Baibel no sinirw mani

      BAIBEL                  (Baibel no sinirw mani)

                                                     Part -1

                                            Rev. Bipin Debbarma

                                                        Bethany Christian Minisry

                                                           Khumulwng - 2019 

                                                            BWKHAK 1                                   

   Baibel wng kha Kaitor ni Kok, Bo muchungjak mano borok rokno swi phunuklang mani. Abo ni kokbokhiri hwn khe Swngchar no mwthang na ni, Jisu Khristo ni bising twi. Baibel o bijab dokchidok (66) tongo, Khorok chibrwi bai swijago, abo nokha bisi 1600 jora nang kha swibai nani. Hibru kok bai Smai Kwcham swijago (Kisa bokocho khe Aramik Kok bai). Khristan era ni bisi Sa-ra ni (100) swkang Smai kwcham no Greek kok bai khe kok slai swijak kha.

Smai Kwtal khe Greek kok bai swijago. English Baibel khe Greek Baibel ni kok slaijago.

Kokthai “Baibel”omo Greek kok ni se phaio “biblos.” Kokthai “Testament” hwnma khe “Kok rwlai mani” eba Smai. Eba gosi nalai mani. Smai kwcham khe Khristo swngcharo phai ia sini swkang borok no mwthang na bagwi Kaitor kok rwmani.Eba smai tang mani. Smai Kwtal khe Kaitor borok rok bai kok rwmani, Khristo phai mani yagulo borok no mwthang mani. Smai Kwchamo chwng nugo, Kaitor kok rwmani Kerong bai. Smai Kwtalo khe chwng nugo, Kaitor kok rwmani, Jisu Khristo ni bising twi Khairokma bai.Kaisa tai kaisa no yak romwi tubumani (Galatia 3:17-25).

·         Kwcham chengma no Kwtal khlai pairwkha.

·         Kwcham khe Sinai hathaio thum kha.

·         Kwtal khe Kalberi hathaio.

·         Kwcham khe Moses bai gwdaljak.

·         Kwtal khe Jisu bai gwdaljak (Johon 1:17).

Bebak bijab rokno iachak bainai tai omo joto bai no hamjak baio chwrai chakra joto bai.

Smai kwcham ni Bijabrok wng kha:

·         Kerong Bijab            5

·         Laibuma  Bijab         12

·         Koklop  Bijab            5

·         Diari  Bijab                17

Diari kotor 5

 Diari chikon 12

Smai Kwtal ni Bijab rok:

Smai kwtal swijak male Jisu Khristoni tongmung tai bo phwrwng lang mani kok rok no, chwng no phunuk nani.Smai kwtal ni raiba. Abo khorokchar (8) bai swijago, Mathai, Johon, Pitor tai Pol bohrok wng kha Chonghor (apostle).Tai khoroknwi wng kha Mark bai Luk bohrok khoroknwi wng kha apostle rok ni logisong.Tai khoroknwi wng kha Jisu ni buphaiung song Jakob bai Jude.Puila centuary ni paithak centuary bwkhak o bijabrok swijago.

Bijab rok no khakjak kha:

·         Kothoma Kaham Bijab       4

·         Laibuma Bijab                      1

·         Diari Bijab                            1

·         Koktun Bijab                       21

Pol swikha 14

General         7

Smai Kwcham chengjago Kaitor bai (Yaphang 1:1) Smai Kwtal chengjago Khristo bai (Mathai 1:1)

Adam ni simi Abraham borok ni laibumani kok no chwng mano.Khristoni simi khe chwng Mothani Laibumano mano.

Khoroksa laibuma kwrwng sao, “Most people’s knowledge of history is like string of graduated pearls without string.”O kok khe kubui no Baibel ni laibuma ni kok no sakha. Baibel ni borok rok ni kok tai wnglang mani kok no kaham khe no sio. Tamo khe bohrok sia a laibuma no kaisa kaisa khe manjuwi nai nani. Je borok abo no sai man nai bo belai khe no khatungwi tongthokjak nai, Kaitor ni kokno. Tabuk a khumtrang bokol no nai thumdi, Yaphang bijab ni simi Phunukjakma bijab ni a khumtrang bokol no.Hakhe nwng Baibel ni kokrok no uansugwi naidi.

Smai Kwcham - Nang mani borok rok

Oro borok khorokchibwrwi ni mungrem rwjak, a borok rok ni kothoma no Baibel ni Laibuma.

!. Kaitor                                  21. Samuel

2. Satan                                   22.Saul

3. Adam                                    23. David

4. Noah                                      24. Solomon

5. Abraham                               25. Elijah

6. Issac                                         26. Elisha

7. Jacob                                        27. -Israel ni Habugrarok (19)

8. Joseph                                     28-30 - Judah ni Habugrarok (20)

9. Pharoah                                   31-34 Diarirok

10. Moses                                     35. Nebuchadnezzar

11. Aaron                                      36. Cyrus

12. Caleb                                        37.Zerubbabel

13. Joshua                                     38. Ezra

14-19 –Bujthunairok                   39. Nehemiah

20. Ruth                                          40. Esther

Puila ni Bijab Yaphang no nwng swrwng na thang khe, aro nwng khorokchar (8) ni kok no mangra nai, bohrok ni kokrok no swijak. Bohrok ni kok no aswk kolok laibumani kok.

Smai Kwtal – Nang mani borok rok

1. Johon Baptist

2. Jisu Khristo

3.3-14. Sagrirok (12)

15. Stephen        

16. Philip

17. Paul

18. Jacob, Jisu ni phaiung       

Smai Kwacham - Thairok

Smai Kwcham ni laibuima ni kokrok swijak kha thaichinwirok (12) no twiwi:

1. Eden                                       7. Egypt

2. Ararat Hathai                           8. Sinai Hathai 

3. Babel                                          9. Haching Panthor

4. Chaldees ni Ur                         10.Canaan

5. Canaan                                     12. Assyria (Isrealrok seleng snamjak mani).

6.  Egypt (Joseph ni kok)           13. Babylon (Juda song seleng snamjak mani).

                                                       14. Cannan (Palestine – Seleng khati kiphil mani.

O Baibel ni kothoma rok no snamwi tisa khe abo bail bail khe kaisa tai kaisa kok kwrwng laijak man nai (Chronological order). Tai kaisa lama bo tongo, abo wng kha, kotor kotor samung wngmani.

SMAI KWCHAM - WNGMAROK

1. Takchengma (Creation) Yaphang 1:1-2:3

2. Borok Sumsok khlai mani, Yaphang 3

3. Twi tormani, Yaphang 6-7

4. Babel, Yaphang 11:1-9

5. Abraham ringjak mani, Yaphang 11:”10-12:3

6. Egypt o kwthai mani, Yaphang 46, 47

7. Lamrwma, Lamrwma 7-12

8. Yokma ter, Lamrwma 12

9. Kerong rwjakmani, Lamrwma 19-24

10. Haching Panthor o lama korojak, Lwkhamung 13;14

11. Smai ha no segwi namani, Joshua 11

12. Chongjak bosong ni mwnakma jora, Bujthumnairok

13. Habugra Saul chongjak mani, 1 Samuel 9:27; 10:1

14. Hibru dophani rangchak jora, David bai Solomon ni jora, Ha thansa

        tong mani.2 Samuel 5:4-5; 1 Habugra 10:6-8.

15. Ha baklai mani – Isreal bai Juda, 1 Habugra 12:26-33

16. Seleng snamwi romwi tlangjak mani, 2 Habugra 17;25

17. Kiphilwi phai mani – Ezra

Smai Kwtal – Wngmarok

1. Jisu Khristo- chwrai phuru ni tomung

2. Jisu Khristo ni Samung

3. Jerusalem ni Motha

4. Gentilerok (Buini borok) ni thani Motha chengjak mani

5. Swngchar gwnangwi Motha

Yaphang o jora khajak mani

1. Chengphang (Patriarch) rokni jorani simi Moses – Yaphang

    i)  Raida twi nairok ni simi wngma ni

a)Takcheng mani (Creation)

        b) Sumsok khlai mani

        c) Twi Tormani

        d) Kurugwi ma thang bai kha

ii) Chongjak Nukhung

      Wngma kotor rok:

      a)  Abraham ringjak mani

      b) Khaui tlangjak kha Egypt o

2. Adong kotor rokni Jora: Moses ni simi Saul- Lamrwmani simi Samuel

     bijab jora.

     i) Egypt ni lamrwlai mani

    ii) Haching panthoro lama korolaimani

    iii) Canaan Ha segwi namani

     iv) Bujthumanai rok ni jora

3. Habugra rok ni Jora:  Saul ni simi Khaui tlangjak mani jora-

     Samuel, Habugra, Bosong, tai Diari rok ni bijab jora:

      i) Thansa khe tonglai mani jora

          a) Saul

           b) David

           c) Solomon

   ii) Ha baklai kha (kaklaimani)

        a) Juda

         b) Isreal

4. Buini ha ni borok rok bai satokjak mani jora: Khaui tlangjak mani simi

     Khristo jora - Ezra, Nehemiah, Esther, Diari Daniel tai Ezekiel.

     i) Isreal song khaui tlangjak mani

    ii) Juda song khaui tlangjak mani

5. Khristo – Kothoma kaham

6. Motha – Samung tai Koktun jora

   i) Jerusalem o

   ii) Swngchar gwnagwi pirjakmani

Muitu khlai tong di, Khristan chengma ni yaphang le Kubui Kaitor bai se, abo no bo phunuk lang kha. Kaitor bohrok no chong kha (Isreal bosong no) a kubui no phunukna bagwi, tai Bini sakni kokno khati ton nani.

Baibel chwng no sai khwnarwo, sumsok khlai mani kok tai bini yaphang. Swraijakma bai borok Kaitor bai swkakjak kha. Omo bwswk kwdwk, sak khlai man ia, kerong bo a samung no khlai pai mania, borok mwthangjak na nang mani.Kerong ni samung bai borokni bahan bwthwi no soicharwi man ia.Tamo ni hwn ba bebak borok no sumsok khlai bai kha (Rum 3:23). Aphuru Bugra Kaitor smai tang mani chwng nugo, Borok khoroksa phai nai, Borok ni Sajla kwmajak rok no se naitugwi mwthang na phaio tai rwjakna tong mano bini langma no rwkha (Luk 19:10; Mathai 20:28). Chwng nuk kha aswk jora logwi wngwi phai mani, omo nono phunugma kwlaio, mwthangnaisa swngcharo phai na bagwi jugali tong mase. Kaitor ni Phola se chwng no kubui no phunuk nai, kubui no hwnwi sirwnai, Kaitor ni dagimano chwng swrwng na nang nai, kubui hwnwi saimansuk nani.Samung tangnaisa lachi glak (2 Timothi 2:15).

Kwbangma borok rok no sao,”Baibel le belai no kaham kotor kubui kuk, tamo khe ang sia buro ni simi cheng nai, bahai khe cheng nai.” A kokno borok rok bwkha bai bo sao ahai no bo sao. O kok belai nang mani Baibel swrwng nani kaisa kaida raida tong na nango, wngia khe chwng biang biang kwmai thang o kubui no sia tong nai.Jora kwbang ma naui bijab rok no khuktangwi tong phano mungsa sia wng nai.

Baibel- wngwi thang marok khaswrang rwo

Moses ni bijab rogo Kerong ni kok mano.Laibumani kok khe, Samuel, Habugra, tai Bosong ni bijabrog o.Job bai Phwrwngnaini Bijab khe Philosophy.Lobmung bai Solomon ni rwchabmung hwn khe koklob bijab. Diarirok wng kha, Jisaia, Esekiel, Jeremia tai diari chikon rok.Koktun no khe Doktrin ni kok mano.Apocalypse o Phunukjakmani tai Daniel.

Omo rok khorokchibrwi (40) bai swijak, tai jora nang kha nokha bisi 1600 jora. Omo rok no thumsa khe thumui snam jak kha “BIJAB”. Yaphang ni simi khuktangwi Paithak Phunukjakma jora khuktangwi mano. Aro kusta kebang nai kwrwi.Kaisa swijak bai tai kaisa swijak kwrwng lai tongo, khoroksa ni yaktwi swijakma hai khe.Khoroksa borok ni kok tai khoroksa borok ni samung khlaimung, Tamo khe aro bwkha kaisa khe swijakma  mano (2 Pitor 1:21).Omo khoroksa borok bai swijakma bo wngia.

Omo chuknokha bai wngma se, borok bai khlaijak ma wngia.Chuknoha ni uansukjak, Kaitor bai phunukjak.Tamo khe samung wng kha borok rokni yak bai. Tamo khe borok Phola Kwthar bai koboljagwi se Kaitor ni aro ni kok sao” (2 Pitor 1:21).

A Bijab wng kha. Kaitor bai phunukjak mani se, twrwk twrwk khe phunukjagwi phai kha, Kaitor borok rok no phunuk kha borok ni bising twi. Puila ni simi kaham khe phungwi, paithak jora kaham khe phunuklang kha .Swkang Yaphang bijabo chengwi, pailang kha Phunukjama bijab o. Laibuma bijab ni simi Juda bijab jora chwng nugo Kaitor khlai ma bwkha chong ma twi khlai lang mani. A bokocho rokno thansa khe nai mano.

Baibel ni laibuma chwng  no laithang nai jora ni kothomarog o tlang thango.Tai a diarirok ni kok khe chwng no nang phai nani jorao tlango.Smai kwcham khe kok yaphang, Smai Kwtal khe bera ni thongla .Nok ni yaphang le mungsa samungo nangia saka nok tangjak ya hwn khe.Nok yaphang kwrwi khe nok tangwi bo man ia. Abo ni bagwi Smai kwcham bai smai Kwtal kangnwi nwi no nango.

“Kwtal bo Kwchamo tongo.Kwcham ni kok no Kwtal sao.Kwtal khe Kwchamo huijak. Kwcham khe Kwtal ni bumul.”

Smai Kwcham bai Swmai Kwtal wng kha chuknoha ni Bijabnok (library), bohrok thansa, Laithangma jora bai phai nai jora yaphang kaisa, kwnwi ni bising torwi logwi phaio.Molbrum lailang nai bai phainai molbrum ni bisingo.

Bijab Kangsa, Laibuma thaisa, Kothoma tangsa

Baibel wng kha Bijab Kangsa, Laibuma kaisa, kothoma tangsa, Kaitor ni kothoma. Aro Kaitor ni 10,000 kothoma tongo, Laibuma cheng nai ni.Jora snam naisa ni, aiang nar bai yang nar ni molbrum ni mol khanai.A kwcharo khe jora no snam kha.Yaphang bijab wng kha achaiphang, Phunukjamani bijab wng kha paisuk rwnai. A kwnwi ni bisingo wng kha Kaitor samung tang mani kothoma.Nwng kaham khe abo rokno swrwng naidi kaisa samung kotor molbrum khlaijagwi tong mani man nai. Molbrum ni bagwi kaitor kotor bwkha chongwi samung khlai tong mani, abo wng kha, hamia sitra komornai swngchar no mwthang nani.

Tai kaisa raida twi chwng Baible no swrwng khe,bokocho bokocho khe khagwi,Kerong,Laibuma, Koklob,Diari kotor tai chikon,Kothoma kaham, Samung, Koktun tai Phunukjak mani. Aro bo chwng nugo abo rok joto no thansa kok thaisa, “A bijabo joto swijak mani abo ani kok mang”Khristo sao. Joto a Bugra ni kok no mang  sao.

Kangsa kangsa bijab no kok sajak tongo, Chwng aro tamo sai tong a kokrok no rutuk tikhlai naina nango. A bijab ni kok no sasugwi maniasak khuktang mang tong di. Naidi Johon bijab ni kokno laite sa khe no sai manwi thango, tamo ni bagwi ba swikha. Omo Johon 20:31 no sao,Aro swrai swrai khe sajak ya phano,aro kubui no man nai.

Kok thaisa sana nang ma khe ahai se Baibel no bo tai kubun bijab hai khe no khuktang di Bijabnok ni bijab no khuktang twi khe .Bijabnok ni bijab no chwng Baibel khuktang phuru borom rwtwi khe rwia.Chwng omo hai khe uansugwi khuktang na nangia, bokocho khaksa no minitchi swk khuktang kha,Horo kisa khuktang kha, tai ni salo tai kisa khuktang kha.Phia phungo kisa khuktang twi tai hatibarsa khuktang lia.Eba taini talo uaisa swk a bijab no khuktang tikha. Omo hai khe khuktangwi tong khe a kothoma no twiwi kuno phuru phano khatungwi man glak.Rom di nini hamjak mani borok nono hamjak mani koktun swikhe nwng tamo khlai nai, abo no yaphang buchuk paisugwi khuktang nai, Abo Pai yasak nwng a koktun no khuktang nai, hake se nwng khuktang mani bathak nai.

Hamjakma kothoma

Nwng bwkha rwi da Baibel Khuktang na phai? Nwng nangsugwi da khuktang,eba omo hai khe khlaisuk na hwnwi da khuktang? Baibel le juda bijab ni texts bijab hai wngia. Omo kubui kothoma,Kaitor bai phunugwi rwjak mani.Omo no bwkha rwi cheng ma hai khe paisugwi bo khuktang na nango.Kangsa bijab pai khe tai kangsa cheng phi di.Baibel no ereng hwnwi kha takadi.Uansuk di nwng aro ni kok sajak tong mano saiman baisuk kha.Abo no ereng ereng hwnwi ta nadi.Phola bigra Baibel khuktang yarok omo hai no uansugo.Baibel no romwi nai yarok omo hai khlaio.Khuktang  mani salo, bini mokolo kwlai mani simi no naio tai khuktang o.Kwbangma borokrok no omo hai khe khlaio,omo twi khe Baibel no khlai thai kwrwi. Chwng Baibel khuktang na phai phuru chini uansukmungrok no kwrak khe poito bai ma khuktang nai.Omo hai khe poito khlai di kangsa kangsa bijab joto no nang mani kok sao, aro kok sajak tongo. A kok tamo abo no sai man na bagwi khuktangdi, tai haino hai khuktang phidi.

Kaitor ni Phola Bo sakno nono phwrwng thung, khoroksa borok bo sak no khuktang thung: “Elembag ni kok no, saichug saichung swbai sai man ia”(2 Pitor 1:20). Naitugwi sina bagwi khuktang di.Omo Kaitor bai phunukjak mani, nwng bwkha koinene khe phai khe.Bo nono pohoro tubui phunuk nai, a kok bokocho tamo sana nai, eba sai tongo.Bijab ni kuno khaksa bokocho bebak nang mani kokno sai rwi man glak.

Kaitor ni kok le kwthang kok.kubui chasugwi hamchana hwn khe, bijab ni joto bokocho no nang mani. Chwng omo bo sana nai ya joto bokocho nangkuk mani bokocho.

Joto no nang kuk mani bokocho hamsugwi chasukna hwn khe.Tamo khe kaisa bokokcho tai kaisa bokocho ni slai nang mani. Nwng uansugwi nai mano, Solomon ni rwchabmung bijab, omo bo Kaitor bai phunukjak mano, tamo khe kebo sai manglak abo Johon swimani kothoma bai baksa hwnwi. Tamo khe kangnwi nwino Elembag ni bedek. Aro kangsa bijab kwrwi hwn khe a Elembag paisugwi hamsuk mania.

Baibel wng kha paisukjak bijab, aro chaia wngwi se man ia. Aro mungsa thepai gwdalwi man ia, tai aro ni mungsa swkagwi tlangwi bo man ia. Abo kubui kheno chajaksuk Bijab.(Phunukjakmani 22:18-19) O Elembag wng kha Canon bai gosi paisukrwi rwjak.

Chwng Baibel no uaisa bai pai khuktang na nango. Hatibaro bijab kangsa khuktang di.Khuktang bai man glak hwnwi bwkha ta twi di.Omo hai wngia.Nwng salsa o bwswk jora swbai bijab khuktang thani.T.V nai thani, Mobile thwng thani, eba baiabrok bai koksalai jora rwthani.Abo rok ni slai bijab kolok kotor phano aswk jora nang glak.

Baibel ni Smai kwchamo baksa bijabrok kotor kolok, omorok wng kha Yaphang bijab, Lamrwma bijab, Lekhamung bijab tai Jisaia bijab akonrok. O bijab kotor kolok rok no khe khaktam kakhbrwi khe swkagwi khuktang di. Uaisa khuktang ma bai kha ta bai di abo rokno saiman baisukya hwnwi, khuktang phlai tong di, nono Kaitor chuba nai saiman rwnai.

