PHUNUKJAKMA

 PHUNUKJAKMANI | Jisu chini kwplaisa Habugra

Phunukjakmani Bijab simi no Smai Kwtalo Diary Bijab.Omo simi no chuknoha ni bijab nok tai o bijab no khuktang nai tai khwna nai  rok hamari man nai . “hamari” wng kha oro kokkwrak khe sajak. Hamari bono man nai Phunukjakmani bijab  no khuktang nai.Tamo khe puila ni berem no khuktang khe, aro Motha rok ni kok no man nai tai paithak ni berem o khe chuknoha ni kok no swbai sajak, chwng kwbangma borok rok no o bijab no khutang na nai ya.

Phunukjakmani chwng no phunukna naio Khristo uanamasingcha khe habugra chamani kok. Kothoma Kaham bono Mwthangnaisa hwnwi sao.Sumsok no sago rujuna bagwi phai mani. Tamo khe  paithak ni bijabo khe bono lachimasing wng mani nukli ya. Hai phano Phunukjamani wng kha belai mari kotor kwthar Canon o. Phunukjakmani chwng no sai khwna rwo swngcharo Khristo habugra chamani kok, Soitan man na muchungjak mani.Bo tai bo sao Khristo samung paisugwi  Soitan no mechenwi kwplai wng mani kok.

Soitan no mechen mani kok sakhlai kha,tai bo satokjak mani .Puila hwn khe bisi saisa (1000) jora, ulo khe molbrum brum satokjak nai.Bo tai bo sao soitan ni paithak jora ni satokjak nano.Tai kubun bijab rok ni slai bo satokjak mani kok no sakuk kha. Soitan o bijab no  khuktangjak na muchungjak ya.

KOK BULWI SAJAK MANI

“Phunukjakmani ba  Kok huiwi sama ni da?” Kwbangma borok no omo hai khe uansugo, o bijab ni kok rok no salai phuru. Ahai wngya, omo wng kha abo ni ulta se - “phunugwi rwjak se. “ Omo mari phunugwi se swijago. “Omo rohorjak kha phunukna ni” Suarirok Johon no saphai o.Boba kok manya rok tai nathong khunju khwnaya rok suda mari phunuk mano buji mano.Yasi tail rw phunuk mani  suda mungsa  bisingo kok tongo..Abo hai no Phunukjakmani o mari rok bo.O bijabo 300 mari phunukjak tongo joto ni no mungsa ya mungsa  kok sajaknai  tongo. Marirok wng kha uanamasingcha kubui rok no phunugwi sao.

O bijab o sajak tong marok ulo se nang phai bai nai., O Bijab wng kha Jisu Khristo phunuk mani , Johon phunuk mani wngya.Omo Motha tormani kok rok no phunuk mani wngya. Tai twrwk twrwk  khe swngchar ni borok rok Jisu ni thani phai mani kok buya.tamo khe omo Jisu Khristo Phunukmani se ! Omo Jisu  Khristo sak baithang Johon rwmani.(Phunuk.1:1-2).  O bijab Bugra Khristo Jisu swngcharo tai uaisa kiphilna ni kok no sao.Omo uanamsingsingcha kotor nang phai nai. (Phunuk 3:20). Uanamasingcha ha swngchar wng phaina kok no kok swbai sajak tai abo ni kisa swkang chuknohao wng nai tai Bo phai mani ulo.

“Nang phaina kasukha” hwn mani tamo hwn mani (Phunuk.1:3) ? Bisi 2024 laithang kha o kok samani ulo, tamo khe abo tabuk bo  nang phainai hwnlai no tong kho.Jeswk phano jora nang thung Kaitor ni khairok mani sal no nasing laijak, chini Bugra Jisu Khristo phai nai.

Aro kisa borok uaphano uansukrok, bini gana phai ya rok  hwno “ Ang uanao bo bahai khe habugra chaphainai.” Tamo khe Khristo sao, Bo phainai. Bo chwng no sason khlai phai nai, habugra wngwi.( Phunuk. 1:6).

