jesa phano wng mani abo achomsa wng mani kwlai ia.Je wng mani ukologo mungsa ia khe mungsa wng mani tongo. Omo bui bai sekrupjak mani eba swkwljak mani bagwi se ma wngo. Tamo ni hwn ba a samung agino hiujagwi khlaijagwi phai kha. France revulation bo abo ni iaphang kaisa tong mani nokha bisik kolok twi wi khlaijak phani.

Jihudi dophao hamia nang phai mani wng kha borokrok tongthar tong mano sak ni tongthok chathok bai tong lai mani, abo se bohrok ni hamia ni iarwng, abo no bohrok no sokomoro. Salsa iarwng iong chajak ba buphangma gurumsa  kwlai kha. Borok ni dophano kebo swbai phai mania ,borok kubui khe tongthar tong khe, a tongthar tomung hamia se borok no sokomoro. Nokha ni sal no khagwi khibi khe swngcharo buphang uaphang tong glak, jabra bora tai khum naithok nathok bo barwi man glak. Khumbari muikhwtwng bari kaiwi bo mungsa wng glak. Bugra Kaitor kwrwi hwn khe bo aro nok nukhung, swrwng nok, tai dopha hoda tongwi mania.

SUMSOK BOROK NO SWKAGO      

Borok rok hai phano sai maia. Borok rok chuknohani tomung tong laio hwnwi tong laio. (I Habugra 12:15;11:29-33). Kaitor nasigwi tong man lia Solomon kok khwnaia wngwi tong mano, bono dagilang mani kerong rakhogkjak lia.

Bugra hani chongjak borokrok swkakjak bai kha.Abo nokha bisi 3000 bisi jora swkagwi tonjak kha.Sumsok khlai mani bagwi se swkakjago.Sumsok ni bagwi swkakjak kha seleng snamwi tlangjak bai kha.(II Habugra 17 tai 25).  Omo bo kok thaisa Kothoma kaham ni bisingo.A  Isreal dopha swkakjak mani kwtharwjak phi nai, haino hai Isreal dopha  thumjak  phinai  ha swngcharo, Jisu Khristo chwngsacha khe haini hai  hao  kiphilwi phai phuru.A khwnathotok Elembag bokocho no khuktang di Jisaia 11:10-13;Ezekiel 37:15-28).

ELIJAH NI SAMUNG KWTHAR (I Habugra 17-22)

Elijah wng kha Kaitor ni hor budul kotor Ahab  mwtai khulum nai ni iak ni  Isreal dopha no phiok nani.Bo laibumao hai khe  khlai phunuk kha,kirimasingcha khe iasi kaiwi phunuk kha. Tishbite ni Elijah, Gilead o tong naisa , Bono kwlaisa khe sinirwjak mani kwlai kha. Bini mung Elijah hwn ma khe “Jehovah se ani Kaitor” Bo mung pharjak mani kubui khe  chasuk kha.Bo wngkha diari rokni bisingo tai kebo bai sujakthai kwrwi.