Baibel no twiwi taibo khaswrang rwmani kok

Kaitor, Borok, Sumsok, Mwthangjak mani, Soichajak, tai kwthar wng mani.

Kokthai thainwi – KHAIROKMA bai CHWNGSACHA. Kothai thaisa khe - JISU.

Smai Kwcham 22 bijabrok ni kokno Jisu khursai sakha:

Mathai bijabo Smai Kwcham ni kok khursajak kha – 19

Mark bijabo – 15

Luk bijabo – 25

Johon bijabo -11

Hibru bijabo – 85

Phunukjakma bijabo – 245

“Christ quotes the very passages most avoided by Bible critics – Twi tormani, Lot, Manna, Pitol ni chibuk, Jonah.”D.L Moody sao (English Bible).

Bwtang bang mani – 31,102 bwtangrok

Kokthai bang mani – 775,693 kokthairok(Engkish Bible)

Berem kolok - Lobmung 119

Berem barah - Lobmung 117

Omo no sinani muchung na nango Ezra 7:21 no English aikhor ni joto aikhor no aro tong baio, J aikhor bade.

Bwtang kolok – Esther 8:9

Bwtang barah – Johon 11:15

Smai Kwcham ni bijab kolok – Lobmung Bijab

Smai Kwtal ni Bijab kolok – Luk Bijab

Khristo, Kwthang kok

Smai kwchamo Dophani kok no sao (Hibru dopha).Smai Kwtal khe borok ni kok no sao (Borok ni Sajla). A dopha chengjak kha Kaitor bai tai naikini khlai torwkha, a borok no swngcharo tubu na bagwi (Yaphang 12:1-3).

Kaitor bo sakno borok wngwi phai kha, Chwng bono sai man na hwn khe, chwng kaitor no uansugwi matong nai.(Johon 1:14;14:9) Bo swngcharo nukjak phai mani , Laibumani kokbokhiri. Smai Kwcham khe abo no phunuklang kha, Tai Smai Kwtal khe a kokno swbai saphai kha.

Khristo borok wngwi tong lang kha, Borok kaham ni tongmung hai tai chwng sai mania, nukia. Bo wng kha borok maia gwnang, Borok kwchang, Borok kaham, Borok bwkha kolok, Khairokma gwnang borok.Bo lukurok no hamjago.Bo uanamasingcha samung khlaiwi borok rokno charwkha. Borokrok hamia chaia, uanama paia borok, bwkha baijak borokrok, Bini thani phai baio.Bo a borokrok no khakchangma rwo khatung rwo. (Mathai 11:28-30). Omo hai khe sajago, bo bwkha kaham bai borokrok ni bagwi khlai langma ni kokrok no swina hwn khe, swngcharo swibo swibai glak, swngchar chak glak.(Johon 21:25)

Abo ni bagwi bo thwikha - O swngchar ni sumsok rujuna bagwi.Tai Borok rokni mwthangnaisa Bugra wng nani.

Ulo Bo kwthwi ni thangchai Bacha phiukha – Bo kwthang tini. Bo Laibumani borokrok hai wngia. Bo wng kha Kwthang khoroksa, Laibumani nangkuk mani borok.Swngcharo tini bono belai khe no nango. Bo molbrum brum ni langma rwnai hwnwi kok rwjak, smai tangjak, je borok bini thani phainai. Baibel ni joto kokthoma tong mani bebak no Khristo ni Kothoma.Tai Molbrum ni langma rwnani smai kothoma mang. Omorok swijak male Chwng no poito khlai thung, sai man thung, Bono hamjak thung tai Bini kok khwnai tong thung.Baibel – Kaitor ni Swijak kok.

Tabuk chini yago Baibel phaimano twiwi kwbangma Kok tongo (theory). Bwswk jwngjal tekto ni bising twi abo sok phai kha.Swinai sanairok ni yago kwlaiwi, laibumani bising twi tabuk ni Baibel wngwi sok phai kha. Tabuk a Baibel ni bijarok ni kokthairok no swrwngwi yachak di.Nwng aro nuknai bohrok swilang mani kokbuma kaisa, abo ni bagwi no chwng sai mano, omo borok khoroksa bai no kobolwi swirwjak mani, Joto Baibel ni bijabrok.A swirwjak mani, swinairok KAITOR NI KOK no swio.

PENTATEUCH

(Baibel no sinirwma ni)

Part - 2

                                             Rev. Bipin Debbarma

                                              Bethany Christian Ministry

                                               Khumulwng - 2019

                                                     Bwkhak 2

                                  Yaphang bijab Jisu no hwno, Taknaisa Kaitor

Yaphang bijab khe Kaitor ni kok ali sar mani thai. A mungborom Yaphang (Genesis) Greek kok bai abono achaiphang (origin) hwno.Hibru kok  abo no slaijak kha sirisiti ni swkang. A kok abo no sao omo wng kha siphan, bijabrok paisugwi sibai man ia. Tai thaisa kok khe ahai se, abochengsajak mani kokno simi se sao.Aro bebak paisukjak kok kwrwi.Tamo ni hwn khe ulo tamo nang phai nai abo twrwk twrwk khe se Kaitor bai phungwi tubujago.

Saitan wng kha bijab Yaphang ni ari kotor. Ari bono choprob phai kha.Bo sak no Kaitor kotor ni ari hwnwi phunuk phai kha tai Borok dophano phemolok phai kha.Abono bo kwmana ni kok samani kwlaio tai bo ma komor nai. (Yaphang 3).

Yaphang bijab chwng no Kaitor swngchar tak mani kokno sirwo.Omo kwrwi khe chwng mungsa sai man glak kha mun. Chwng sai mansuk bai glak khamun swngchar chengjak mani kok akonrok.

Yaphang bijab wng kha chengmani Bijab:

1. Swngchar chengjak mani kok                          Yaphang 1:1-25

2. Borok dopha chengjak mani kok                     Yaphang 1:26-2

3. Swngcharo sumsok chengjak mani kok           Yaphang 3:1-7

4. Mwthangna smai tangjak mani kok                 Yaphang 3:8-24

5. Nukhung chengjak mani kok                              Yaphang 4:1-15

6. Borok rok sirwng phai mani kok                          Yaphang 4:16-9:29

7.Swngcharo dopha chengmani kok                       Yaphang 10,11

8. Hibru dopha chengsa mani kok                               Yaphang 12-50

Adam chengjak kha Kaitor bai, Kok khwna ia wngwi gurum kwlai kha.(Yaphang 3)

Adam chengjak kha Kaitor bai, Bwthwi iapharwi barok kha.(Yaphang 4:4)

Noah chengjak kha Kaitor bai, Rung kotor tanwi. (Yaphang 6:8;14,22)

Abraham chengjak kha Kaitor bai, Kaitor ni haia snamwi. (Yaphang 12:8)

Abo rok joto no bosongo puila chengsajak mani.

Yaphang bijab wng kha joto chengjak mani kok no swi narwkjak. Kok kwrwi, borok rok phola o mokol phula wng thang bai kha.(Epis 4:18) Kaitor phunuk kwlang mani chengma kokrok no norwi rwlai kha. Bohrok ni chuchu bora rachi, Taknaisa Kaitor no khulum lai lia, tajak malmata soitan no se khulum laisio.Borok dopha hamiao gurum kwlai kha, komorlang sinai.Yaphang bijab cheng kha Kaitor bai, Pailang kha simalwng ni mankhor bai.O bijab wng kha borokrok chen mani laibuma. Tamo khe oro chwng nugo, Kaitor borok rok chen mano phan rwi tisai tubu mani.Bo wng kha khairokma kuplung mwthangnaisa kaitor. Chwng nuk kha oro aswk sumsok kwbangma, Khairokma abo ni slai taibo bangkuk mani (Rum 5:20).

Yaphang bijab chwng no 2000 bisi kolok ni kokno laibumao swi phunuk lang kha.Abo laibuma ni kok simi wngia tamo khe Phola ni kok, o kok swbai salango. Beremnwio Kaitor swngchar takma kok bai borok no takmani kokno phunuk lang kha.Aro ni simi no chwng mano mwthang nani kokno. Kwmajak borok no Kaitor bini thani rutugwi tubu mani.

Yaphang bijab sao, Chuknoha ni Kaitor taknaisa, chuknoha ni takajak, chuknoha ni mwthang naisa, chuknoha bai kobolwi swijak Baibel,abo rok aro tong baio. A bijab bwlai no Phola Kwthar se katirwi tono, Bo kobolwi swirwmano. A bijab no kok swbang iaui,poito khlai swrwng khe kubui kothairok no swraisa khe man nai.Puila ni berem chisa achaiphang ni kok mang salango, Swngchar ni haphar,borokrok ni langma,sumsok,thwinani kok,mwtahangma ni kok,sirwk rwgwi phai mani kok,dopharok ni kok, khukni kok  akonrok.

O bijab tai bo muitu khlai rwo, Yaphang 12 wng kha Hibru dopha cheng mani kok .Abraham wng kha chengphang.Abo hai khe no laibuma tor kha, Isaac,Jacob tai Joshep akonrok bai.A dopha kotor Hibru rok ni bising twi Kaisa kotor hamari phai nai  swngcharo.Kaitor, Abraham no smai tangwi kok rwlang kha , bono poito khlai nairok wng kha bini bosong ni borok.

1. Canaan hano man nai (Yaphang 12:1-3)

2. Dopha kotor ma wng nai .

3. Bohrok ni dopha ni bising twi joto dopha hamari man nai.

A smai tanglang mano Kaitor haino hai Isaac bai Jacob no bo kok rwlang kha. Yaphang 26:1-5; 28:13-15).

Mung kotorsni tai bohrokni kok akonrok:

Abel bai baksa khorok bomkha, kroso mera bwsa ratharjaK kha.

Enoch ni iaphri rom di, Kaitor bai tongdi.

Kaitor no poito khlai di, Noah bai baksa Kaitor ni twikotoro kochok di.

Poito bai rwkthar di Abraham no

Isaac no logi rwdi twikhor khur nani, Chuknokha ni chubamung naina himdi.

Iakhili kasadi Jacob bai baksa, Kaitor bai malai nai.

Joshep hai kubui wng di, Kaitor bai thansa khe tong di.

Yaphang bijab sai khwnarwkha swngmung tong mano:

1. Molbrum brum ni Kaitor.

2. Borok buro ni phai?

3. Sumsok buro ni phai kha?

4. Sumgwnang borok bahai khe Kaitor ni thani kiphilwi man kha? (Abel ratharwi iapharma bagwi)

5. Bahai khe borok Kaitor no khaphurwi man? (Abraham ni poito)

6. Bahai khe chwng phan mano, Kaitor bai borok ni? (Jacob sak iaphar mani).

Yaphang ni mungtham mungrem:

1.Bongso – Sirisiti ni swkang no Kaitor – (Yaphang 1:1)

2.Gurum kwlai kha – Soitan -    (Yaphang 3:1)

3. Achai kwtal – Bugra Jisu Khristo – (Yaphang 12:1)

Yaphang bijab wng kha borok mechenjak mani kok no swio, abo puila Eden thaibwlwngo, borok si phai phuru (sumsok khlai phuru ni simi twi tormani jora) paithago chengphang (Patriach) (Noah ni simi Joshep ni jora). Borok ni joto jora no mechenjak bai kha, Kaitor borok no iak romwi tisa kha tai smai kotor tang kha khairokma kotor bai mwthang nani. Abo ni bagwi Baibel ni puila ni Baibel bijab chwng no sai khwna rwkha borok mechenjak mani, a jora no Kaitor kotor borok no mwthang nani lama phunuk kha.

                            Masia phai nani kok khwna rwkha

Baibel ni kok bothoma wng kha JISU KHRISTO. Bebak Baibel ni kokbwlaio no Jisu Khirsto tongo. Yaphang bijabo chwng bono nugo mari phunukjak tai diari kok twi khe.

Bwrwi ni bwchwlwi ………………………………… Yaphang 3:15.

Ratharjak malmatani bukur ………. ……………..Yaphang 3:21

Abel ni ratharwi iaphar ma bwthwi ……………. Yaphang 4:4.

Katijak nai swndwk tongthani hab mani…………Yaphang 7:1.7

Isaac no Iaphar mani …………………………………  Yaphang 22

Joseph hakor ni tisai singhason man mani ……Yaphang 37:28; 41:41-44

ACHAIPHANG SONG NI JORA

Achaiphang ni jora no laibuma ni kok iaphang.Abo Adam ni simi Moses ni jora.A jora wng kha borok mechenjagwi manjak mani jora.Kaitor khoroksa khoroksa no ring mani jora. Bo wng kha Abraham, nokni swkagwi tonjak kha. Abraham no Hibru dopha ni bupha. Abo no chwng Yaphang 12 beremo mano.

Achaiphang okra song wng kha khorokba, bohrok wng kha, ABRAHAM, ISAAC, JACOB, JOSEPH tai JOB. Yaphang bijab ni ulo eba Lamrwma bijab ni swkang swijak na nang mani Job bijab. Moses ni slai swkang no Job swngcharo tong lang kha, Moses ni kokno chwng Lamrwma 2 beremo se mano.

Kaitor Abraham no ringwi tubukha,bo bai smai tang kha,abono Abrahamic smai hwno.A smai tanglai mano kaham khe sinani naidi (Yaphang 12:1-3).Nwng o kokno sai mania hwn khe ,Smai kwcham no swrwng mani mungsa chukia.Kaitor a SMAI NO Abraham ni sajla Isaac bai  haino hai samai tang phiou kha.Busuk Jacob bai bo haino hai smai tang phiou kha (Yaphang 26:1-5;28:13-15).

Abo ni bagwi a kwthamrok wng kha Smai pha, Elembago chwng abo no mano: Ang nini chuchu song ni Kaitor, Abraham ni Kaitor, Isaac ni Kaitor tai Jacob ni Kaitor (Samung 7:32).Bo aro tai kebo no tichok lia, Kaitor a khoroktham bai se smai tanglango.Bohrok a kok no buino sai makwlang bai kha. Smai omo tamo hwn mani? (Yaphang 12:1-3;26:1-5;28:13-15)

NUKHUNG NI DOPHA WNGWI TORMANI

Yaphang bijab ni kothoma kwbang kukno Joseph no twiwi swijak.              (Yaphang 37-48)  Tamo wngwi? Tamo ni hwn ba Joseph wng kha nukhung bai dopha ni kwcharni borok. Joseph ni jora nukhung simi tong mani, Abraham, Isaac tai Jacob ni nukhung.Yaphang bijab paimani iagulo chwng nugo khorokchisini (70) borokrok.Abo Jacob ni nukhung tong mani.Aphuru kaitor a nukhung no twiwi no samung khlai tongo. A nukhung no twiwi khuktang di, aro Jacob bini bwsa khoroksa khoroksa khe hamari rwmani Yaphang 49.

Lamrwma bijab bwlai phil khe chwng nugo, aro abo dopha wngwi thang kha.Yaphang bijab ni bisi kwbang mani ulo Lamrwma bijab cheng khe no dopha torwi phai mano chwng nugo.Joseph wng kha nukhung bai dopha ni kwchar ni borok.Aro Joseph ni tomung kaham no phunukjak kha – bini chaia kwrwi ahai kok wngia – tamo khe a chaia kokrok aro switisajak lia. Bo bo chwng hai no bahan bwthwi ni borok.Kaitor bono borom khlaio, abo ni bagwi Joseph bai Jisu no sui naimani 130 hai sol lai mani kok.Bo wng kha Massianic achaiphang, Jisu ni tongmung achaiphang ni sago bujak phaio.

YAPHANG BIJAB NO SABO SWI?

Mol kolokma twiwi Hibru bai Khristan song hwno Moses no swio. Phola Kwthar bai khe koboljagwi Yaphang bijab no swirwjago.Moses Achaia sini bisi ratham swkang no Yaphang bijab ni kok thakjak. Moses a kokrok no phoal kwthar bai khe sak baithang sajagwi eba Laibuma ni kokrok manwi swi khwna.Bini chuchu song ni iakni phano bo man khwna a kokrok no.(Amos 3:7) Jisu, Moses no twiwi tamo sakha,(Luk 24:27;Johon7:19)

Bisi brum no Egypt bai Palestine no Moses swilang mani Pentateuch no twiwi rutukjagwi karijagwi tongo, Laibumao a kubui kok swijak langma rokno.Moses Lekha swrwng bumale Pharaoh ni nok nuyungmao, Egypt ni bebak elem bo phwrwngjak kha, hake kok bai samung bai borok kotor wngwi phai kha. (Samuing 7:22) Swi kwrwng tangmung no bo swrwngjak.Moses a swina rwngwi tong mano samungo phwnang kha.(Laibuma 34:27;Lekhamung 17:2;Uainwi 6:9’24:1-3; Joshua8:32).

SABO SWI KHWNA SWNGCHAR SNAMJAK MANI KOK NO

Kha ta twi di, abo bisi kwbangma swkang no swijak kha, Abraham phano swi mano, Noah phano swi mano,eba Enoch phano swi mano, sabo sai man nai tong ? Abhraham ni swkang no borok rok swilaio wngma kok rok no, Ur wng kha Babilon no kaisa belai nang mani kamiyung, aro bijab nokrok (Libraries)  tongo,lekha jukha mania bijabrok rungjak tongo.Dictionari rok,Grammar rok,repharent phunukjak,encylopedia, thikemung bijab, astronomy,geography,tongthar ni kok,tai polities akonrok twi swijak. Bwkha thwia wng nani kok kwrwi, Abraham a kokrok no bohrok ni tongphaimarok ni (tradition) eba Shem ni iak ni marwk khwna. A swngchar snamjak mani kok, borok takjak mani kok akonrok. Tai Twitor mani kothoma rokno. Abraham wng kha omo hai khe tor kha a jora tongmung bai, bijabrok bai,tai bijabnok no twi wi. Bo a kokrok no gothokjak suklangma rokno kaham khe naichom sugwi saiman sugwi no swilang kha.Kaitor bo bai smai tanglang mani kok akonrok. Bo abo rok no hani takajak manwi, cuneiform hai khe swilango.A swijak tong mani abo rok no bwsa bwtwirok no iapharwi kwlang kha.

Takjak mani (Creation)

Mol kwbangma jora naui o bijarok aswk naithok khwnathok khe swijagwi phai kha.Yaphango, Kaitor chuknoharok bai haiung no snam kha.Oro kokthai thaisa thanwi tong mani omo swngchar ni iaphango manwi khwnwi tong mano sao. Aro ni bebak manwirok no bo Bini khuk ni kok phan bai se snam baio. Bo dagi sakha, hake swngchar sanamjagwi thang kha (Hibru 11:3). Borok kwbangma kok ni kok sai tongo, tamo khe a kubui wnglang male kubui no:

Kaitor snam mani manwi rok mungsa mungsa khe snamjago.

1. Swngchar ni manwi (Matter) Yaphang 1:3-19

2. Langma ni tongdal. Yaphang 1:20-25

3. Borok, Takjaknai rok ni motok. Yaphang 1:26-27

Kaitor bu borok ni kok no puila yaphang bijabo chitham bwtango khursai sa? Kuktang di Johon 1:1 tai Hibru 1:1. Oro chwng nugo, chwng no bini bwthwi kwthar bai khe mwthang nai, a Bugra ni kok. Bono swngchar no tagwi snam nai. Baksa sao Apha Kaitor khe architect, Kaitor ni Sajla tai Pho kwthar khe nok tang nai, haiung no naithok khe jai khlai nai. Yaphang 1:2 no chwng Phola Kwthar no mano.

Yaphang bijab ni puila ni beremo swngchar snamjak mani phunuk mari, khlai phunukjak kha.Bwtangnwio khe aboni kokbarah no swijak. Borok no takmani kokno kok swbaijak. Baibel ni kothoma wng kha borok no mwthang nani laibuma ni kok.

Sina khlai di, Kaitor borok no takmani Bono kosol khe tago,Bo bai baksa khe kwthar tong nani, phelosip khlai nani. Borok sumsok khlai Kaitor bai sakno swkak kha.Tabuk a sumsok no sui man khe se chwng kaitor bai kwtha phirwi man nai.Abo ni bagwi no Jisu Khristo swngcharo phaio: Bo chini poja rujui man twi khe, Khristo sak baithang chini sumsokno kroso rujui tlang kha (1 Pitor 24). 1 Johon 1 no khuktang di,bahai khe sumsok chwng no Kaitor bai swkagwi tonkha, tai chwng no khoroksa tai khoroksa bai .1 Johon 1: 9  sao, chini tamo khlai thai tong Kaitor bai kwtha phina hwnkhe.