 “Bono yornai rok bo nuknai.” (bt 7). Abo hwn ma khe Jihudi bongso rok Khristo phai phuru bohrok jotono kha kiphil bai nai, tai mwthangjak bai nai. ( Rum 11:25-26).A jora kaisao no bono yornairok bo Khristo no nukbai nai.  Nwng bono yorda YORKHA.?

O uanamasingcha bijab ni kokbothoma wngkha Khristo.Bugra Jisu Khristo no kubui  phankwrak khe sao,bono khoroksa kwplai.Abo chinwidok jora twi sajak kha Jisu Khristo ni mungthong”Mera bwsa.”(Phunuk 5:6).Chwng aro tai bo nuk kha Motha phai nai salo tamo wng no tai bo bai swngchar ni halok.

 Omo sajak phlai mang tongo, Baibel kitingwi bini thwi kwchak yorjak.Tai bo sajak mang tongo, Baibel kitingwi Khristo tai uaisa swngcharo phai nai , rangchak buduk ni kok.Chwng mwthangjak kha tai bini thwi bai suchai kwthar snamajak kha , tiar wngwi tong nani Bo phai nai .

A ni simi Z 

Phunukjakmani wng kha kothoma paithak ni lama, omo Yaphang bijabo chengjak mani.Omo chengjak man khe Bijab cheng mani jora ni simi  (yaphang). Paiphai kha Phunukjakmani Bijabo.Yaphang bijabo chuknoha bai swngchar snamjak kha. Phunukjak mani Bijab o khe Chuknoha Kwtal bai Swngchar Kwtal no. Yaphang bijabo khe sal bai tal kama no nuk kha. Phunukjakmani bijabo khe a sal tal mungsa bo nang glak.Khristo se a chuknoha Kwtal ni pohor. Yaphang bijabo chwng nugo bwthai bwlwng, Phunukjakmani bijabo khe Kwthar Kamiyung.Yaphang bijabo khe puila kailai panda, Adam kaijak mani, Phunukjakmani bijabo khe  swkangnwi Adam Jisu Khristo Kaijak mani. Yaphang bijab o chwng nugo, Sumsok cheng mani, Phunukjakmani bijabo khe sumsok kwmasugwi thang mani.Abo ni bagwi chini ari Soitan ni mwkhang no chwng nuknai , mwkhang somjak tai satokjagwi tong mani, muktrwi kwlaijak. Bohrok sokomjakma no nuknai, Phunukjakmani bijabo mechenwi satokjak mani.

Tabuk ni jora swngchar belai no mwnakjak. Khoroksa ni phano kati tong nani lama kwrwi, phainai salo borok rok ni langmao.Tamo khe Johon chakra  wngjak Patmos twikwchar ni hao tonwijak phuru , aphuru bo swngchar mwnakjak no tong mani. Bo Khristo Jisu no twi sakhi rwi tongma bai satokjaknani nang kha Patmos twikwcha ni hao.(Phunuk. 1:9). Bo twi kwchar ni hao tong phuru, Bo aro holong ma  bokhok kha samung kwrak ma tang kha.Tamo khe sengkrak okra nukjak phai kha tai bono  kok kwrwk kok  saphai  kha , paithago chwngsacha wng kha.

Kaitor Bini Sajla ni bagwi kha kwrak khe chongwi ton mani tongo, Bo o swngchar no sason khlai nai. (Jisaia 9:6-7)