SUMSOK KHLAI MANI

Adam bai Eve mungsa hamiarok no sia khe takjak mani tai sakni muchung twi tongna phan rwjak. Bohrok kaham khe tongwi amjokjak kha.Bohrok bwkha kaham tai bwkha kwthar khe rwjak tong mani, Kaitor bai kaham khe tongwi manna twikhe. Kaitor bo sakno bohrok bai tong phaio tai phelosip bo khlaio, Yaphang 3:8 .

Soitan, Sumsok ni iaphang chibuk no iago twiwi, bohrok no bwkha uduru muduru khlai rwphai kha, Kaitor ni kokno. Bohrok belokjakmao kwlaiwi, amjokjakma o chenwi thang kha. Tabuk sumsok swngcharo habphai kha. Soitan tabuk bo borok no kobol phaio, Kaitor ni kokno khwnaia norna ni.  Bohrok ni a sumsok no kasujak kha Yaphang 3 o. Bohrok Kaitor bai swkakjak kha, Ha kotor swraimungcha kha, bwkhao dukhu mankha.

Kaitor khairokjak ma bai kok ma rwkha, borokno sumsok ni mwthang nani Yaphang 3:15. Bwrwi ni bwchwlwi (kwthar Mery ni ogo achai nai Jisu) Bo phaiwi diabol ni samung no swkwmai khibi nai 1 Johon 3:8.

Yaphang 3:21 no swijak tongma chwng nugo, borokno mwthang na bagwi Kaitor khachong mani kok, chini bodla thwinani bwthwi kwthar rwphai nani. “Muikur ni kamchwlwi” abo no chwng mania, khoroksa swk thwi phai iakhe. A kok bwtang Hibru ni 11:4 o nugo. Sumsok no kobolwi mano bwthwi bai simi se. Sumsok khlai mani logi logino Bugrano ratharwi ma iaphar kha. Bwkha twijak nai kwrwi, Kaitor ni dagimung bai se ratharwi mabarogo.Abo borok no phunuk sukmani, bo sumsok khlai mano sirwmani tai ratharwi barokna nang mano. A bwthwi sarjak mani, bo sumsok ni iokna nang nai tai thwinani iak ni mwthangjak nani.Hibru 9:22

Adam ni bwslasong takhuknwi, Cain bai Abel Kaitor no iaphar na tubu lai kha, Cain hwn khe hani bwthai bubar no Kaitor ni thani tubu kha.Abel hwn khe achai swkang mera bwsa tubu kha. Abel ratharwi barokma no Kaitor iachak kha.Cain ni iaphar mano khe Kaitor norwi rohor kha. Chwng sai man makhe Cain tubu mani abo rok wng kha a sajak tong mani kok hai kalbari Kroso thwi nai mari wng ia. Cain bini buphaiung Abel no belai khe nasle jolijak kha, ulo bono bwtharwi khibi kha.

Kaitor puila no” Mari” phunugwi rwkha Cain no Yaphang 4:15. A marirok tabuk bo manthogwi tongo, hani takjak manwi khwnwirogo. Hani mairangrogo rikjak hani golarogo rikjak manthogwi tongo. Laibumani swkang Babilon no aborok tabuk bo tongo.

Swkang no Kaitor Moses no kerong rwkha Lamrwma 20. Yaphang bijabo kubui no chwng nukha Kaitor chongwi tonma rok. Swkang iaphango no Kaitor sabbat sal ni kokno tongwi phunuk kha, Yaphang 2:1-3.Tai borok kailai mani, kaijak mani Yaphang 2:24.Tai thaisa kerong chio kaisa rwmani, abo no khuktang di Abraham ni kok no Yaphang 14:20 tai  Jacob ni kokno Yaphang 28:22. Kaitor borok rokno omo hai khe phwrwngwi kwlang kha, borok wng kha Kaitor ni bandari bini tong mani bebak.

Borok puila sibai mani (Civilaization)

Twi torwi swngchar kochokia sini swkang borokrok sima no antediluvian sima hwno. Twi kotor bai bujthumwi sokomojak bai kha.A borok rok sibai mani wng kha Cain ni bosong ni borokrok, abo twikotor bai khe sokomorjak bai kha.

Baibel phwrwng mano, archaeologist song a kokno kubui hwnwi phunuk kha.Twi kotor toria sini swkang borok belai hamia sitra simi wngia, Bohrok simani bo belai khe no iak lailai kha.Swngchar ni manwi khwnwi ni kokno, Yaphang 4:16-22 oro khursai sajak tongo. A twitor mani swkang ni kokno bebak saiman nai kwrwi tamo khe bohrok tonglang mani thai no khe chwng sai man kha.Tai bohrok, takmani, tan mani manwirok rutugwi man kha,Baibel samani bohrok ni kok, bohrok  sibai mani mari manjak kha.

Ur, Kish, tai Fara aouli kwtham twitor mani iagulo baijak nok,manwi khwnwi akonrok man  kha.Abo no man nai wng kha Professor Woolley (Bo wng kha archaeologist). Bo British Museum tai Pennsylvania University bai naitukna rohorjak mani. Ha tola rungjak kwbangma holongrok, tamjak nai manwirok, gola kaiamaia rikjak mangpilirok, mungtok (Seal) it ha kwkham akonrok man kha, a aouli kwcham rogo, Yaphang 4:16-22 no phildi tho nailai anw, Elembago borok sibai mani kokrok no twi samani kok rokno.

Puila ni Lakhua. Ada Jabal no mankha, bo wng kha tambu nogo tong nai tai malmata rinairok ni bupha. (Yaphang 4:20)

Second, Nakachi, Bini takhukni mung hwn khe Jabal, bo wng kha bebak chongpreng, sumui tamnairok ni phupha.(Yaphang 4:21)

Third, Tak kwrwng, Tangkwrwng, Zilla Tabal-cain no man kha,bo pitol bai sorni manwi taknai (Yaphang 4:22

Paithago, Nok tangnai, Cain bihik bai thukha chakha, hake Enoch no man kha tai bo kamiyung kaisa snam kha tai a kamiyung ni mung bwsla Enoch ni mungwi phar kha. (Yaphang 4:17)

Cain a dopha sima jorani (civilization) phwrwngpha abo Greece eba Rome bai baksa wngwi mano. Tamo khe Kaitor bohrok no bujthum kha. Tamo wngwi? (Yaphang 6:5-7)

TWI TORMANI (Yaphang 5-9)

Twitor mani kok Baibelo swrai sa khe sajak tongo. A kothoma abo ni bagwi sajak ia abo khwnathotok hwnwi.Tamo ni hwn khe a laibuma o gothok bumani wng kha, mwthang nani kok no Baibel sama ni se.Chaia sitra bangsuk kha. Kaham tong mani bebak no swkwma sugwi khibi bai kha.Khoroksa borok se kaham tong sio,bo wngkha Noah.Kaitor twitor rwmani le swngcharo kaham no tubu phina bagwi se.

Adam bai Eve wng kha sak sak belokjak kha, tamo khe tabuk ni borok rok hwn khe bwkha bisingo se belokjagwi tongo. Bugra ha saka o borok rok ni samung hamia kwbang nuksuk kha, bebak no bohrok ni kha uansukma rok hamia mang se kuplung wngwi tongo. Yaphang 6:5Kaitor tabuk soichajak kaham no hamia sitra ni swkak kha. Bo chongjak bosong ni bagwi puila iapiri sekha.

Sumsogo kwlai mani iagulo Kaitor kaisa kwtal khe chengsa mani, tamo khe ulo hamia sitra se bangsuk sio, hai phano khoroksa borok wng kha soichajak, Bo wng kha Noah.

Kaitor kha logwi nasingsuk kha borok no mwthang nani. Phola Kwthar bo chaitok suk kha a samung no twiwi. Noah nokha bisi 120 jora borokrok no Hus khlai mang tong kha, rungkotor tanwi tongma jora. Noah tai bihik,bwsla song takhuktham,bohrok ni bihik song, bohrok ni logi abulgwnang malmat tai kwthar malmat chibrwi no twiwi rungktoro hablai kha, sak no mwthang nani.Sal salsini nasing kha twi toria sini swkang, haiphano borokrok Kaitor ni khairokma no iachak lailia, abo ni bagwi Kaitor bohrok no sokomorwi khibi kha (Yaphang 6:7). Noah khe a twikotor ni iok kha, rungo tong ma bagwi.( abo wng kha Khristo ni mari, mwthang nai swndwk) Bo rung ni ongkhorwi phai khe no puila , Kaitor ni haia tangwi  Kaitor no khulum gra kha (Yaphang 8:20).

Kirimasingcha khe Kaitor swngchar no bujthuma bagwi, Kaitor khorokchar borok rok no kwthang narwk kha.Bo bohrok no swngchar ni logi kwthar khlai kha tai swngchar no naikini khlai na bagwi phan rwkha (Yaphang 9:1-6). Swngchar ni bebak rangma gwnangrok hapungo, twio tong bainai rok no twidula na bagwi phan rwkha. Puila Kaitor borok no human Government rwkha. Borok Kaitor ni wngwi swngchar no naikini khlai na bagwi barja iapharjak kha.Barja kotor Kaitor bohrok no iapharma khe, borok buthar khe a borok bo butharjak na nang nai (Yaphang 9:6). Kaitor omo hai kerong snam kha borok butharnai rok, butharjakna nang phinai (Capital punishment).Kaitor tabuk phano a kerong no mwthakia kho, swngchar ni government. Kaitor abo no tabuk phano langma tongsak alongo chobwi tonma ni, abo bai slai iakho.Abo se borok ioknani lama.

Sir Charles Marston agini kwcham manwi man ma rok no kwtharwi salang kha tabuk modern borok rok rutukma no.Bo kwbangma rutugwi man kha ha bisingo kwmajak manwi rok no.Elembago salang mani kubui kok rok no manju phai kha.A samung no Sir, Charles Marton “archaeologist of a purpose” hwnwi mung phar kha.

Marton sakha, Yaphang bijab ni puila berem o salang mani abo no wng kha Euphrates twi rukung ni kok. Abo no kitingwi tong mani harok wng kha, Shinar, Chaldea, Mesapotamia akonrok.Abo no Babilon, tabuk hwn khe Iraq.

Abo wng kha, haching panthor kwchar twi twima kotor Euphrates iorwi tongo, Persian Gulfo thangwi kwlaio.(Persian twijwlang) tamo khe a haching panther o no agi ni kwcham kamiyung kwbairok kwlaio.Aro twi twlang mani nalarok mano,abo tabuk haching bai phobjagwi thang bai kha.

Ha khurwi (excavations) kwbangma kwmjak baijak kamiyung no rutugwi man kha, abo nokha bisi 5000 jora ni tomung kwmajak tongmung chamung akonrok manjak bai kha.A manjak mani jora wng kha bosong kwnwi ni kwmai thang mani kok, abo rok khe Sumertians bai Semites song ni kok.A Semites song mung nakha Shem ni mung twi,Noah ni bwsla okra. Hibru dopha khe Abraham ni nukhung twi torsai logsai phai kha.

Archaeologist rok Mesapotamia no rutuk man phuru swngchar kuplung twi tormano kaham khe saiman kha.  A cuneiform swijak tongmarok no twikotor ni kok no phunuk kha, kwbangma kwbai manwi khwnwi manjak kha. A kirimasingcha wng mani tabuk bo cuneiforms library rogo khatijak tongo.A hani takjak manwio khorokchi raja ni mung swijak man kha, bohrok twitoria sini swkang hao raja chanairok.

Dr, Langdon twitor mani kokno rutugwi man kha Kish kamiyungo, Babilon gana.

Dr. Woolley rutugwi man kha kwbangma rungjak manwi khwnwi rok a jora borok rok twima no, Ur bai Chaldeeso hakhurwi rutuk phuru.Abo rokno hakhurwi rutuk mani hwn khe Bagdad bai Persian Gulf kwcharo. Kish o hakhur phuru manwi mung nwi belai nangkuk mano man kha, kaisa tai kasani berem chichuku feet tola.

Dr. Langdon Ur ni ha tola man mani  hai hwnwi sao,Babilon bai Assyrian ni swinairok swilang kha,Twitor ia sini swkang ni kok rok no,A kokno raja khoroksa lobsai samano man kha. “A twitor ia sini wngmarok no bo khuktangwi chajak mani kok.”

BABEL (Yaphang 10;11)

Swngcharo twitor mani iagulo taisa kwtal khe cheng lai phio kha. Tamo khe kaitor Sama twi swngchar gwnangwi thang di, ha saka borok bai supung di hwn mano khlai lai lia.Bohrok nok kotorma kuchuk khe se tang lai sio, Kaitor ni kok khwna na nai lia.Bohrok kha kamani swngchar no bohrok naikini khlai nai, Kaitor no karwi. Abo ni bagwi bohrok bujthumjak kha, bohrok kaisa tai kaisa ni kok man lai lia, bodol kupurwi ma thang bai kha, janija lama twi.

A bongsorok dopha dopha khe, juda juda kok bai kaklai thang bai kha,Noah ni bwslasong takhuktham  Shem,Ham,Japheth. Shem ni bwslasong Arabia hao salkabai bwkhak tongwi kha tai Ham ni bwsarok khe Africao tongwi kha. Tai Japhet ni bwsarok khe Europe.

Jihudirok ni Laibuma kwrwng borok kotor Josephus sama khe, Babel nok kotor kuchuk tang ma khe, borokrok Kaitor ni thani sakno iapharwi kok khwna na muchungijak ia.

Chwng khuktang kha Yaphang 11:1-9 no, aro chwng manma hwn khe Kaitor ni muchungma bai bohrok ni muchungma wng kha koktanjak kok. Abo ni bagwi no bohrok kok chablai manlia, kok buji lai lia wng bai kha, ha gwnangwi piring poroi ma wng kha. Juda kok wngma bai borokrok ma kaklai kha, bania khai thani dikdar wng kha, borok rok hamchai manlia.simabo rwngsuklia.

Borok sakno se torwna naisio, sak chwngsacha khe tong nani. Kaitor muchungwi chong tonma khe, Bono khulumwi bini chwngsacha khlai tong nani. Borok bai lobjagwi tong nani. Nwng Yaphang 10 bai 11 berem no khuktang khe, nwng aro man nai tamo no twiwi dopha ma kaklai kha, Noah ni bwslasong takhuktham Shem Ham tai Japhet ni bising twi. Tamo wngwi ma kaklai kha aro man nai.

Noah ni nukhung ni bongso rok kha khlaio bohrok Armenia ni phai khwna, Aro no a rung kotor no bathak ma nugo, Babilono kiphil phikhwna, bohrok a rung tan mani thaio.

ABRAHAM NO RINGWI TUBUJAK MANI (Yaphang12-38)

Borokrok ni bwkha hamia sitra wngsuk phano, Kaitor khairokma phunuk kha, Bini khairokma bai.Bo borok khoroksa no chongwi na nani muchungjak kha:

1. Sabo ni iago, Elembag kwthar no iapharwi man.

2. Bui ni dopha o, Bini wngwi sasong sai man nai.

3. Sabo ni bising twi smai tangjak Masia phai nai.

Kaitor, Abram no ring kha, bini kami wng kha Ur Chaldees takjak mwtai khulum nai dophani borok. Sinia nukia hao thang na bagwi ringjak kha, Kaitor aro bono bebak dopha ni bupha snam nai (Yaphang 12:1-3; Hibru 11:8-19). Aro no chongjak dophani Laibuma chengjago.

Abraham jesa thaio phano thang thung  aro no Kaitor ni haia snamo tai Bono khulumo.Kaitor bono mari phunuk kha bono borom rwmano, Bo sak baithang nukjak kha Abraham bai.Bo “Kaitor ni kiching” hwnwi ringjak kha.Kaitor bo bai smai tang lai kha, Bo dopha kotor ni bupha wng nai.Bini bising twi swngchar ni bebak dopha hamari man nai  (Yaphang 12:1-3). Kaitor bini nukhung no uanamasingcha samung berkha. Kaitor bohrok no samungo phwnang ma hai tai kuno dopha no abo hai  khlai ia. Abo ni bagwi Jihudi dopha hwnjago Kaitor ni chongjak dopha.

Issac, Abraham ni sajla ni bising twi Kaitor smai tang mani Jacob ni thani khlaijak kha.Bini aswk chaia tong mani bising twi phano Kaitor ni smai tang mani hamari rwjagwi phai kha. Kaitor ni muchungma no twiwi bo belai khe khatungjago, abo ni bising twi swngchar hamari man nai. Jacob aswk urpatiui dukhu man mani wng kha bini sak sak ni sumsok ni bagwi se.Abo ni bagwi a borok kotor Kaitor bai swprajak kha. Bini bumung Jacob ni slaiwi Isreal hwnjak kha, “baslang” Kaitor bai mung rwjago. (Yaphang 32:38).  Isrealites - mung bai no Kaitor ni chongjak dopha ringjago. Bini bwslasong khorokchinwi, dophachinwi ni bupha wng bai kha.

BONGSO ROK EGYPT O (Yaphang 39-50)

Isaac bai Rebecca belai khe chaia khlai ma tongo, khoroksa no hamjagwi tai khoroksa no normani, bwsarok takhuknwi songno. Isaac, Esau no hamjago, tai Rebecca khe Jacob no.Ulo Jacob bo omo hai Joseph no khlai kha , tai bwslasong Joseph no naslejak bai kha. Joseph wng kha  Baibelo khoroksa  borok kaham hwnwi sinijago . Joseph ni bising twi no Jacob ni nukhung Egypto sogwio. Joseph ni langma hwn khe belai nasikgwi swrwngjak nai, Baibel ni bisingo kubui langma, Kaitor borokrok no naiwi hamari rwthani.  Nokha bisi chisini bisio bo seleng khlai phalwi rohorjak kha. Nokha bisi thamchio bo Egypti ni naikini khlai nai kotor wng kha. Nokha bisichi (10) ulo bupha Jacob Egypto kami seui thang kha.

Isaac thwi mani tai Joseph Egypto phaljak mani iagulo se, Jacob tai bwslasong khorokchisini borok kami sei ma thango, chacharara nang mani bagwi. Aro bohrok thangwi Pharaoh bai lamsokjak kha,a jorani habugra.Bohrok no malmata rinai hwnwi sai manwi,bohrok no Goshen amchaio tong nani rwkha.Bohrok aro borok bang kha tongma chama hamchai phai khe,”lakhua raja” bai twiduljak kha.

Kaitor sai mano, bohrok Canaan iakarwi thang na nang mani bohrok dopha kotor wngra na nang nai phan ma khagra nai, Canaan hano iago nana hwn khe. Kaitor bohrok no hus khlai na muchungjak mani, a hao mwtai tagwi khulumnairok bai kwtha iai tong nani borok ni bwsarok no kaijak iai ton nani.

Khuktang di Jacob thwi nani swkang khorokchinwi bwsarok no tamo salang kha, (Yaphang 49). Aro chwng tai uaisa nugo Shilo smai tang phi mani, sabo a naikini khlai phai nai. Muitu khe nai di, “Juda bosong ni Singo, David bosong ni a borok kotor kwplai wng kha.” (Phunukjakma 5:5)

Yaphang bijab wng kha paithago, Chenwi thang kha.Paithak ni kok wng kha Egypt o  mangkhok . Sumsok lama le mathwi nai, Sumsok khlai khe ma thwi nai (Rum 6:23). Borokrok Mwthangnaisa Bugra no nango!

Aro borok khorokchar ni bumung Yaphang bijabo khursajak, abo rok no muitu narwgwi tondi: KAITOR, ADAM, SOITAN, NOAH, ABRAHAM, ISAAC, JACOB, JOSEPH.

Thaidok Thai tongo Yaphang bijabo laibumao belai khe nang kuk mani muitu khe tondi: EDEN, ARARAT HATHAI, BABEL, UR ni CHALDEES, CANAAN (smai ha) EGYPT.

BWKHAK 3

Lamrwma Jisu no hwno, iokma ter ni mera bwsa

Lamrwma bijab wng kha Yaphang bijab no rwkthar nai, Smai kwcham bai Smai kwtal ni halok hai. Yaphang bijabo sao bebak jora no, borok belokjak phuru mechenjak mani kok. Lamrwma bijab khe khatungrwi rwo aro wngmarok no twiwi, Kaitor borok no rutugwi tubu mani.Aro tai bo sao, Kwplai kaitor borok no mwthang na bagwi  samung khlai mani.

Lamrwma bijab wng kha Smai Kwcham ni bijabrok ni slai mungkotor mwthangna samung khlai thani. Omo mwkhang kosom khe chengjak mani, mwkhang kwchwng khe paikha.Omo sai khwnarwkha,bahai khe kaitor khairokma bai seleng khati tong nairok no aro ni phiogwi tubu kha. Kaitor bahai khe chwngsacha khe khajak tong nai borok no phiogwi, mwthangjak borok rok bai baksa khe ton phai mani.

Lamrwma Greek kok bai hwno, “Lama Khlai iokmani.” Yaphang bijab kwrwi khe Lamrwma bijab mungsa bo chukia. Kokthai “tabuk” bai chengo omo “tai” hwn mani se,. Omo wng kha a kothoma chengsa phima se. O bijab wng kha tai kubun Smai Kwcham ni bijab hai khe no chengo “tai” kokthai bai. Omo tamo hwn mani hwn khe, a swinarok abo bohrok ni uansugwi swimani wngia,omo wng kha  a kothoma paisukia kokthoma no manjuwi swi mani se.Phai nai salo tamo wng phai nai abo no phunuk horwi swi mani. Moses ni kangba bijab no naidi, Yaphang, Lamrwma, Lebi, Lekhamung, Uainwi saphima. Kangsa kangsa bijab mungsa swk no twi sao, tamo ni hwn khe a kangba bijab kangsa bai kangsa kwthalaijak.

Lamrwma bijabo muitu khe narwkjak nai:

1. Borok kotor MOSES

O Bijab wng kha Moses ni kothoma no twiwi swio.Kaitor ni borok kotor: Moses jora lairwi rohor mani.

Bisi chibwrwi (40) sak no kotor hwnwi uansuk tong mani.

Bisi chibwrwi (40) sakno uansugwi nakha mungsa chuklia hwnwi.

Bisi chibwrwi (40) sakno sai man kha, a chukjaia borok no Kaitor kotor samung khlai rwi mano. Naidi Hibru 11:23-29)

2. Kerong

Bijab ni paithani khaksa (19-40) abo chwng no phwrwngo phiokjak borok bo phioknaisa ni muchung twi ma tong nai. Bini samung khlai na bagwi sak makhlai thai. Sak no iaphar sugwi bo bai twitherjakna nang nai.  Abo ni bagwi tongmani kerong (Moral law) rwjak kha, tai samung kwthar ni kerong (ceremonial law) bo rwjak phio kha.Tamo ni hwn ba tongmung kerong swbai nai rok no phiokna ni.

3. Nokthar (Tabernacle)

Kaitor nokthar rwmani wng kha mwthangnaisa phai nani kok no swraisa khe samani se.Bini haba nok ni kok. Tai Bo chwngsacha khe tong phai nani ha sakao, omo wng kha uanamsingcha khristan kubui ni mari.

SELENG KHATI NI (Lamrwma 1:1-22)

O bijab swina cheng phuru dophani omor wng kha bisi ratham khaksa .Yaphang bijab swi paidrob.Yaphang bijab wng kha nukhung ni laibuma no twi swimani.Lamrwma bijab khe dophani laibuma no twi swijak. Chwng sai mansuk ia a kwcharo tamo wngwi siringsa khe ton kha. Achaiphang Abraham thwi phuru busuk Jacob bisi Chiba ni borok. Jacob ni hamjakma bwsa wng kha Joseph, bono seleng khlai phalwi rohorjak kha Egypt hao.Bo aro thangwi borok kotor phan gwnang wngwi kha. Jacob ni tai bwsarok aro thangwi maia manwi kha, tamo ni hwn ba Joseph bohrok ni takhuk tongma bagwi.Bohrok Egypto nok selai thang phuru borok khorokchisini tong mani tamo khe bohrok Egypt ni ongkhorwi phailai phur khe borok 3,000,000 aswk borok bang kha.

Joseph thwi kha, kwtal borok pharaoh wng phai khe. Raja ni nukhung slaijak kha, Egypt hao.Bohrok ni rang maino tai borok bang mano nugui a Egypt ni borokrok kaham mokol bai nasik manlia.Pharaoh bohrok no maia chalia, chajakia wngwi bohrok no khak kha.Bohrok no seleng snamwi samung bai dukhu rwkha.Bohrok ni bagwi aro belai khe tong kesebwi phai kha, bohrok iokjak borok hai khe tong lai man lia.Aphuru bohrok Abraham tai bini bongso rok bai Kaitor smai tangma rokno muitu manlai kha,tai aro seleng khati ma tong mano bujina ni belai khe tuk kha. (Yaphang 12:1-3)

A kothoma no Lamrwma.Lebi, Lekhamung, Uainwi saphima bijabrok swijak kha.Kaitor tabuk bo Bo smai tang mano pokjak iakho , Bo Abraham no kok rwmani – Ang nono dopha kotor snam nai (Yaphang 12:2).

Nukhung ni kothoma, Abraham, Isaac tai Jacob bohrok ni kok Egypt ha jora sogwi kha.Abo Isreal dophani Laibuma kwcham bwlaio khobjago. Bisi kolokma seleng makhati tong phuru, bohrok muitu khlai ma tonglai kha salsa bohrok Canaan hao ma tongwi nai.

Chwng nukanw Kaitor phaiwi Egypt ni bohrok no phiogwi tubu mani. (Lamrwma 3:7-8).Tabuk nai di khoroksa khoroksa tong mani tai nukhung wng kha tabuk khe dopha kotor wngwi ongkhorwi phai kha. Kaitor bohrok no kerong rwnai bohrok sak naikini khlai lai nani.Tabuk bohrok no kiphilwi tlang nai ha rwna hwnwi bohrok no kok rwmani hao.

LAMRWLAI MANI (Lamrwma 3-4)

Tabuk uansuk di bohrok aswk borok kwbang ma pal khe ongkhor lai phaina ni jugali lai mano. Isrealite Ramaseni lam rwui Sukot phasing lam rwlai kha. Aro bwrwirok bai chwrairok no karwi dok rasai kaanw. Tai daljak kubun borok rok bo kwbangma bohrok bai baksa tong bai kha,Tai kwbangma merarok punrok malmatrok bohrok bai baksa lam rwlai kha.( Lamrwma 12:37-38).

Kha ta twi di, omo kaham khe jugali thang na ongkhor laijak.Moses Pharaoh no saphlai tong kha Isreal dophano iakarwi rohor nani , bohrok no thang nani rwdi (Lamrwma 5:1;7:16). Aro boknangmani bagwi Moses Pharaoh bai kok salai kha, abo hai khe bisisa lai thang kha.A jorani bagwi Jihudi dopha bohrok jora man kha bohrok ni manwi khwnwirok no thumwi khati tubuna ni. A boknangmani Jihudi dophano samung kotor kotor phwrwng kha.Abo hai khe no Pharaoh no kok bai sinkwlwk mani kwlai kha, Isreal dophano iakarwi rohorna ni.

Samung kotor tang nani swkang samung khlai na bagwi jai jai khe chongwi blueprint snamwi nao, tai abo ni petarn twi khlaijago. Abo hai khe no Kaitor bo chwng no mwthang na bagwi khlai kha, swngchar snamjak ia sini swkang no (Epis 1:4). A petarn no chwng Lamrwma bijabo mano. Lamrwma bijab wng kha laibumao Kaitor ni khairok mani mangpili, borok no Kaitor mwthang mani Jisu Khristo ni bising twi.Je borok salsa chini bagwi apostle kotor Moses,tai Ochai okra Aaron (Hibru 3:1).

Lamrwma bijab ni kothoma wng kha haino hai sajago,chwng je phuru sumsok ni iokna bagwi chaitok tongo, tai swngchar ni tongmung iakarwi phaio.Abo no nai khe omo borok nasik twi,puila bwtang ni simi paithak bwtang jora.Aro je wngmarok wng kha, mari phunuk mani se.Abo borok no bwkha tung rwna bagwi se swijago. Chwng Lamrwma bijab bo omo no swrwng kha, Kaitor ni muchung twi sumsok gwnang borok no mwthangwi phiyok mani. Bini khairokma samung ni bising twi chwng no rutugwi tubukha.

IOKMA TER (Passover) (Lamrwma 12-19)

Lamrwma 12 berem belai kwnathothok khe Iokma ter ni kokno salang kha.Omo chwng mwthangjak nani kok no Smai Kwcham sampili hai khe phunuk mani.Jisu Khristo ni bwthwi kwthar bai poito khlai mani bising twi.O beremo no Jisu Khristo no “Kaitor ni mera bwsa” hwnwi sajago.Khristo chini bagwi iokma terni mera bwsa ratharjak mani.Kalberi kroso thwi kha mera bwsa hai khe.

Tamo ni hwn ba chini iokma terni bagwi mera bwsa tanjak kha,abo no wng kha Khristo (1 Korinth 5:7).

O iokma terni kok no berem ni kokbothoma tai kwchar ni kok abo hai no bijab ni, chwng no mwthang nani kok.

Lamrwma bijab ni kok wng kha Iokma ter ni kok, borom gwnang kothai (Lamrwma 12).Isreal dophani bwsarok o kok no sai mansuk bai o ter bwswk nangkuk mani, bohrok a horo Egypt o manjak phai mani.Tamo khe bohrok Kaitor no poito chaui tai bini kokno khwna lai kha.

Kaitor Egypto uaichi boknangrwka, Pharaoh ni bwkha no gosi rwnani, bohrok ongkhorwi thang thung hwn rwnani.Bisisa lai kha,a kaisa kaisa bokmanjak bai mani,aphuru belai khe dukhu man bai kha, Pharaoh ni bwkha ragwi tongma bagwi. Paithago khe Kaitor hai hwnwi sakha,Egypto achai swkang jotono ma thwi bai nai. Abo Jihudirok ni thani bo kwlai nai, bohrok mera bwsa tania hwn khe,a mera ni thwi bai bohrok katirwjak nai. (Lamrwma 12:12-13).

Bebak borok no o kokno ma swrwng bai nai, abo chuknoha ni dagimung iokma ter, omo oro swraisa khe swijak tongo Lamrwma 12.

1.Mera bwsa no twi di tho

Hibru 9:28; Jisaia 53:6; Johon19:14; 1 Korinth 5:7.

A khain kwrwi mera bwsa bohrok no mwthang ia. (Hibru 9:22;1 Johon1:7; Phunukjakma 1:5). Khristo ni sumsok kwrwi langma chwng no mwthangia, Tamo khe Bo kroso thwima bagwi se.

2. Bwthwi sarmani

Mera bwsa ratharma bai simi wngia, bwthwi simi bai wngia, abono sago phwnangia hwn khe. Bebak Jihudi bwsarok abo no dogaro phulwi ma tonnai. Dogolam ni phataro se bisingo wngia. Nwng o bwthwi bai tamo khlai kha, chini a iokma ter ni bwthwi, kalberi kroso thwi nai no.

Kwkha bwlai (Hyssop) - manthokma jabra jotono kholwi mano – abo poito ni kokno sama se. A dogar bokhorok ni bwthwi se bohrok no mwthango. Bohrok tamo uansugwi tong abo bai wngia, tamo khe bohrok tamo khlai kha bo bai se.

Ang thwi no nuk khe norok no laiwi thang nai (Lamrwma 12:13).

Twgo tonjak bwthai wngia, tamo khe a thwi no phul khe Phola mwthangjago.Joto kalberi kroso thwi rwma bai bo Phola mwthangjak ia, abo no sago phulwi naia hwn khe.Ang thwi nuk khe ang norok no laiwi thang nai.

Bwkha muchungwi tongma bai simi wngia, sak kaham wngwi khlai man mani bai boia, tamo khe mungsa bai se mwthangjago – BWTHWI (Hibru 9:22)

3. Mera bahan chadi

Mera ratharwi bwthwi sarmani iagulo, aro dagijakma tongo chana bagwi. Chwng bo puila mwthangjakna se nang grao,- Phelosip,khuluma, tong nani tai bini samung (seba) khlai nani. Chama bai bohrok mwthangjak ia – tamo khe puila bwthwi se nango hake se chamung kaham chana ni (Johon6:54-58) ani bahan se soini chamung.

4. Chuan kwcham no kibi rwdi

Ano chanai naidi ……ani thani hamia da tong tung lagn nai jadi (Lobmung 139:23; 24). Chuan wng kha sumsok no hwn mani. Pharisai song ni chuan (Mathai 16: 6). Chuan kwcham hai o sumsok no khibi rwdi.(1 Korinth 5:7).Chini sak ni chaia chukia chuan no khibi rwdi,chwng Kaitor ni bahan chana hwn khe.

5. Jabra kwkha

Khristo chini bagwi a kwkha khuri no nwng kha tai khajaksuk kha. Chwng bo satokjak na nang nai.Chwng bujak phuru kisa ia kisa tongthokia hai ma tongo (Hibru 12:11).

A mera bahan no kwthwng chaia, munchwla bo chaia, tamo khe a mera bahan hor bai sokjagwi dukhu manwi ma thango. Phonsa bo karjagwi man glak,dakti ma chabai nai bara ton man glak.Tai bekereng bai man glak! Khristo ni bahan se kwsa chaphano bekereng bai lia (Lobmung 34:20; Johon 19:36)

6. Ongkhor na tiyar wng di

Bohrok a chamung no chalai kha – Bohrok buro thang lai nai sia.Lam rwlai nani bebak manwirok jugalijak bai kha. A horo omo bwswk khe pherlaijak-Jihudirok ni nogo chamung nwngmungrok bai tongthoklaijak; Kirimasingcha bwkha khamlaijak Egypt rok ni nukhungo.

Chwng oro iokma terni kokno khuktang lai kha.Tabuk bohrok thang na ongkhorlai kha. A iokma ter bohrok no kwrak khe romkha. Twichak twijwlang barlai  phuru bohrok ni poito raksuk kha. Bohrok Egypt ni onangkhor lai phai phuru bwthwi bai twitherjagwi mari phunukjak kha.Bohrok twichak twijwnglang bar lai phuru Kaitor twidulwi barlwi rohor kha, thanglaisuk sinai hwnwi bwkha kwrak khlai lai kha.Kaitor bohrok no swkang agogrwi tlang kha tai bohrok ni ukolok ni dugar soirwkha!

Ang ha Egypt ni ongkhorwi phai phuru (Lamrwma 13:8). Nwng buphuru ongkhorwi phai kha? (muitu khlai di Egypt wng kha Swngchar bai sujago).

KERONG RWMANI (Lamrwma 20-24)

Kerong iapharjak mano chwng nugo Lamrwma 20-24 o, swbaijak kha tai snamjak phikha.Aswk jora laibumao Jihudi dopharok wng kha Kaitor bai khairokjagwi hamjakma ni jora. Seleng khatilai tong phuru bohrok kaplai tong mano, Kaitor bohrok ni kapmano khwna kha.Kaitor khoroksa borok no dophani okra khlai chong kha tai bono phwrwngwi tisa kha. Kaitor bohrok ni arirok no mechen kha. Kaitor bohrok no charwi tubukha hai phano bohrok Kaitor ni kok no khwnlai lia. Abo ni bagwi tabuk kwtal khe tongmung rwkha Sinai hathaio.

Kerong bai chasugwi man nai hwnwi uansugui namani wngia. Lobmung swinaisa sao, Bugra ni kerong khe kaham (Lobmung 19:7-11). Khoroksa borok simi se a kerong no rakhogwi twi man nai tongo, a kerong iapharjak phuru ni simi. Khristo a kerong no rakhogwi simi tong lia,tamo khe a kerong ni rwthai tongma no rwibai suk kha, kerong swbai nai rokni  bagwi. Khristo dukhu man kha chini phikung katirwna bagwi.(Hibru 9:13-15;10:1-22;1 Pitor1:18-20.)

Borokrok kerong rakhogwi se man ia hwn khe, tamo wngwi kerong no iapharwi rw? Kerong borok no sumsok khlai rwia, Tamo khe chwng no sirwna se naio chwng bwswk khe chaia sitra sumsok twi tong. Borok no sumsok gwnang hwnwi se phunugwi sao. Dactor phaiwi a chwraino nai phai kha a bemar no man kha, bo painaloti se pajago. Bo bono bithi kwlang kha,abo chakhe no ham nai. A dakor bono painaloti parwma ni wng ia, tamo khe bo sai manrwkha a chwrwi painaloti se pajago.(Galatia 4:4-5;Rom8:1-4;3:19-28.)

Kaitor ni kerong wng kha aina, chini sitra sumsok no phunugwi rwo.Kerong kwthar se, kerong dagima bo kwthar sobo soi, kabo kaham (Rum 7:12).

Aro hathai kuchuk thainwi tongo,kaisa tai kaisa bai nahalalai khe,Kaitor ni kogo chajaklai ia.

1. Sinai hathai : Kirimasingcha phirang kogma bai khe Kerong iapahrjak 

   Kha.(Lamrwma 19 no khutang di)

2. Kalbari Hathai: A hathaio khe joto kirimasingcha hor bai pherang    

 norjak kha,sumgwnang borok Kaitor bai malai nani haia snamjak kha .   

Chwng tabuk bahai khe Kaitor ni aro thang nai, Kerong bai wngia khe bwthwi bai (Hibru 12:18-29).

Kerongo chwng chen khe aro ni iok nani lama snamjak lia. Aro mungsa bo chuklia,bebak kerong no twi phano. Mairang thaisao bwlam lamsa tong khe,Gola terejak hwn khe abo no tai samungo phwngwi man ia wngwi thango.Chini thani bo mungsa chaia tong mung tong khe,Kaitor ni kerong no swbaikrubwi khibio.

Karong no mungnwi bai bago:

·         Kerong ni bising twi borok Kaitor no nasik mani.

·         Kerong ni bising twi borok bini logisong  no nasik mani.

Kaitor se o kokthairok no chwng no rwo hwnwi sao (Lamrwma 20:1). Kaitor a bebak sasong no sao, borok a poja bokjak mano iachak kha.Khuktang di omo tamo sa, Lamrwma 19:8. Tamo wngwi Jihudi dopha kerong no ma iachak kha, khairokma no siniawi? Borokrok kungchukma bai sak uansugwi nao, bohrok sak sakno Kaitor no bwkha phurwi mano hwnwi. Jihudi dopha kerong rwjakia sini swkang no,abo no twi musuk bwsa tagwi khulumlai mwsalai kha. Bohrok sak iak bai takmano khulum kha (Lamrwma 32:1-10,8).

KAITOR NI NOKTHAR TANGLAI MANI (Lamrwma 25-40)

Lamrwma 25-40 abo chwng no kaisa belai khe tongthokrwi khatung rwkha. Chwng omo no uansugwi ma nanai kwthar ario habma no kaham khe nasik matong nai. Kaitor Moses no sakha, Bo kwthar haia o tongna muchungmano,abo Khristo no se sahorma kwlaio, abo bono tai bini samung ni kok no sahormani.

 Phatar ni Kerong nok

Oro chwng nugo pitol ni haia takjak, aro no bahan sogwi iaphar mani thai.Muitu khlai di, Jisu wng kha chini sumsok ni bagwi iapharjak nai mera bwsa (Lamrwma 27:1-8).

Ochairok kwthar thaio hab nani, bono puji na swkang sak sutrona ni bagwi aro pitolni dangai tongo (Lamrwma 30:18).

 Kwthar Ha

 Aro rangchak ni chati thopona tongo,(Lamrma 25:31-40) Abo Khristo ni mari, Bo swnghcar ni pohor tai kwthar songphang.(Lamrwma 25:23-30).Khristo se langma ni chamung,tai rangchak ni satrai sokjak nai haia  (Lamrwma 30:1-10).Abo Khristo chini bagwi suri sanwi tong mani mari.           