KAITOR NI PHAITHAK NI THWNGNOK

 Phunukjakmani bijab wng kha joto jorani ni thwngnok kotor.Jora kwrwngwi no uarai chak mani hamya.Tamo khe paithago belai chwngsacha naithok nai. Khristo sak baithang no phai nai.Swngchar ni borok kotor hwn khe chini Bugra bo sakbaithang no. Samung sitra tang nai hwn khe Soitan.O thwngnok ni thwng nairok hwn khe Motha khungsini rok. Bohrok ni tomung phunukjak kha Seal swkagwi khulokjak phuru, berem 6 bai 7 no. Sinimung rwjak kha khorokbwrwi korai kanai rok bai. Ulo tututu bai ringjaknai rok bohrok ni samung humung yakarwi phai bai nai.Tai chwng antikhrist no nuk kha. Swngchr no sason khlai tong nai, letapeta khe swngcharo kiting tong mani.(Phunuk, 13).Soitan obotar wngwi phai mani wng kha , swngchar no bini ha snam nani tai borok rok bai khulumjakna ni. Tamo khe Khristo bini a samung no mwthaksugwi rwkha. O phan gwnang hero, Bo bini logi kwbangma suari sengkrak rok no tubui phai kha.habugra rok ni Habugra, bugra rok ni Bugra.Bo swngchar ni bini ari rok no rwkhlai rohor bai kha, bohrok no mechenwi khibi bai kha ( Phunuk. 19).

A tekto man mani paibai kha hwn khe.a yabrwi malmata no sokomorwi khibi kha tai Soitan no yakung yak khai khibi kha, agini joto kwcham tong mani lai thang bai kha.Ulo chwng o kok no khwna kha ,Khajamung mang tongna ni.”Tabuk ang bebak no kwtal khlai nai.” ( Phunuk. 21:4-5). Yaphang bijabo dagimung kotor ni kothoma tong marok  o bijab o nang phai  bai kha. Joto kaham kothoma tong mani wng bai kha, tai paikha. “Aphuru ni simi bohrok khatunglai tong lai kha.”

NAIDI MUNGSINI O BIJABO

Mungsini Motha rok

Mungsini Seal rok

Mungsini Tututu rok

Mungsini  Mari rok

Mungsini paithak ni boknangma rok

Mungsini sokomomung rok

LAITHAMANI JORA -   NWNG NUKMANI MANWI ROK

Phunuk. 1:1-18.

Smai Kwtalo Jisu Khristo ni paithak ni mangpili phunukjak kha. Kwbangma riknai kwrwng rok rikna nai kha bini mangpili no. Tamo khe bohrok mangpili rigwi manli ya gwja.Oro se bini kubui mangpili phunukjak. (Phunuk.1:13-16).Bo kongsini rangchak thopna ni  kwcharo bachajak. Motha rok ni wngwi bachaijak.(bt .20). Thopna hwn makhe Motha rok wng kha  pohor ni homochang twinairok.”Norok wng kha o swngchar ni pohor.” Tabuk ni jora Motha khung bwswk  tongthok tong nani, hatihaba, tai rang khanani lama snam nai, Mwnak thaio pohor rwnani nai lai li ya !

Khristo “borok ni Sajla” hai. Omo emang mukthang ni bising twi swrai swrai khe sai man kha, Johon nukmani a borok wng kha , borok ni slai phano kaham tai juda.  Khristo no borok ni Sajla.Jotono uanamsingcha mari tai o bijab ni kokbothoma bujthumani,uansugwi bujthum nai, Khristo no  swngchar ni joto no bujthum nai hwnwi hwnjago

Kamchwlwi lolang chumjak - a lolang kamchwlwi wng kha borom rwjaknai mari.

Bwkhwnai ….khul  eba kothor hai kuphur - Bo wng kha kwcham jora ni borok.

       Mokol …… horjwlai hai jwlai jwlai  - gian gwnang;huijak manwi rok no pohoro tubui phunuknai.

      Bini yakung horo sogwi hujak pitor -  Pitol hwn khe bujthuma ni mari.

      Bini khorang twi bwdam bwdam kutuma hai - phan gwnang Kwplai.

      Yakrok - Khristo ni samung bini yago.

       Bukhuk - Bini khukbai bujthumjak nai.

       Sakduk - bini mwkhang  dipor jora ni sal hai kwchwng. (Phunuk. 1:12-18).

Johon ni emang mukthang abo tabuk ni jora ni kok wngya, tamo khe abo ulo se nang phai nai Khristo Jisu ni bwskango bujthumjak na bagwi bachai phuru. (Johon 5:27-29). Tabuk chwng manwi tongma khe Kaitor ni khairokma tai maya bai kuplwng tai nakarjakna bagwi tlangjak.Tabuk Khristo chongjak bujthumna bagwi. Chwng bo bai norjagwi phano mano chwng bwkhao chongwi nakhe. Phunukjakmani o  Johon Khristo no phunuk kha, bijthumani jorao. Khairokjakna ni jora lai thangnai, bujthum na ni bwskango bachai phuru.