Kwthar ni slai kwtharkuk

Tabuk chwng a naithok ri swngjak ni gana thang khe, (Abo Khristo ni bwsak ni mari) aro chwng nuk nai kerong swndwk no, abo Kaitor kwtharkuk thaio tong mani mari. A kwtharkuk khotolo ochai bisao uaisa ma habo sumsaok sunani salo, bwthwi tlangwi ma saro. Hibru bijab chwng no sai khwna rwo,Jisu chini ochai okra ,tai bono chwng no mwthang na bagwi iapharjak nai.Abo ni bagwi tabuk chwng jesa jora phano a kwtharkuk thaio thangwi mano, bwkha kotor khe kaitor bai malai manwio. 

  Tambu ni Nokthar  

Kwthar rini tambunok wng kha chumui bai chwngsacha khe Kaitor borok rokni bisingo tong phai kha (Lamrwma 25:8). Rini tambu nok wng kha joto borok malai bothob. Tai abo jora jora norlai kuthuma thai.Baksa kok hamia sanairok sao, abo kubui wng ia.A jora wng kha belai kwcham agi ni kok.Tamo khe rutuk nairok rutugwi kari sakha, abo bohrok lamrwlai ongkhoria sini swkang no tongo. Lilen rirogo bwthai sarjak manjak kha, bohrok bwswk tak kwrwng sub kwrwn gwja.Abo hai kwbang ma mangkhorogo man kha rangchak bai subjak rirok.Abo nukhung chinwi raja chamani ni jora tongo, Moses wng kha nukhungchar raja chamani jora.

BWKHAK 4

Lebi Jisuno hwno,Chini sumsok ni bagwi iapharjak nai.

“Kubui khe tong di” Iapharmung sao, Mungba iapharmung: Sogwi iaphar mani, Chamung iaphar mani, khakchang iaphar mung, sumsok iaphar mung tai hab mania hab mani iapharmung.

“Kubui no twi di” Boso jora sao, chamungchar tongo,Sabbat,Iokma ter,pentikost,totro,sumsok gosima, tambunok,Sabaat bisi, tai Jubili.

Lebi bijab wng kha sumsok sumani bijab hwnjago (Leb 16:30-34). Kaitor sao, Ang kwthar ba,norok bo kwthar wng di (Lebi 11:44 -45, 19:2;20:7,26).

MANGPILI BIJAB

Lebi bijab wng kha Kaitor ni mangpili bijab, Jihudi bwsa rokno bohrok ni tongthar rwngswrwng thani chubao.Bebak mangpili no phunugwi sao,Jisu Khristo ni samungrok no twi wi. A Lebi mungborom le bohrok ni samung no twi no sajak kha,tai ochai tai bohrok ni samung wng kha tambunogo. Bijab, kerong bijab bo hwnjago.

Chwng muitu ma khlai nai, Kaitor bahai khe Moses no rwkha,Bijab Lamrwma no.Kaham khe sai khwnarwkha bahai khe a tambunok no tang nai,tai ocharok  bahai khe bono mabarok nai, a kwthar khotolo.

Lebi bijab cheng kha “tai” hwnwi, Jihudi bwsarok ni bagwi o bijab chengjak kha Sinai Hathaio Kaitor bohrok no tabuk bo phwrwngwi tong kho, jai jai khe tambunogo Khulum nani.

Yaphang bijabo borok sokthang kha.

Lamrwma bijabo borok phiokjak kha.

Lebi bijabo borok khulumlai kha.

O bijab wng kha jora ni bijab mang bwsak bai Pholano kwthar khe ton thani.O bijab phwrwngo phiokjak borok kwthar khe ma tong nai, tamo ni hwn ba, bono phioknaisa wng kha kwthar.Omo chini phola ni langma ni surani simi wngia, kwthar khe tong langna bo wngo.Abo tai bo uanmasingcha swrwngjak nai bijab, chini bwsak mang no sapsutra khe tong na phwrwngo.Bahan bwthwi no naikini khlai nabo phwrwngo. Jihudi dopharok wng kha kaham khe naijak nai dopha,bohrok ni a tongmung rokno bohrok aswk bisi kolok naithotok khe tong mani.

Omo wng kha chuknoha ni bijab.A puila ni bwtang no chwng no lam phunugwi rwo,Hake Bugra Moses no ring khatai bono rini nogo tongwi hai hwnwi sakha. Lebi wng kha Kaitor kok samani a tambumok ni bising twi.Abo no Bo khlai na muchungjak mani.                                         

A bijab wng kha sakchorai bijab,tola ni bwtang hai hwnwi saphiro,Bugra ni thani borok khoroksa swk iapharna tubu kha khe.Hamari bo man na muchungjagwi tong o,joto no sakni iapharmung ma iaphar nai. Abo ni bagwi no omo belai khe nangkugo iapharnani.Nini thani mungsa swk da tong Bugra kaitor no iapharjak nai? Hake o bijab belai khe nango nini bagwi.

MUNGBA IAPHARMUNG

Chini langma o thaisa nangkuk mani swngmung hwn khe. “Bahai khe khoroksa sumsok gwnang borok Kaitor ni aro thangwi man nai?” yaphang ni simi no bijab o chwng nugo, Kaitor lama twngsa snam kha bono khulum na bagwi.O bijab phiokjak Isreal  Kaitor no khulum na lama twingsa khlai rwkha, ratharwi iaphar mani.Kaitor bai tongsuk na hwn khe kaksugwi tong na nang nai.

Omo belai khe no uanamasingcha joto borok ni bwkhao no mungsa ia mungsa no twi wi sak chaia hwnwi unasukalaijak.Sabo ni thani chwng chaia khlai kha ? Kubui kaitor no khulumia borokrok suda borok ni mwtai no pun tok ratharwi iaphar laio,bo  sai mano bo saichung mungsa bo khlai maia hwnwi.Bo sumsok ni iokna nang nai.Mwtai pujinairok sai mania bohrok ratharwi barokma ni slai, aswk no bohrok sio.Chwng o bijab ni ratharwi iaphar mano naikhe, aborok jotono mari phunuk mani se kwlaio.Kubui sumsok ni iapharmung iapharjak nai Kalbari kroso.

O bijab ni iapharmungrok jotono phunuk horo, Iko nahar di Kaitor ni mera bwsa swngchar ni sumsok no bo se rujui tlang nai (Johon 1:29).Sumsok nakarjagwi mano,tamo khe a rwthai tong mano ma rwgra nai. Sumsok khlai khe ma thwi nai (Rum 6:23). Sumsok Kaitor ni gana phai mania. Bo wng kha Kwthar sumsok no twi tong mania.

Kaitor bai sum gwnang borok kwthai man ia, sumsok nakarjakia kho hwn khe. Nakarjakna hwn khe ratharwi iaphar grana nang nai. Thwi kochok rwkhe simi se sumsok nakarjago (Hibru 9:22).Mungba iapharmung tongo Lebi bijabo kokswbai sajak. Kaitor chwng no muchungjago  a kirimasingcha kubui sumsok ni kok no kaham khe bujinani.Bo salbrum no chwng no ratharwi barok di hwno.

Oro a iapharmung rokni mungrem rwjak kha:

i) Horo sogwi iapharmung:  Swngcharni bagwi Khristo no

 Iaphar mani Lebi 1.

ii) Chamung iapharmung:  Langmao Khristo no seba khlai nani. Lebi 2

iii) Khakchangma iapharmung: Langmao Khristo ni bagwi kwchang kwchang Lebi 3

iv) Sumsok ni iapharmung: Sumsok ni bodla Khristo thwi mani Lebi 4-5:13.

v)  Hab mania hab mani iapharmung: Khristo Kaitor bai khaphurjak mani Leb 5:14-6:7.

HORO SOGWI IAPHARMUNG (Lebi 1)

Iapharmung chengsa kha sogwi iapharmung bai Iapharmung pai kha Aji laimani iapharmung bai sogwi iapharma wng kha Khristo ni mari sak no khain kwrwi khe kaitor no iaphar mani. Salbrum no sogwi iapharo.Khristo salbrum no sumsok gwnang ni bodla iapharwi tongo (Lebi 4)

Sogwi iapharmung wng kha, sak no Kaitor ni thani iaphar mani.Tamo ni hwn ba puila ratharwi se  ma iaphar granai. Kebo phano Kaitor bai chengwi mania, bo sak no Kaitor ni thani sak iapharsugwi rwia hwn khe (Lebi 1:3). Omo no jotoni slai khlaijagwi phai mani iapharmung, agini noktharo.

Sak iaphar nani borok ni samung.

Kwthar khlai na khe Kaitor ni samung.

Chwng sakno iapharo Kaitor ni thani.

Kaitor kwthar khlai o samung khlai rwnani.

CHAMUNG IAPHARMUNG (Lebi 2)

O iapharmung wng kha salbrum Kaitor no diai mani.

Sogwi iapharma khe Khristo thwimani mari omo haino chamung iapharma khe Khristo ni langma ni mari. Kaham auan gungri hwn mani hwn khe Khristo ni tomug kaham ni kok- Bini uansukma kaham, khukni kok kwtwi kwthar,tai khlaimani samung kaham naithok.Tho kaham chamung iapharwi charwanw.Chwng puila sogwi iapharmung iapharwi se bini thani thanglai grana.Abo ni ulo se chamung iapharwi bini thani thang phlai tong lai nai. Langma no iapharwi rwmani abo se iapharmung kaham.Smairatharwi iapharma se chini puila ni samung,Abel ratharwi iaphar kha,Cain omo hai khlai lia.

KHAKCHANGMA IAPHARMUNG (Lebi 3)

Khristo se chini khakchangma(Epis 2:14). Bini sajla kroso thwi mani bising twi Kaitor kwtharw kha. (Kolosai 1:20 ). O iapharmung wng kha Kaitor bai chalai phelosip khlai mani mari.Omo wng kha hambai rwmani iapharnunbg.

SUMSOK NI IAPHARMUNG (Lebi 4 ;5)

Omo wng kha Jisu Khristo Kroso khachijak tong mano phunuk mani, sumgwnang borok ni bagwi.O iapharmungo chwng sumsok gwnang hwnwi sak gosi namani. Nini Phola sumsok khlai khe …….. bo iaphar phai thung.(Lebi 4:2-3). O iapharmung wng kha praichito khlai mani. Tai juda iapharmung tubuma ni wng kha, Kaitor no khulum na phai mani .Tamo khe omo iaphar makhe sumsok ni bwkha khamwi iaphar mani.Chwng wng kha chaia borok khajagwi tlangjak ma hai, chaia khlai mani manjak kha, bwtharjak na nang mani.

Paithago omo hwn khe Sumsok iapharma bai arilaimani iapharma wng kha joto iapharmung ulo phai mani. Omo tamo wngwi ma wng kha hwn ma khe , sogwi iapharmani, chamung iapharmani, tai khakchangma iapharma, bwthwi rwui sumsok nakarjak bai khe iapharo. Kaitor bwsla no iaphar mano iachak kha, abo ni ulo se tai kubun iapharmung abo mari phunuk mani. Mwtai khulum nairok khe bohork ratharwi mwtai no iapharo, Khristian hwn khe Kaitor ratharwi iapharma mano se iachago.

HAB MANIA HAB MANI IAPHARMUNG (Lebi 5:14-6:7)

Khristo chini sumsok no twi kha chwng buni thani sumsok khlai mano. Arilaimani bwthwi rwma bai chwng chaia khlaiwi bwkha kodroi tong mano bwkha sapsutra khlai kha.Arilaimano kiphilwi rohor kha chaia kwrwi kha.Raida bai simi wngia tamo khe bwkha iogwi tongma pai kha, rwthai rwbaiwi (Lebi 6:5). Dukhu rwmani nakarjak bai kha, dukhu rwjak nai kwplai wng kha.

Nwng nini bwka bai sak no kaham iokjak hwnwi uansugwi tong khe,sak sak kubui chajak kuno khain kwrwi hwnwi unasuk khe, nwng belai kirimasicha hakoro kwlai nai. Kaitor bai sui rwtajakma tongo. Bo bwswk khe kwthar omo chwng chini bwkha bai uansugwi sai mania.

A iapharmung iapharma bai sumsok nakarwi mania.Abo rok a kubui iapharma Kaitor ni sajla iapharmano.(Hibru 10). Nwng aro nuknai tamo no ratharwi iaphar, omorok wngkha Misip, Musuk,pun, Mera,Tokthu bwsa,tai Pharuk akonrok,ratharwi iapharmano. A iapharmug wng kha iapharnaisa je mansak iaphar mano. Chwng tamo tlang thang man, hwn male chini sumsok no,Khristo tamo tubui man hwn ma le ratharwi    iaphar mung tai sumsok ni phiok mano.

OCHAI (Lebi 8-10)

Chwng aswk swrwnglai phai mani wng kha kok kotor ratharwi barok mani kokno.Tamo khe khoroksa borok phano sakni bagwi Kaitor no sak ratharwi borogwi mania kho. Bo puila a ratharjak nai malmat no ochai ni thani se tubu granai, hake ochai se Kaitor ni thani ratharwi borogwi nai.

Kaitor kaisa hodano chongwi nakha, ochai bosong, a hodachinwi ni bisingo kaisa hoda no.A hoda khe Lebi hoda, Lebi ni nukhung. Aaron wng kha ochai.Ochairok se ratharwi barok nani barja bokjago. Bohrok borokrok chio kaisa ni rang ri rwmani abo bai chao. Ochai wng kha borokrok ni bagwi surisanwi Kaitor ni thani thango, Kaitor no lobo.Bo Kaitorni bwsakngo bachaio borokrok ni wngwi koi sano.

Jihudi dopha ni bwkha poja no Kaitor ni thani rwi iapharna muchungjak bai mano, tambunok ni dorbaro a malmatarok no tubulaio. Ratharwi barok mani haiao a iapharjak nai malmata no berao,bo a malmati ni khorogo  saka iak berao,omo bwkha iogwi kwthar wng mano phunuk mani.A malmata no ratharwi aboni thwi no haiao sarchai rwo.

A ochai wng kha a khulumna thang nairok ni wngwi sachurwi nai adong,bo pitol ni dangaio thanwi iak chuwioabo hwn ma khe langma ni sumsok nakarjak kha tai kwthar khlaijak kha.Bo a kwthar thaio habwi, aphuru a kwthar manwi khwnwi rangchak chati thopona berajak tong mani aiang twi himwi ma thango, surisan na phai phuru haiao  satrwi masogo.

OCHAI OKRA

Bisisao uaisa Ochai okra a riswngjak borok bai Kaitor no swkagwi ton mano  laiwi ma thano a kwtharkuk khotol o, khairokma khamplai (mercy seat) bwskang thangwi ma bachaio,iago thwi tlangwi ma thango, borokrok ni sumsok ni iakni phiokna bagwi, koiwi ma sanwio. Ochai bo sak no kwthar khlai man ia, a samungo Moses kaitor ni wng phlai kha. Ochai khoroksa sak no kwthangwi no ratharwi sakno maiapharo, a samung khlai nani.Pol chwng no omo haino khlai di hwn kha Rum 12: 1- 2 bwtango.

Ochairok ni samung wng kha ratharwi barok nani, Lebisong khe barua.Borok tambunok no naikini khlai nairok, rwchap nai choir bodol tai tambunogo buino twidul nairok. Samaria, Lebi 10 berem no phil khe, chwng nugo iaphang ni simi no ochai rok ni samung no.Aro mechenjagwi phaima mang nugo. Nadab bai Abihu, Aaron ni bwslasong takhuk nwi hamia chaia iapharmung hor bai iaphar lai kha Kaitor no, Kaitor bai dagijak ma kwrwi manwirok no. Ulo bohrok hor bai sokprai bwtharjak kha.

Lebi 10:3 bwtang no chwng khuktang khe, Aaron Kaitor bai ma kwthai phi kha, khakchama ma tubukha,bo wngkha bohrok ni bupha. Tamo khe abo tamo wngwi hai ma khlai kha hwnwi Kaitor no swng nani bini phan kwrwi kha. Kaitor no chwng belai khe kok sao, chwng bahai khe  Kaitor bwskango thangwi tongwi na nang abono swrwng thai tongo. Tai Kubun ocharok barja manjakrok mwkhang somwi tong na kok kwrwi, bohrok samung bokjak mano twino tongsukna nango.

Ochairok no ratharwi barok nani samung ma khlai nai, omono no chwng swrwng lai phaio.Omo wng kha Khristo swngchar sumsok ni bagwi sak no iapharma mari.

OCHAIYUNG

Malmata ratharwi tai iapharna nang lia, tamo ni hwn ba Khristo thwi mabai tai rathart na nang lia. Ocharokno bo tai nanglia.Khristo se borok ni bagwi ochai kotor (Hibru 2:17; 4:15). Bo simi no Borok bai Kaitor ni kwcharo raiba.Tai kebo kwrwi bo sakbaithang simi se Kaitor bai borok no kwtharwi tubu man nai. Chwng jotono raja tai ochai (1 Pitor 2:5).

Khristo se chini ochai kotor, Bo tini Apha Kaitor ni iagra bwkhak achungjak chini bagwi sanchurwi tongo. Bini bising twi se chwng Kaitor ni aro thango, Bini bising twi simi no (Hibru 10:12;7:25; Johon14:6).

Chwng Khristo sak ratharwi iapharma no nasik khe, naithothok khe paisukjak no nugo.

Bono ochai hai khe nasik khe, chuknoha ni kaham kubuino nugo, Chini bagwi belokjak kha sumsok kwrwi twtwi.(Hibru 4:15)

Ratharwi iapharwi mani bising twi Bo bini borokrok bai Kaitor no kaham khe halok borwkha.Bo ochai wng ma bai abo rokno khlai lang kha. Bo je kubui molbrum ni ochai a kokrok no chwng Hibru bijab

khukmatango. Khristo chuknoha ni ochai, swngchar ni ochai wng ia. Bo swngchar ni nokthar ochai ni samung khlai ma kwrwi, chwng abo no nuk ia.Bo noktharo phwrwng na ni tai kothoma pirna se thango ratharwi iapharna thangma kwrwi.Joto poito gwnang rokno ochai (1 Pitor 2:5). Omo hai tai swngcharo ochai kwrwi. Poito gwnang rok wng kha phola ni ochai. Abo ni bagwi Kaitor ni bwsarok tai kebo ni thani thangna nang ia Kaitor  bai malaina ni tai Kaitor ni bwsakango bachaina ni. Joto Khristanrok no Kaitor ni thani thangwi mano,tamo ni hwn ba bo Khristo no kaham khe sai mano.Bugra sakha, Ang no Lama (Johon14:6). Hake phai di chwng bwkha torwi Kaitor ni achukthai gana thanglai anw,aro chwng khairokjak nai,hake katswi chini nangma  jora twi chwng khairokjagwi chubajak nai.( Hibru 4:16).

Kaitor Lebi bosong ni borok no ochai chong kha.

BOSOJORA NI CHAMUNG CHAR (8)

Puila bijab ni bokhocho khe ratharwi barokma no tai baroknai no twi kok sao,tai paithak ni bijab khe bosojora bai bosojora chanairok ni kok.

Puila ni bosojora chamungba kotorni kok no Lebi 23 beremo chwng mano.

Ratharwi barok ma khe sao, Bwthwi se mwthango.

Bosojorani chamung khe sao, abo chwng no kwthang tono.

A mungnwi no abo Kaitor ni.

Ratharwi iapharma khe abo Bugra panda chama no hwnhorma ni kwlaio, abo chwng no muitu khlai rwo Khristo Kalberi kroso thwi mano, abo ni bising twi no chwng mwthangjago. A panda ni auang hwn khe chwng bini langma no sago twi mani.

SABBATH BOSOJORA NI CHAMUNG (Lebi 23:1-3)

Sabaath wng kha belai kaham joto thaio no iapharjak. Omo bisi kwrwngwi khlai tong na nango, salsni salo.O sal wng kha Kaitor no khulum mani sal, tai sak lelana ni sal, Kaitor swngchar snam phuru lelamani sal (Yaphang 2:2-3). Khristan rok khe Puila hatibar ni puila ni salo mung nalaio, Bugra ni sal mangkhor ni bacha mani. (Luk 24:1; Samung 20:7; 1 Korinth 16:2. Chwng o salo mung nalaio mwthang nani samung pai mani sal.

IOKMA TERNI CHALAIMUNG (Lebi 23:4-5)

Iokma ter wng kha Phiokjak mani kok sao, abo sachlang (Spiring) jora kwlaio, chini Esater jora. Omo July ni slabwrwio kwlaio Jihudi bwsarok ni.Bohrok aphuru bajirok sogwi hohomdodom khlai  ,tamo khe Kaitor no bwka rwilai khulum laio. Joto Jihudi bwsarok Jerusalemo thango.Omo salsa tongo, aboni logi logino chuan kwrwi auang chalai mani hwn khe sal salsni jora wngo.Omo bai no bisi kwtal chengo.

O bosojora no Jisu swngcharo tonglang phuru suda palai lai tongo kho. O kokno khutang phi di Bo bosojora chana thang mani, iokma ter panda no (Luk 2:41-52;Mathai 26:19;Johon 13). Tabuk bo Jihudi song a boso jora no palai lai tongo.Bohrok tabuk bo Masia phaina no nasing lai tongo.

PENTIKOST NI CHALAIMUNG (Lebi 23:15-22)

O chalaimung chalaima wng kha thaiswkang thaima chalai mani sal chiba salni ulo, Omo Khristo tai chwng kwthwini bachamani mari. Omo Khristo kwthwi ni bachamani sal chiba sal ni ulo wng kha,Sagri rokno Phola Kwthar rwjak mani, a salo no Khristo ni Motha achaio. Pentikost wng kha motha achaima sal.Khristo thwiwi kwthang wngphina nang nai a sal phai nani ,Phola Kwthar phai ia sini swkang.

TOTORO NI CHALAIMUNG (Lebi 23:23-25)

Omo wng kha Jihudi bwsarok ni bisi kwtal .Omo October o kwlaio.O chalaimung wng kha piring poroi khe Jihudi dopha tong mani phai nai salo kuthumlai phina no muitu khlai mani (Jakaria 14).

SUMSOK SUMANI CHALAIMUNG ( Lebi23:26-32)

Kaitor bai chongjak bosong ni bagwi o sal belai sal kotor. O sal dophani sumsok no gosijago kaitor ni thani.Sumsok gosi mano puila ni samung kwthar suchajak wng nani.Omo sumsokno kaham twidul mani, kagwi tong nani. Omo wng kha nakarjak na muchungma phunugo, Kaitor sakha, Phia ba chwng Kaitor ni thani chini sumsok gosi khebo kok narwgwi soikhe nainai; hake bo chini sumsokrok no nakar nai, phia chwng bebak hamia khlai mano suchanai (1 Johon 1:9). A salo Jehovah Bini borokrok bai kaham khe halok bo phiokha – Sumsok bai chaia sitra khlai mano iakarwi. Kebel borokrok sumsok nakarjak na nang mani. Thwi sarjak kha borokrok ni sumsok kholopna bagwi, Kaitor borok no iachak nani,bohrok aswk chaia abul tong phano bo bohrok no bini thani tlang kha.

Chwng Lebi 16 beremo swrwng kha Kaitor a  noktharo ri swngwi sak no hui tonkha,borok hachalo ma tong kha.Khuktang di Lebi 16:2 no, aro Kaitor ni thani thangna ni lama kwrwi. Tabuk khe chwng bwkha kotor khe bini thani thang man kha, Eips 3:12. Tabuk chwng Kaitor ni thani kachik thang man kha, Khristo a lama no kwlai khe snamwi rwkha. Lebi bijabo Kaitor borokni bagwi dugar soui tong mani, borok Kaitor ni aro thang manlia. O salo simi se ochai okra o kwtharkuk khotolo habwi manwio,bo borokrok ni sumsok ni bagwi  thwi iapharna ni. Sumsok nakarna bagwi. Sumsok suo hwn ma kha “kholobmani” a thwi iapharwi mabai borok rokni sumsok kholobjago,a iapharmung kotor kalbari kroso iapharjak iasak.Aro iapharma bai mungsa sumsok no sui mania.

NOKTHAR NI CHAMUNG (Lebi 23:33-36)

Omo wng kha bisa ni paithak ni chalaimung. Omo puila chengjak makhe Jihudi bwsarok hasing panthoro himgurungwi tambu nogo tong lai phuru.Bisi paina jora chalaio, a chalaimung hati barsa tongo. Bohrok aphuru saia tangwi nok ni phataro phailaio, tai Kerong khuktang mano Khwnalaio.

Iokma ter panda chama bai Nokthar panda chamani wng kha Egypt ni uanamasingcha khe phiogwi tubujak mani kokno muitu khlai rwmani, tai haching panthoro tonglai bumano. Kaitor bohrok no pogrwna muchungjak ia,a dopha kotor Egypt ni borok tai mwtairok bohrok no sak naia khe tonma akonrok no , tai khorok bomrwi ton marokno.

Nokthar chalai mani wng kha,bohrok ni bwkhano hai no hai phunuk phima ni,bohrok Kaitor ni kok khwna ia wngwi bisichibrwi haching panthorao himgrungwi ma tong mano. Tamo hwn ba bohrok poito kwrwi wng phano Kaitor bohrok no naikini khlai tubu kha. Tai bohrok ni ha manthai tong thani tubu kha. Aro bohrok no tai bo muitu khlai rwo, bohrok Jehovah ni sago sak beralai mano.Bohrok Jehovah ni kok twi tai bini muchung twi tong khe Hamari mano.

BISI SABBAT (Lebi 25)

O bisi wng kha uansugwi diaijak nai bisi,Abo bisi kolok sabbat. Sabbat ni tomung nangmarok no phunukjak kha. Kaitor borokrok ni bwkhao poja bogwi rwkha,a bisio bohrok tai kun samung khlai na nang ia. Bisi sni ni ulo omo wng wngo.

Kaitor bohrok no taibo sirwna muchungjago bohrok tong mani ha wng kha Kaitor ni kwtharha. Abo ni bagwi Palestine hano kwtharha hwno (Holy Land). A bisio bohrokni a hao bebak no siring siring wngwi thang baio. Bohrok samung mwthagwi lela laio, tai Kaitor no twiwi diai laio. Joto industrirok mwthangwi tongjak baio.A bisi ni joto sal no sabbat sal hai Bugra Kaitot ni kokno mang salaio. Kerong no khuktang laio,a bisio lakai kwrwi wngwi thang bai o,uanama pai thango borokrok ni bwkha kwthar wngwi thang baio. A bisio borokrok ni bwkha uanamasingcha khe slaijak baio tongtho thok wngo.

BISI JUBILI (Lebi 25:8-24)

Omo bisi chiba kakhe khlaijago.Omo sumsok nakarjak mani sal totoro tamwi chengo bisi sabbat bisio maikhul kaia,Jihudi bwsa seleng khati tong nai rok phiogwi rohorjago. Jihudi swikwrwng swilango, omo Judaia ha segwi tlangjak mani bisio Jubuli palaina chengo 586 BC.Omorok Baibel bwtango phunukjak tongo, Jisia 5:7-10;61:1-2; Ejekiel 7:12-13; 46:16-18.

Aro kaisa belai khe naijak nai kok wng kha,ha segwi namani tong khe a bisio a ha bugrano ha kiphlwi rwbaio.Puila ha bakjak phuru man mani a habugra nukhung no ha kiphilwi rwo. Abo econimicaly sana thang khe belai kaham samung. Tamo khe kaitor ni taibo nasikma kotor,Masia phai nani kokno twi khlai mani.Joto hoda ni mungberem no kaham khe swinarwk na nang thai tamo ni hwn ba Masia Juda bosong twi se phai nai.Abo Bugra Jisu ni bahan bwthwi ni nukhung.Ulo abono naituk mana bagwi.

O bijab wng kha mwthangjak borok rokni kokno twi se sao.Kaitor ni aro bahai khe thang nai tai bono bai khe khulum na nang. Lamrwma bijab khe Phiokjak mani kokno sao,Lebi bijab khe sao mwthangjak borok bahai khe Kaitor no khulum nai.

Jisu Khristo ni thwi bai simi se chwng Kaitor bai iachakjagwi mano.

Khristo ni kwthar bai se Kaitor chwng no iachago, Khristo bo simi se rwi mano.Tamo ni hwn ba Kaitor chini Kaitor kwthar.

Yaphang bijabo borok baikhrubwi thang kha.

Lamrwma bijabo borok phiyokjak kha.

Lebi bijabo Borok Kaitor no khulum lai kha.

Bwkhak 5

Lekhamung Jisu no hwno “Bamsajak borok”

Jihudi bwsarok mwthangjak khe suamung nai. Abo haino tini Kaitor ni bwsa rokbo ma khlai thai. Poito kwrwi wng na hus wngdi! Apostle Pol chwng no sakha, Norok agi kaham no tonglai mani,kubui khe tong mani norokno sabo kebengba? (Galatia 5:7).

Poito kwrwi wng khe hamari no kasujago. Kaitor sao tamo wngwi nwng hamari mania wng (Hibru 3:18). O bijab no hai hwnwi sai mano,haching panthoro himgrunglaijak Sinai hathai ni simi Canaan haari ,smaiha.Bisi chibrwi bisi ni laibuma ni kok.Lekhamung bijab no ongkhormani bijab bo hwno tai luku thikamung (Lekha.33:1-2).O bijabno kengailai mani bijab hwno,o bijab cheng phuru ni simi paithak jora aro Kaitor ni ari wngma no, kok bangmano nugo. Kaitor tamo sakha obo no khuktang di, Lobmung 95:10.

Lekhamung wng kha haching panthor ni bijab.Kadesh-barnea o Jihudi dopha chen mani kok, himgrung rwjak kha tai borokrok sai man bai kha haching pathoro dukhu man bai mano. Omo wng kha kwthar beraimung, choba khlai lai kha,seba ma khlai kha,iakchu bosong mechenjak kha,Egypt ni ongkhorwi phailai phuru ni simi. O kokno simi swijak mani wng ia, o Lekhasmung bijabo.Puila ni beremchi wng kha  Kaitor kerong rwmani, tai berem chisa bai chinwi khe Jihudi dopha mechenjask mani kok no sao, tai paithak bijab ni beremrok khe Jihudi dopha Jehovah ni thani phai mani tai dopha kwplai wng mani kothoma akonrok. Haching panthoro no kwplai wng mani.

Tai kwbang ma phan gwnang dopharok ha saka ni kwmasugwi thang bai kha a kwcham laibumao. Abo ni bagwi kisa dopha chikon tabuk phano narwgwi tonjak kho. Tamo wngwi omo hai khe tonjak kha hwn ba, swngchar ni borok rokno mwthangna bagwi bohrok ni bising twi Masia phai nai. Abo ni bagwi bohrok bai Kaitor belai bwkha logwi khlai tono. Bo bini sak ni bagwi se khatima tono.1 Korinth  10 no  chwng nukha, bohrok ni bisingo wngmarok chwng no “phukmani.” Bohrok ni joto laibuma, abo chini “swrwngjak nai manwi”.Kaitor tini omo hai khe no chwng no phunugwi tongo.

Oro ni kokbothoma khe kok raida bai ton nani.Lekahamung bijab wng kha Moses swima ni bijab kangbwrwi bijab. Baksa khe hwn o boomo hai khe mathe swio:

1. Yaphang bijabo borok baikhrubjagwi thang kha.

2. Lamrwma bijabo borok phiokjak kha.

3. Lebi bijabo borok Kaitorno khulum lai kha.

4. Lekhamung bijabo borok rok suamung lai kha.

O kerong kaida no se kaitor snamwi rwo. Phiokjagwi mwthangjak borok se Kaitor no suamungwi  mano tai khulum mano.Muitu khlai tong di chwng mwthangjak kha Kaitor no suamung nai. Bini samung tang nani. Chwng samung kaham khlai ma bai mwthangjak ia, tamo khe Samung kaham khlai na bagwi se mwthangjago (Epis 2:10). Kerong chwng no smaiha gana tubu kha, tamo khe chini chuknoha ni Joshua (Khristo) simi se smai hao tlang thang mano. Pol sao kerong khe chini school ni mastor se Khristo ni thani tubu nai (Galatia 3:24). Kerong chini phola no mwthangwi mania. Omo norok samung khlaima bai wngia,Kaitor rwma bai se (Epis 2:9).

Lebi bijab poito gwnangrok khulumano twi sao,

Lekahmung bijab poito gwnangork khlai mani kokno.

Lebi bijab chwng no phungwi sao poito gwnangork man mano.

Lekhamung bijabo haching panthoro kheto khurmani.

Nwng borok khorokba no sini khe , Lekhamung bijab no sai man bai nai:

Moses wng kha Ojama kotor.

Aaron wng kha ochai okra, Moses ni bwta

Miriam wng kha Mose bai Aaron ni bukhuk

Joshua bai Caleb wng  kha Canaan hano naichom na thang nairok,Kaitor no poito khlaisuk nai. Egypt ni ongkhorwi phainairok ni bising ni Canaan hao mahab nai.

Bijab ni geographi :

1) Sinai hathai ni simi Kadesh jora.

2. Kadesh ni ongkhorlaiwi haino hai Kadesho.

3. Kadesh ni simi Canaan hao.

BUGRA NI SWRWNGNOK

Jihudi bwsarok ma swrwng mani.

1. Bohrok Kaitor no bwkha thwisukna nang nai tai birman man phuru borok no bwkha ta rwdi, Kaitor ni thani bwkha beradi. Lobmung 37:5; omo no khuktang di Lekhamung 13:26-14:25.

2.Kaitor bohrok ni nang mani bebak no rwi mano,Kaitor ni tongma jora twi. (Philipi 4:19).

Bohrok no chamung rwkha - Lekha.11:6-9

Bohrok no bahan charw kha – Lekha. 11:31-33

Bohrok no twikhor rwkha   - Lekha 20:8.

 Bohrok no Ojama bo rwkha – 1:1,3.

 Bohrok no smaiha rwkha – Lekha. 14:7-8.

3. Bohrok Kaitorno makhulum nai Kaitor phwrwng twi khe: Kaitor ni muchungma hwn khe Jihudi bwsarok iasku swkang than na nang nai Smaihao habwi nani, Canaan ha.Tamo khe bohrok hao habwi manlia.Kaitor bohrok no hai hwnwi sakha, Kadesho je borokrok ni omor bisi chinwi bohrok ma thwi bai nai, Joshua bai Caleb no karwi. A haching panthoro himgurung lai matong phuru kwtal khe borokrok achai bai kha, bisi chibwrwi bisio. Tamo khe paithago bohrok borok bang kha, dopha phan kwrak wng kha Egypt ni ongkhorwi phai phuru ni slai. (Khuktang di Lekhamung 26).

THANGNA BAGWI JUGALI MANI (Lekhamung 1-12)

Bijab no khuktang na phil khe no chwng nugo Jihudi dophano Haching panthor ni Sinai hathai tong lai mano. Kerong iapharjak kha, Tambunu nokthar tangjak kha, Ocharok samung poja bagwi rwjak bai kha, bini nokthar ni samungo. Tabuk Kaitor o dophanop phwrwngwi snamwi tisa nai Bini sak ni samung ni bagwi.O bijabni phwrwmungrok chini Khristian langmao belai khe nango.

Dagijakma khe Chuknoha ni puila kerong,Aro chwng nugo Kaitor borok lekha mani tai jai jai khe hoda sai mani (Lekhamung 1 bai 2). Ochai bai lebi song no samung bagwi poja rwmani (Lekhamung 3 bai 4). Jehovah se a daginai Bugra Kotor.

Kaitor muchungjagwi bini borok no lekha mani, Bini bagwi bohrok no thuma mani, omo belai khe chini bwkhao nangkuk mani kwlaio.Bo borok rokni basaio tongo. Bugra ni Tambunokthar no Jihudi dopha chnwi ni borokrok abo no kaham khe mwrwklai tono.Lebi song khe nokthar kitingwi basai tangwi tong laio. Moses, Aaron tai Ocharok hwn khe Kaitor ni nokthar habmani duglamo mwrwk o.

Bohrok ni basai no omo hai khe tanglaio, Tambunokthar bwkha mwkhang khlai tango, chinwi maile kitingwi. Abo bwswk naithok khwna a basairok mokol bai nai nani, a haching pathoro. Salo khe Kaitor borok no chumui bai sakolom rwi tono, horo khe chumui horjwlai.(Lekhamung 9:15-23).

 Kaitor wng kha bohrok ni hor ni chati tai salo khe salsakolom. Bohrok ni iakung ni iakwlab bo chamia, sak ni chumchwlwi bo kwcham chaia. Uansuk nai di, 600,000 chwla borok chinwi bisi omor ni kwbang, tai 3,000,000 aswk bwrwi chwla borokrok, chwrai bwsarok bai kuplung a basairogo. Tamo khe kaisa belai khe no uanamasingcha tomung hwn khe Kaitor bohrok ni a basai kitingwi bohrok bai tongo.

Puila ni beremo, Moses borok Lekhana ni dagijak kha. Kaitor bohrok ni bumung rok no sai man nai, bohrok bini borok (2 Timothi 2:19; Philipi 4:3). Chini khorokni bwkhwnai bo lekhajak.Omo belai khe no tong thokma kok Bugra Kaitor bini borokrok no naikini khlai tong mani! Khristanrok bo abo hai khe tonjago.Bugra Kaitor chwng no lekhai tonjak bini rangchak no.Bo sai mano bini borok sabo.Bini mungno twi wi uansuknai rokno muitu bijabo swijak kha.( Malaki 3:16). O beremo chwng nugo hodani mungrem no sakhlaijak mani.Kwthar Bugra ni bosong berem no nwng naitugwi da mano? Nwng bwkha kwrwk khe saida mano nwng bini bosong ni borok hwnwi? (Johon 1 :12).

BUGRA KAITOR ARO TONG MANI

Aro aswk borok wng khwna 3,000,000 a borokrok ha hamia haching panthoro, jabra twngsa bo kwrwi,twi thopsa bo kwrwi,aro manthok mani mungsa phano kwrwi. Bohrok tamo no chanai nwng nai. Kaitor bohrok ni logi tongo.Bohrok bahai khe lama man nai a haching khong kwcharo, Lama kwrwi mungsa bo kwrwio? Kaitor bohrok bai tongo.

Kaitor tong khe se bebak manthogo. Tamo man nai? Aro tong nai borokrok 3,000,000 a bukcha kwrwi thaio tamo charwnai, nobarda kharwi ton bai nai? Sabo a bodol ni barja rwjak adong? Buro man nai aswk mai gula? Buro ni aswk richum man nai ? Bugra Kaitor aro bohrok ni logi tongo! Poito bai thike khe Kaitor no se thike di.

Khoroksa borok phan kwrwi Jihudi dophani bwsarok hai khe  dukhu manwi swngchar o wng mani, kebo ni iaphai mari kwrwi,hao phunugwi kwlangjak mani kwrwi, abo tabuk ni khristian langma hai se. Chwng omo hai khe no lama mari kwrwi buro thang nai bahai khe thang nai - chini  tomung ni haching panthor. Omo hai kuno dukhu kwrwi chwng manjak buia,tamo khe sai man no kokthaisa no Bugra bini khuk bai samani kokno . Ang no lama (Johon 14:6).Bo chwng no iapri sethani kaisa kaisa khe twidul nai. Aro kirijak nai kwrwi, Jisu sao, Ano rwkthar nai borok bo mwnakmao him glak (Johon 8:12).

Kaitor Jihudi dophano rwkha, Salo satungni bagwi chumui ni sakolom tai horo khe chumui hor budul pohor pirnani. A jora bohrok iapri sethani ni Kaitor twidul mano nuk khe belai khaswrango.Bohrok sai man ia bohrok buro thang nai, buro thangwi bathagwi nai.Tamo khe a kerong swndwk (Kaitor bohrok bai tongo hwn mani) bohrok ni swkang swkang thango, a chumui budul bohrok no lama phunugwi tlango (Lekhamung 10:33).

Aswk naithok bail bail khe tangjak basai sumsok abo sitrarwi khibi kha.Bohrok Kaitor ni ari wngwi tentailai kha. Aphuru Kaitor bohrok no hor bai sogwi bujthum kha (Lekha.11:1-3).Aphuru bohrok chana no twi Kaitor no koksil laikha (Lekhamung 11:4). Bohrok chajak lai suklia.Egypt hani piajo bai rusun chama no muitu manlai kha, A bo chana muchungjak lai kha.Bohrok ni tentai mano Bugra Kaitor khwna kha, Kaitor sal thamchi sal bahan chana bagwi toksa quail rwphai kha.Bohrok aphuru chakwrak chamung chalai kha, Phia ba bohrok muihan rokno chabai ia sini no Bugra bohrok no belai jolijak kha, hake bohrok no kirimasingcha bemuk bai bwthar bai kha (Lekhamung 11:33). Baksa borok hamia kotor kwlai kha , thwi bai kha.

Chwng Aaron ochai okra tai Miriam Moses ni bibijwk ni sumsok no bo nuk kha, Kaitor Moses no ojama kotor khe chong kha, o dopha kotor no naikini khlaina ni.Tai Aaron bai Miriam wng kha bini iakchu chongjak, bohrok bwkhao Moses no seja laikha.Bohrok bui bai tai bo borom man na muchungjak lai kha. Khuktangwi naidi, Miriam bujthumjak mano. Bo salsini biadi bemar bai swprajak kha (Lekhamung 12:1-16).

Bohrok ni kwcharo Kaitor ni suari bodol phai di hwnwi ring mano chwng nugo. Ang nono rwna hwn mao thangwi tongo, chini logio phai di,chwng norokno kaham kwrwng khe tong rwanw; tamo ni hwn ba Bugra Isreal ni bagwi kaham khlai nai,hwnwi smai tangjak (Lekhamung  10:29). A Kaitor ni kok kerong swndwk bohrok ni kwcharo tongo.A rukphai ni totoro ni khorang no wng kha bohrok sasong samani. A chumui horbudul tai sal ni chumui sakolom bohrokni bwkhano lela rwo tai twidulwi tono.Tambunok tai aroni samung chongjak khlai tong mani abono kwthar khotolo khulum lai mani kwlaio.Khristo wng kha “Apostle tai Ochai okra”abono chini tangmungrok no phunuk mani.

Chwng le borok ba kwbangma chaia khlaio tai Kaitor ni aroni hachalo kharwi thang mano. Abo ni bagwi Chuknoha ni Kaitor chini logi ma tongo. Chwng no matwidulo. Sabo bohrok no nangjakia tong? Sabo bohrok kwrwi khe torsai logsai man nai tong? Chini bodolo phaina bagwi borok no ring di, chwng no logi phaina ni.Chwng borok no logi twi tong na nang nai, chwng bai baksa Kaitor no lob nani logi sona nang nai.

HACHING PANTHORO LAMAKOROJAK LAIMANI

Sinai hathaio bisa tonglai mani iagulo, bohrok Kadesho thang lai kha. Abo Smaihani salsigra bwkhak kwlaio.Aro habna kirijaklaiwi haino hai salgra tai salka bwkhak kiphilwi phailai phio kha, aro chakra achaisong thwi bai kha. Bohrok himlai thang phlai simi tong lai lia, kwrwngsao tong laiwi pun musuk rilaiwi, a hathai kitingwi malmata riui tong lai kha. Aro ni chumuwi norjak phi khe, bohrok himlaina cheng laio kha. Paithago bohorok Canaan no habna thang lai kha, twichak twijwlang ni salka bwkhak ni.

Uansugwi nai di bohrok ni bisi lai thang mano, Kadesh ni ongkhorwi Kadesho kiphil phai mano.Tamo ni hwn ba Kaitor no poto khlai lia.

Ulo bisinwi ni ulo haching panthor ni Jihudi dopha Canaan hao habwi lai kha, puila bohrok aro habwi manlai ia wng ma khe, Poito kwrwi wngma sumsok ni bagwi.A naichomna thang nairok bwkha baijak nai kok saphai mani bagwi. A naichom nairok ni bisingo baksa bwkha baijak nai kok saphai kha.

Naichomnairok phaiwi saphai kha aro chokdeual kuchuk kotor, aro ni borokrok phan gwnang kuchuk kuchuk kotor kotor, abo no borok kirijak bai kha.

Bohrok Joshua bai Caleb sama ni kokno khwnalai liagwja,bwkha gosi nai manlai lia, bohrok khoroknwi samani kokno.Bohrok hai hwnwi saphai kha,Phai di, chwng achomsa khe thang laiwi a hano segwi nailai nai,tamo ni hwn ba chwng bohrok no mechenwi mano (Lekhamung 13:30). Haiphano, borok rok Kaitor no bwkha berasugwi manlia,hai hwnwi sakha, Phaidi, chwng khoroksa no ojama chongwi Egypto kiphilwi thang lai anw (Lekhamung 14:4).

Bohrok jephuru Canaan hao hamna nailia, bohrok ni bagwi dugulam khapre rwjak kha.Bisi bwrwichi haching panthoro lama koroui lengprai ma tong lai kha.Bugra Kaitor bohrok no tai Canaan no habrw lia je borok omor bisi chinwi kajak borokno. Joshua bai Caleb no karwi.

Swkango, bohrok Sinai hathai ni simi Kadesh thang phuru himani dolaijak, tongthoklaijak! Ulo khe bwkha baijak bai kha. Achomsa Jihudi dopha ni borokrok thang na nailai lia, bisi lairwi rohor kha haching panthoro, bisi bwrwichi.Bwkha khamjagwi Moses bohrok no muitu khlai rwui rwkha, Kadesh – Barnea ni simi lam rwlai Zered harung basu iasak jora aro nokha bisi thamchichar ka kha; Bugra borok ni bagwi smai tangma twi no bebak batham ni sengkwrakrok komor bai kha (Uanwi.2:14).

Tai salchisa himlai khe no Smaiha Canaan hao sogwlai nani.Aro thangia karwi taisa kiphilwi phai lai phi kha.Bohrok salchisa swkang agogwi tang lai mankha mun, tamo khe bohrok bisi bwrwchi bisi uklog uslu laise phaisio haching panthoro. Bugra Kaitor dugar phiok khe kebo kholob manai kwrwi, tai Bugra dugar somano kebo phiogwi man nai kwrwi (Jisaia 22:22; Phunujakma 3:8).

Kaitor Egypt ni dugar phiogwi milliontham (3,000,000) phola phiogwi tubu kha, Egypt ni borokrok riphrigwi phai phuru Bugra Kaitor dugar soui rwkha.

Kaitor Egypt ni Jihud dophan no phiogwi tikhlai tubu kha, Bo bohrok no Smaiha Canaan tlangna ni. Egypt ni tikhlai tubuna simi Kaitor muchungjakma ni wng ia. Bo bohrok no Canaan ha rwna se naio. Bohrok a hano sal kisa bai no segwi nai man khamun. Norok sai mano aro ha naichom nai borok rohorjak kha, bohrok sal bwrwichi salo no kiphilwi phai lai kha.Chwng aro nugwi pai kha bohrok a hani borokrok no kirilaijak mani.Abo ni bagwi no bohrok chuklia a hano segwi nathani.

Uaisa uisu jora chwng kirimani bagwi Kaitor hamari rwna nai mano iachagwi maia wngwi thango.Chwng kirio bui chwng no tamo hwn no.Chwng kirio tamo jani wnglang no Khristo no bwkha rwsugwi rwkhe.

A naichom na thang nairok ni kok thaisa belai khe no sikiri phai kha, A hani borokrok deuar hai kuchuk kotor phan gwnang. Jihudi dophani borokrok wng kha kug hai se bohrok ni bwskango (Lekhamung 13:33).

Kwbangma Khristan ni langmao omo hai wng mani nukjago.Bebak khristian rokni langmao bo gothogo. Sak kaham sini nainai deual,lubo nang mani,Nangiarok no twiwi kuchuk uansuk tong mani, swkang agog thang nano kasumani! Chwng sakno aro ni kiphliwi tubui man khe, aborok ni slai kwplai khoroksa tongo.

A khorokchi rok hai chwng bo hamia mang uansuk nai wng mano. Eba a khoroknwi kaham uansuk nai hai phano wng mano. A khorokchi song hai khe chwng sak bai Kaitor ni kwcharo kasui phano tong mano. Chwng khlai man glak hwnwi uansugwi, eba chwng khlai man nai hwnwi uansugwi phano tong mano.

Chwng puila Kaitor no hamjak phuru khatungwi hamjak tong mani. Khlaiman mani hao thangwi mansugwi mano. Aphuruno a deulr kotor sak kaham nai nai bwskango phai bacha phaio. -  a deual kotor chini bising ni ongkhorwi phaio.Poito belwi thango, Kaitor no pogo, sak ni phan bai a dikdar phai mano sui naio, Kaitor phan kwrak ni iago sak no iaphar ia karwi bwkha beljagwi thango. Chwng taisa kiphilwi thango a haching panthoro poito iakarwi.Mechenjagwi bwkha bai thango.

Lekhamung 33 berem wng kha belai khe khairokma singcha bohrok lamrwlai mani, Bohrok Rithma ni lam rwui Rimon Pereso batham songcha lai kha, bohrok Rimon Peresni lam rui Libana o batham khalai phi kha. A paithak ni berem khaswrangrwlia! Thanglai kha thanglai mang tong kha, basai tang tanglaiwi, tamo khe sogwi ma kwrwi kha, buro sogwi nai silia.Paiphlai lia himgurung mani, thangwi sogwi nani lama nuhurjak lia. Chwng kaitor no bwkha thwi man ia wng khe chwng bo abo hai khe manjak nai.Mechenjak ma hai ma tongo, bwkha baisugwi thango. Chwng kiting phlai matong nai sogwima kwrwi kun thaio.Manphlai ma bo kwrwi. Omo uaing chokjak langma hai, chokjagwi tongo sogwima kwrwi.

O wngmarok phaia sini swkang no Jihudi dophani borokrok haino hai tentailai jaukha, tabuk khe twi kwrwi wnglai mani bagwi, Moses bai Aaron no koksilsalai hwn laiukha, bohrok Egypt ni phai ia hwn khe se hamkha mun.O ha wng kha kwran ha, khamprojak aro nwngna bagwi twi thopcha phano kwrwi. Moses bai Aaron haino hai tai uaisa Jehovah ni thani thanglai kha. Jehovah, Moses no sakha, bini iak ni latha nadi tai luku bwskango holog no khuk bai dagi di twi ongkhor di hwnwi,hake  twi ongkhorw phai nai.

Paithago Moses belai khe kha logwi tong kha. Bebak wngmarok no twiwi no lukurok Moses no kok silchalai kha. Abo ni bagwi Moses thamchi kahjagwi bohrok ni kok khwnaia wngma bagwi khuk bai dagilia , latha bai holong no toktharwi rwkha. Twimukh ongkhorwi phai kha.Moses kok khwna lia phano, Kaitorle smai narwk nai Kaitor abo ni bagwi Bo bini smai no narwk kha.Kha khlaio a twimukh tabuk bo iorwi tong khwna.War world 1 Tukies ni semglrakrok aro twino pipe uasung bai bohrok ni campo twi tublai nwng kha. Kadesh-Barnes ni ha wng kha tos gwnang ha. Agi ni kwcham kadesh auli kwmai thang mani tabuk rutugwi manjak kha.

Omo belai kha kham mani kok wng iada Kaitor ni bwsa rok suda amojokjak phuru chenwi thang mani? Moses kaisa chaia kotor khlai kha, haiphano bo chwng hai no borokjaba. Moses sakno Kaitor ton twi khe no ton kha – Khwna baidi , kebeng nairok chwng ba o holong ni da norok ni bagwi twi ma kari Sinai (Lekhamung 20:10).Omo Jehovah Kaitor no borom rwmani kwlai lia.Tamo ni hwn ba Moses omo bai khe uainwi holong no latha bai tok mani.(Puila tokmano naidi Lamrwma 17:5-6) khuk bai dagia karwi latha bai se toksio.Abo ni bagwi bo smaiha Canaan no habrwjak lia. Khristo holong hai,uaisa se butharjak nai chini sumsok ni bagwi (1 Korinth10:4).Bo tai uaisa butharjak nani nang lia.

Bohrok ni khurio

Bohrok ni rang bai

Bohrok ni jolima bai

Abo bwswk kubui tomung hamia bai chalai thani bohrok ni tomung chamung no phunuk kha; bania khlai phuru tomung hamia hwn khe omo phunuk ma khlaio, lachima kwrwi wng mani; tamchi tungwi kok hamia sakhe, borok kusu ni tomung.

AARON NI LATHA BOSOK NAMANI (Lekhamung 21-36)

Aro kaisa nangmani kok slaijak ia wng kha Lekhamung 17 berem no.

Aaron ochai chongjakmani kokno twiwi luku rok kok banglai kha,abo no  Jehovah Kaitor sai manrw khwna.Hoda bokhorok rok bohrok ni latha kwthwi no beralai kha.Aaron ni lathao Jehovah Kaitor langma rwkha.Abo ni bagwi chwng nugo joto daormo ni dormophang rok thwi thang bai kha.Jisu bo thwi kha – Tamo khe Jisu Khristo simi se kwthwi ni kwthang wngwi bacha nai,tai chini ochai okra khlai tisajak nai ( Hibru 4:14;5: 4-10).

Oro wngmarok no chwng phiogwi nai khe nuknai,Egypt ni ongkhorwi phai nairok jotono thwi bai kha, Moses, Aaron, Joshuah, Caleb tai Mirim bohrok no karwi tai jotono thwi bai kha.Chwrairok omor bisi chinwi kanairok, naichomna rohorjak phuru.Tamo wngwi omo hai wng khwna?

Paithago, Bohrok Kadesao tong lai phuru,Miriam Moses ni bibijwk tai Aaron Moses ni takhuk bohrok omor bisi 100 bisi wng bai kha, tai thwi bai kha.

Jihudirok haino hai bwskang agog lai phina nang nai,Bohrok Kadesh – Barnea ni lam rwna cheng lai kha,tabuk khe borok bwkha thonlaiwi smai ha (Canaan) o habna thang lai kha. Tabuk ni lamrwlai mani belai no kuthuk kwrwk,agini slai bo tai bo kwrwkuk,tamo khe bohrok ni poito slaijak bai kha, poito raksuk kha.Bohrok disiplin khe samung khlai lai kha.Tai Kaitor ni suari daseng twilaiwi Canaan hano segwi nalai na thang lai kha.Kwplai wnglai kha.

JEHOVAH KAITOR TAI UAISA JORA RWI KHLAI PHIMANI

Kaitor tai uaisa jora rwi khlai mano swrwng lai phianw. Bo chwng no lama kaham phunugwi rwkha, tamo khe chwng omo no iachak lia.omo lai phlai thang kha. Joto chwla bwsa omor chinwi bisini borok Canaan hao thangna nai ia wng nai jotono thwi bai kha haching panthoro (Joshua bai Caleb Kaitor no poito chanairok simi tong sio). Khoroksa phano Canaan hao habwi manlia.

Tamo khe Kaitor le khairokma kuplwng.Tamo khe tai lama twngsa kaitor khlai kha,tai uaisa jora khlai rwkha.Omo hai uaitham phano wng khwna.Bini khairokma  uanamasingcha.Bo chwng no nakar kha chini jora ni.Bo chwng no twidulwi tubukha, snamwi tisa kha, Bo khairokma rwia tong lia.chwng bwswk jora  ma kwma kha,Chwng bwswk chaia khlai kha, bwswk poja hilik matwina nang kha,a kaham jora iachakia wngma ni bagwi.Omo bwswk ma morok kha!

Jihudi dopharok tentai lai mang tong kha, thak lia tentai lai mani. Tamo khe Kaitor phunuk kha Bo phunuk mani lama se lama kaham kubui.Kha hamia tai tentailaijak omo hai no wng khwna Jihudi dophani tomung chaia.Swngcharo borok daktino chajakia wngna no swrwngo. Abo no swrwngna ni “sikwrwng wng na nangia, sakno iakarwi rwna nangia, akolbo tong na nangia,tai tomung kaham bo wng nani nangia.chajakia wngwi tong na bagwi.”

Tamo wngwi chajakia wng na nang ? a chajakia wngma bai poja hilik no heleng rwi man ia.Chaia wng tongmano bo swkagwi man ia. Hai wngiaui taibo se hamia chaia tubuo.

Bohrok Canaan hani borokrok bai choba khlai lai kha, tai bwkha bailai kha.Abo ni bagwi bohrok bwkha chajaklai suklia.Abo ni bagwi bohrok Edom kiting ma tongwi kha,samung pai manlai lia. Bohrok taisa Jehovah   Kaitor bai Moses no sokorom lai phikha. Tamo ni hwn ba bohrok Manna chanano chajaksuk lailia (Lekhamung 21:5). Bohrok kha kochomjaklai lia.

A jora Jehovah Kaitor bis gwnang chibuk no rohor kha bohrok ni thani. Chibuk sukjagwi borokrok thwibai kha. Ulo bohrok Kaitor ni thani sumsok gosi lai khe, Moses, Jehovah ni thani surisan kha borokrok no mwthangwi phiyokna bagwi. Jehovah Kaitor a chibukrok no norwi rohor lia, tamo khe Jehovah, Moses no sakha,pitol ni chubuk tagwi pala kaiwi kuchuk khe khachidi hwnwi sakha, borok joto no nuhur na twi khe. Chibuk sukjak nairok a pitol ni chibik no nasik khe no bohrok kuno wng glak, mwthangjak nai (naidi Lekhamung 21:6-9).

Baibel chwng no sai phunugwi kwlango,borok ni nukhung jotono sumsok chibuk bai sukjak, omo hwn ma khe borok joto no kwthwi. Oro lama twngsa se tongo borokrok mwthangjak na khe, borok hai khe chini bagwi sak no rwi thwilang nai,tai chini bagwi kroso khachijak lang kha sumsok chibuk bai sukjak mani mwthang nani. Chwng chini mwthangnaisa Bugrano nasik horkhe, chwng kwthang tong nai (Johon 3:14-15).

                                            BWKHAK 6

Uainwi saphima Jisu no hai hwnwi sao,

Chini kubui Diari.

“Naikol di tang na bagwi”o kokthaino Moses bini borok                                                                 rok no sao.Bo bohrok no omo khlaijak na muchungjago, Tang naise wng di, khwna ma bai simi wng ia (Jakob 1:22).

O bijab phunugo kok khwna nai ni hamari, kok khwna ia hwn khe swraimung mano.

Bebak no kok khwnai tongma bai se wngo – langma bo sak bo ,smai hano man mani,kwplai wng nani kena borok ni iak ni,hamcha nani, tongthok nani, kok khwnai tong khe omorok wng baio. O bijab bo chwng phwrwngma nugo, kerong slajagwi mania.”Nwng khlai di’(Thou shalt) Nwng ta khlai di” (Thou shalt not).A kokthai no haino hai saphlai tongma chwng nugo- Kok khwnai tong khe hamari man nai, - kok khwnaia wng khe swraimung manai.Uainwi sama bijab wng kha bui kok samano khwnwi tai Moses ni rwchabmungrok tai bo paithak  jora bini borok Jihudi rokno kok kwcharlang mano thumwi swijago. O kok kaham no sana bo bacha makhe, swngchro tonglangma bai chuknoha tongwi nani kok no swkagwi samani kokrok se. Bo bisi kolok romwi nasing tong mani a wng phainarok no nukna muchungjak mani.Bo bini uansugwi naisik mano slai kha, phainai salo bini borokrok manjagwina tong mano, tamo ni hwn ba bini jora phai kha swngchar iakarwi thang nani.

O bijab wng kha belai khe khwnathothok khe phwrwngwi kwlang mani kok, Jihudi dopha haching panther o himgrung ma tong mani laibumani kokrok tai paithak ni berem hwn khe Moses bo bini sak ni kokno swi mani. Moses kaham khe nai swi kha Lamrwma bijab bai Lekhamung bijab bo sabuma ni kok no aro khurasui swikha. Chwng Uainwi samao man nai omo wng kha chuknoha ni kok no se sao swngchar ni kok wngia.Uainwi saphima 1 berem bai Lekhamung 13;14 berem no sui nai di.

Uainwi saphima bijab wng kha muitu khlai phima bijab.Uainwi saphiam bijab wng kha tai kaisa iakchu kerong.Omo hwn ma khe a kerong no haino hai saphima ni.Kaitor bohrok ni bagwi tamo khlai kha a kok no Moses saphima ni wngia, tamo khe bohrok smaihao thangwi sogwi khe  bahai khe Jehovah Kaitor no suamung nai abono se muitu khlai rwo.Bo omorok no sana nailia, Ochai rok Lebisong tai borokrok tamo khlai na nang a kokrok no.

O bijab no Moses swimani paithak ni bijab, bijab kangba ni bisingo. Nwng khwna, khwna bijabrok no PENTATEUCH hwn mani.Abo Bijab kangba hwn mani se.

Yaphang bijab sao chongjak dopha Isreal ni kokrok no. Lamrwma bijab khe sao, borok thumjagwi dopha wngwi torma ni kokrok no.Tai Kerong iapharjak mano.Lekhamung bijab khe sao Haching panthoro ma himgrung lai mani kokno.Uainwni saphima bijab khe sao, paithago smaiha Canaan hao bachai mani kok akonrok no.

Uainwi saphima bijab talnwio wng mani kokno simi se sao, tai thamchi sal Moses bwkha khamjak mani kok akonrok.Moses, Jihudi dophano kok kwchar khwna salsini salo tai Jordan twima par wngia sini talsa swkang (Uainwi 1:1-3).

Moses wng kha a bijabrok no thumwi ton naise, Bo a Pentatateuch no swinai wngia.Berem nwino nai di bijab kangbao uaibara swk (500) sajak kha, Bugra sao….Kaitor sao ….. hwn mani.Chuknohani Baibel swinaisa ni kok(2 Pitor 1:21).

BUGRA JEHOVAH NI KHAJA NI BIJAB

Khristan ni bwkha ni hama tungphlai phaio Uainwi saphima bijab no khuktangwi nai khe.Tamo ni hwn a bijab no chini Bugra belai khe no chajago. Bo belokjak phuru soitan no oro ni kokthai no khursai sakha.Oroni kokthairok wng kha daseng,abo bai no beloknai no mecheno:Mathai 4: 1-11; Luk 4: 1-13; tai Uainwi 8:3;6:16; 6:13; taibo 10:20. O bijab Uainwi saphima Jehovah ni bijab kok khwnai tong nairok ni,Moses bini borokrok no sai kwlang mani.Omo ni bising twi Bugra ni hamari phai mani,Khristo bini sakbo abo baino kati o.

Nwng Uainwi saphima bijab no khutang khe nwng bo chajak nai,abo bwswk kwnathok khe swijak kha. Achuk kaisa bai khe khuktasng di o bijab no.

Jisu Khristo Uainwi saphima bijab ni kokno khursa phalai sao,Bo khursai samani kokthairok slaijagwi man ia. Bo Uainwi saphima bijab no sak twinani kaida bijab khe nao (Luk 4:4,8,12). Bo debil no koksakhlai sakha, belokjagwi tong phuru, o bijab bo swijak tong ma bai. Omo bini daseng omo bai no bo soitan no mechenwi rohor kha (Mathai 4:4,7,10 tai omo Uainwi.8:3;6:16;16:10-20).

O bijab uanwi saphima, Kaitor ni bijab kok khwnai tong nairok ni , Moses langma ni paithak jora bini borok rok salang mani.Mungsa juda khe hamari man mani, Khristo bo sak se omo bai  sak ma katio.

Tamo wngwi borokrok Baibelo kwrwi rokno twi, aroni kharwi thang, sakno buino logi rwi.Kaitor borokno phungwi rwo bohrok ni aswk chaia sitra bwkha no. Borokrok hwnjak na nai ia bohrok sumsok gwnang hwnwi.

Nwng swngcharo tongwi no chuknoha ni tongmung no sina muchung khe Uainwi saphima bijab no sai man na khlai di. Moses ni iapri no rwktharwi himdi, pia bwtwi iorjak hao sogwi nai.Nahar rwi himdi, (Canaan ha, dut bai pia bwtwi kochokjak hao tlang nai, Lamrwma 3:8).

“Mangsong,” uaisa borokrok khoroksa hai hwnwi sakha,”Ang je phuru chuknoha ni dugar gana sokphai khe, bohrok aphuru dugar kholobwi rwphano, ang hai hwnwi sanai, ang jora kaham man kha aswk jora phano sok phai kha.”

Nwng le jora kaham da man mani kwlai kha Chuknoha thang thani?

Phai di, chini Bugra Jisu Khristo ni Bupha Kaitor no chwng hambai rwlai anw. Tamo ni hwn khe Khristo bai chwng thansa wngma bising twi bo chuknohani tong kwrwi bebak no rwi chini kaham khlai kha (Epis 1:3).

MOSES PUILA KOK SAMANI -“UPHILWI NASIK HORMANI” (Uaninwi.1-4)

O Bijab no khuktang na philkhe no chwng aro nugo, Jihudi dopha Canaan ha ari gana sokphai laijak,tai sal chisa sal himlai kheno aro sogwi lai sinai. Bwrwichi sal swkang ni kok.Aro bohrok sogwi lai kha mun.Bohrok no tamo ler rwkha sogwina nani,sabo bohrok no kobonrwi tlang kha uklok kiphilwi phai phirwna ni! Chwng uaisa uisu omo hai khe no a jagano jaga mathang laio. Chwng belai khe Jihudi dophano hwn laio tamo wngwi bohrok aswk ma lerlai kha, chwng sak lerwi tong mano khe uansugwi se nai ia. Chwng bo, bohrok hai khe no poito kwrwi gwja. Chwng sak lachina nango, omo hai jora phai phuru, chini swrwngjak nai tong mano se, swrwng laio! Jehovah Kaitor wng kha phwrwngnai kwrwng. Bo chwng no thangdi hwnwi dagi glak chwng tiar wngwi jugali ia sak.

Poito kwrwi wng mani omo bwswk khe chaia hamia! Chwng jephuru Jehovah Kaitor no bwkha berasugwi rwkhe, Jehovah Kok narwgwi chwng no iachak nai.Bo samung kotor khlai mania wngwi tongo,Chwng bono poito khlaisukia wng mani bagwi (Mathai 13:58).

Kwbangma bisi ni swkang, Jehovah Kaitor, Abraham bai smai tanglai mani tongo.Bini bosong kotor gwnang wng nai.A smai hani gana bohrok tabuk bathak laijak (Yaphang 17:8). Tabuk bohrok a hao hablai nani tiar wng lai kha, aswk bisi kolok logwi nasing lai mani ha. Lekhamung bijab ni paithak berem o chwng nugo bohrok Jordan twima ni aiang naro bohrok baisai khlai tong lai mani. A  Jehovah ni hao thang laina bagwi nasing lai tong mani.

Uainwi saphimani bijabo kaisa kaitor Jihudi dopha no kok khai rwkha, a hao bawi na hwn khe bohrok mungsa samung ma khlai nai,a kokrok no chwng o bijabo nugo. A kok khama no chwng oro nukma khe hai se. a koko wng kha : “Kok makhwna nai .” Kaitor ni dagi mano.

Jihudi dopharok a smai hao, Canaan no hablai kha kok thaisa narwgwi,a kerong ni kok.

Uainwi saphima bijab khe abo kaisa kolok twrwk khe koiwi samani kok khwnalai tong nani, Kaitor naima khe bono hamjak nani tai kiri borom rwna ni. Hakhe O Isreal, Bugra norok ni Kaitor norokni thani tamo nai? Bugra nini Kaitor no kiri di, bini lamao himdi,tai bono hamjak di,tai norok ni bebak bwkha bai tai uansukma bai Bugra norok ni Bugra no mun di. (Uainwi. 10:12).

Pentateuch ni puila ni bijabo chwng nuk kha, Jehovah Kaitor Jihudi dopha no chong mani.Tabuk oro khe Jihudi dopha Kaitor no chongwi nathung omo Jehovah nai mani.

BOROKROK

Caleb bai Joshuah simi se tongrwk sio a bosong ni borok, Egypt ni ongkhorwi phai nairok ni bisingo.Tai bebak no thwi bai kha.Sikla chwlarok tabuk belai khe tekto manwi matong bai kha, haching pathoro.Ha segwi laina bagwi bwkha khep khep wnglaijak! Tamo khe Moses bohrok no kerong no twi taisa ma saphi kha. Bo saimano bini samung pai kha, Jehovah bo sakha, kubunrok se bini samung tangsinai. Canaan hao tlang sinai (Uainwi. 20:12).

Moses chakra rasuk kha, tabuk bini omor wng kha 120 bisi kakha. Thwina swkang bo bini borokrok no kok kwcharna cheng kha.Bo sak bohrok no laithang nai  bisi bwrwichi (40) twidulawi tubu mani bohrokno. Bo sakno bachai snam kha tai khorang swrai swrai khe sana cheng kha,aro hai hwnwi sajak kha, Thwi phuru Moses ni omor wng kha nokha bisi saranwichi;bo mokol nukia wnglang ia,tai bini phan bo holi lang ia (Uainwi. 34:7)

Mose bini Jihudi  bwsarok no laithang mani kokrok no muitu khlai sakha,bo bohrok ni laibumano sai khwna rwkha.Bahai khe haching panthoro mahimgurung lai kha.Bo bohrok no Jehovah hamari rwmani sai khwna rwkha,aboni bagwi bwkha bai Jehovah Kaitor no hambai rwbai di hwnwi sakha,tai kok khwnai tong di hwnwi sakha. Bo Jehovah Kaitor, bohrok no Bupha bwsano pusi twi khe pusi mano belai khe chajak kha tai hamjak kha.Wngia khe bohrok haching panthoro no komorwi thang bai khamun. Salni satung bai khamproi pai bai khamun.Bo bohrok ni nangmani chamung nwngmung rwi tongkha, bohrok mungsa bial wnglia.( Uainwi 2:7).

Bo bini hamjakma borokrok no khatharjagwi kok kwrwng khe kok sakha.Tai bohrok no Jehovah no suamungwi tong di hwnwi sakha tai Kaitor ni kok khwnai tong bai di hwnwi sakha. Bini a kokthairok tabuk ni jora phano iamorok iachagwi tongo kho.

Moses samung khlai bai kha, Bo bini langmani nokha bwrwichi no rwkha, Egypt hao seleng khati ma tong bai mani iak ni phiyogwi tubu kha.Kwbangma kirimasingcha wngmarok ni iakni bohrok no katirwi tubu kha.Bo bohrok no rwngswrwng rwkha,bahai khe government chalok na nang, bo phwrwng kha,kerong, tai tongthar bodol kaham khe snam kha tai dopha kotor khe iak bai snamwi rwkha.

Jihudi dophani thang nani thak na kasu kha. Jordan ni salkabai harungo tongwi naharwi nuhur kha a hano bohrok segwi nai mano.Abo bohrok ni wng kha tongthotok sachlang jora.Tamo khe Jordan twikotor bohrok ni kwcharo bachajak tai a kamiyung ni chokdewal belai khe no kuchuk kwrwk, abono thangwi mechen nani belai khe no kuthuk. Jihudi dopha wng kha skilarok collage pori tong nai sikla rok hai, bohrok ni langma ni samungo thang lai tong ma hai.

MOSES SWKANGNWI  KOK SAMANI – “SWKANG NAHARWI”

Uainwi saphima 12:1 aro chwng nugo o khotol ni kokbothoma no.Nini chuchusong ni Bugra Kaitor nini bagwi nono ha nananibagwi rwkha, a hao raidarokno tai dagimungrok no swngcharo kwthang tongsak saktharwi twi matong nai (Uaninwi.12:1). Jihudi dopha tabuk kwtal hao thang lai tongwi nai tai agini hai khe no loria khe ma tong nai tai sikwrwng khe Kaitor ni kok khwnai ma tong nai,bohrok no ha rwnai Jehovah Kaitor.Kaitor, Jihudi dophano hamjakmano phwrwng na muchungjago,abo se kerong no twi phlai tong mani kerong (Rum 13:8-10; Mathai 22:37-40)

Tabuk Moses kerong no kwlai sa khe bohrok no sana cheng kha,borok abo no twi tong  man na twi khe,Kaitor sakha”,Nwng ani borok,Ang nono hamjago,Ang se nono chongwi nao,ang norok ni logi tongo,Ang nono katirwi ton nai,Nwng ani kok khwnai tong di nini kaham ni bagwi.”Jehovah tai bo sakha, “Kwthar khe tong di tamo ni hwn ba ang kwthar.” Tamo ni hwn ba Kaitor ni borokrok wng kha bini borok.Bohrok swngcharo tong na wng thung Kaitor bohrokno chajak na twi khe.Hamia sitra ni kagwi tong na wng thung(Berem 14).  Bohrok ni logi ni borokrok no hamjakma bai chubai lai tong na wng thung (Berem 15).Bohrok pal khe kuthumlai Kaitor no khulum lai suri lai thung.(Berem 16).naidi Hibru 10:25.

Tabuk ni jora borokrok jaichalia gwja motha thangwi khulumwi surisan lai mano.Omo wng kha phola o sogwi thang mani.Jehovah Kaitor chwng no disiplin wngjak na muchungjago.(Uaninw. 17).

Uainwi 18 beremo Kaitor chwng no diari kotor ni kok sai khwna rwo,Bugra Jisu Khristo.Bo simi se ulo tamo wng phai nano sai mano.Tabuk ni o jorao borokrok kwbang ma ochai khama,mwtai hamia kok hamia sanai, diari karnai,tai khuri toknairok ni thani thang laio, Phola hamairok ni thani thango,nangia kok sanairok ni thani   thango.mwtai hamiarok ni thani mang thango uklok usluwi. Jehovah Kaitor tamo uansugwi tong tabuk ni a kwtal jora ni tomung no twiwi hai khe nwng saiman na muchung khe, hai khe Jisaia 8:19-20; Lebi 19:31;20:13  no khuktang di,tai  1 Samuel 28 berem ni a kok mwnak no naidi,tai bo nai di 1 Bosong 10:13.

Kaitor Jihudi dophano pnunuk na muchungjak mani hwn khe, bohrok ni jotoni slai samung kotor hwn khe, Hamjagwi Jehovah ni kok khwnai tong nani.Bohrok hambai ma rwnai Jehovah no hambai rwphlai ma tong nai. Bohrok Khatungwi tongthogwi ma tong nai. Tamo wngwi ha kaham tongwi bohrok khatungwi tongthogwi tongna nang ia wng nai, Bohrok Jehovah Kaitor bai tong twtwi? Kubui no bohrok khakchangwi khatung tong na nang nai tai Kaitor no kha bai khuk bai hamjakna nang nai.

Tamo khe Moses ni bwkha belai hilikjak tamo ni hwn ba bo sai mano Jihudi dopha ni bwkha le holong thai.Tai bohrok ni bwkha wng kha sak muchung twi tongna nainai (Uainwi.31:24-29). Tabuk ni chini bwsarok ni bisingo (Pol tamo hwnwi salang kha,2 Timothi 3:1-9) thwi nai,Uainwi, 21:18-21 samani bising twi?

Kok khwnaia bwsa,je borok  buma bupha ni kok nornai, omo wng kha Kaitor ni thani chaia samung khlai mani kwlaio.

Uainwi.21:22-23 no chwng khuktang khe, abo no Johon 19 :31 bai sui nai mano. Tamo wngwi Khristo kok hamia silchajak kha, Chuknoha bai swngchar ni kwcharo kroso khachijak kha. Galatia 3:10-13 no chwng nugo, Bo swraimung chakha tamo ni hwn ba chini sumsok ni bagwi.     (2 Korinth 5:21). Omo bahai khe Pol ni thani bo nangphai kha (2 Korinth 5:14-15).

MOSES  UAITHAM KOK SAMANI – “PHATARO NAHAR MANI” (Uaninwi saphima 27-33)

Mose lukurok no hus khlai kok samani, puila bo hamari man nani kokno sakha, Jihudi dopha khatunglai tongwi man nai bohrok Jehovah ni kok khwnai lai tong lai khe. Bo taibo sakha kok khwnalaia wng khe tamo tamo wngwi man.Bohrok ni bebagono talikha hamai wng nai, samung khlai mani mungsa bo chaglak. – bania khlai thani,khet khlai thani, tai bwsak mang bo hamglak, bemar bo kaglak.Jehovah Kaitor ni kok khwna ia wng khe dukhu kosto birman paiglak(Berem 28:15 aro ni paithak jora).

Uainwi saphima 28 berem wng kha kaisa belai khe naijak nai. Omo Jihudi dopha kok khwnai tong phuru man mani kokrok no sai khwna rwo (1-14) tai millennial jora nang phai nani kok akonrok. (naidi Jisaia 60-62; Zacharia 14:8-21; Jirimia  31:1-9; uainwi, 30:1-10;Rum11:25-31).

Bwtang 47-49 Roman hasekpha nai kokno sao, 70A.D. o Titus phai sekphaio,abo wng kha thwi kochoklai joba khlai lai mani.

Bwtang 63-67 Tabuk ni Jihudi dopha ni kok, Kaitor a kokno nokha bisi 3000 swkang no sai kwlang mani tongo. Berem 28  sao Jihudirok dopha kupurwi ma thang bai nai hwn mani kok no sao.”Pisa pirwng”(Bwtang 64).

1. Pisapirwng -  Bo swngchar ni iang paithak ni simi aiang paithak jora pisapirng ma wng nai.Tabuk ni jora Jihudirok joto hao no tongo,German jews, Russian Jews,Italian Jews, American Jews, akonrok2.Lelamung kwrwi – Tabuk tong mani harogo lelamung kwrwi (Bwtang 65).

3. Kirima chajak – Tabuk Jihudirok kirimachajak bwkha twi tongo, kirima kuplung bwkha.uansugwi naidi bohrok bahai khe swngcharo bui bai twijagwi tong kha(bwtang 65-67). Jehovah Kaitor bohrok no swkang no o kokrok sai kwlangjak.

Moses, Joshua no sai khwna rwkha bo bahai khe haching panthoro  khlai bukha akonrok no. Bo bo khoroksa ha naichomna thang nairok ni bisingo, Kaitor no poito chai tong nai. Bnini omor tabuk nokha bisi  80 ni borok tai Moises bono Ojama khlai chong kha Jihudi dopha no naikini khlai nani.Bini kokno khuktang di, Uainwi.31:7-8.

Moses tabuk samung iapharwi rwkha Jihudi dopha no Joshua ni thani.Abo kaisa belai samung kotor khlai tisakha.”Jehovah norok bai tongo bwkha rakdi, kha kotor khlai di” Kaitor chwng bai tong khe kirijak nai kok kwrwi.

Borok bura chakra rakjak,nokha bisi 120 kha kha.Kaitor ni khairok mani kok no sasong sana ni bacha kha. Jihudi dopharok ni bagwi rwchab mung rwchab kha (Uaninwi.32).Jihudi dopha Egypt ni iogwi pai mano twiwi, Moses muitu khai panda khai kha tai rwchabmung rwchab kha(Lamrwma 15). Tabuk bo bini langma ni samung mwthagwi tai kaisa samung cheng kha. Bo kangtham swimung no swi kha, Lobmung chukuchi (90) rwchabmung no. Khristan rok rwchabmung bai no matongo! Abo hai khe no chuknohao molbrum brum rwchabwi ma tongwi lai nai.

MOSES NO PHOB MANI

Rwchabaiwi, kok bai hamari rwbaiwi, Moses Nebo hathai kuchugo kalang kha, aro Jehovah bono smaiha Canaan no phunuk hor kha.Bo mwlang chai naharwi tong kha. A hathaio Moses thwi kha.Jehovah bini seleng Moses no a harungo phobkha.Aro no bono Jehovah khatung rwi lela rwkha. Samung tangnaisa no phobkha, tamo khe samung choiaui khlai tong kha.

Moses bo sak da, Uainwi saphima 34 berem no  swi kha, Phola kwthar bai phunukjagwi eba uloda Joshua abo no thepai swi. Moses hathai Pisga kalang kha smaiha no nuk kha, aro ni tai kiphil lia. Chwng sai mano bo aro no thwi mani.Bugra bini kwthwi mang no arono phob mani. kebo sai mania abo buro wng kha.Baksa borokrok sao, “Kaitor phobkha bini mangkhoro.”  Moses a desouali selengrok no dopha kotor snam kha, bohrok ni bagwi bo nokha sal thamchi jora kapkha. Bohrok kok erlai ia hwn khe tabuk phano bohrok bono man kha mun.

Nwng tamo uansuk Moses ni mangkhor no tamo wngwi hui ma ton kha? Omo haino wng khamun bohrok bini a mangkhor no khulum lai tong khamun.Abono twiw dormo snamlai kha mun. Moses ni kok no chwng haino hai Kothoma kahamo man phio kha. Salsa Jisu, Pitor, Jakob tai Johon no logi tlangwi Hermon hathaio kasarwi tlang kha, Palestine ni salsigra bwkhak.Moses bai Elijah phaiwi Jisu bai kok salai phai kha,Bo thwina nang mani kok no twi salai phai kha (Mathai 17:1-3).