   Jephuru Johon  nuk kha a chwngsacha salo , bo kwthwi hai khe bini yakung yaphango pwtapsa khe kwlai kha. O emang mukthang belai no kwchwng kwplai.(Phunuk. 1:17)Tamo khe Khristo bono  kok rwphirwi sakha, Bo  sakha, Bono a kwthang khoroksa  bo thwi thang phano.Bo molbrum brum ni bagwi thangsa phikha, tai kwthwi bai morkeni surani bini yago . Ulo khe bono bijabo  swi narwk bai di hwnwi dagikha.(Phunuk.1:19). Bethlehemo Khristo joto khlai lang bai mani  mangpili chini yago kwrwi tai paithago hathai Olive o khlai bai mani, tamo khe chini thani tongma khe bini chuknoha ni langma tai khorok ni motok, bo kuchugo kasamani.

Nwng uaisa phano Bugra no nukde nuk kha ? Jephuru Moses bini bwkhango bono nasik kha abo belai no kwchwng.Job sakno selengjak suk kha tai thapla phulwi bwkha kiphil kha.Jisaia sak no abul hwnwi sak sak sai man kha.Saul (Paul) hao kwlaiwi bono khulum kha mwthangnaisa hwnwi.Bugra no chwng mokol baithang nuk khe tamo jani wnglang no?

TABUK NI JORA - A MANWI ROK

Phunuk.1:20-3:22

   Puila ni beremnwi bai beremtham wng kha, Khristo ni hamjakma koktun Bini Motha rok no.O koktun rok joto no raida thansa khe swijak,Khristo  Suarirok no sakha Motha khungsini rok ni bagwi , o koktun bo swihor kha koktun. Jotoni thani no kok sakha,Lobmung, khoraimung, khatung rwmung tai smai tangmung ni kok.

Je Mothani kok sajak mani a Motha rok Johon ni jora joto no  tong baio. Bohrok no twiwi no tong mani. Bo wng kha barasa khe kok samani , Mothani laibumani kok rok no puila Century. :

EPIS - Puila Hamjak mani Motha, Apostolic Motha. (2:1-7)

SMYRNA  - Satokjakuk nai Motha - Diocletian ni simi Constantine

(2:8-11)

PERGAMOS -  Motha habugra bai chajak nai  - Constantine ni tola

(2: 12-17).

THYATIRA - Pope ni Motha - Mwnak jora (2:18-29).

SARDIS - Reformation Motha -  Protestantism, 16^{th -}  17^th  Centuary            

(3:1-6)

PHILADELPHIA - Missionary Motha Puritan Movment o yachak Sokma ni jora (3: 7-17)

LAODESIA - Motha Karjakma jora - Mothani paithak poito yakar

Laima ora. (3:14-19)

Mothani Paithak jora  Khristo no nwng bu Mothao naituk mano.”Khwna di,ang duglamo bachaui  dugar buo; ani  khorang khwna nai khoroksa swk  doglam phiogwi rwkhe  ang bini nogo habnai,  hakhe ang bo bai chanai ,  bo bo ang bai chanai.” (Phunuk. 3:20). Bo phataro bachajak, doglam bui tongo. Motha bono habna jora rwli ya.Bo khoroksa khoroksa no koisugwi tong kha. “Khoroksa swk borok …… Doglam phiogwi rwkhe, ang nogo habnai.” Nwng nini bwkha ni doglam no phiogwi da rwkha, Khristo hab phaina ni?

  Tho bini kok rok no khwnalai anw, o koktun o man twi khe.”Hai phano ang nono kok thaisa hwn na ni tonngo,Nwng swkango hamjakma hai  ano tabuk hamjak li ya. (Phunuk 2:4,14,20). Omo wng kha Bugra kotor chwng no rakdama khlai mani.

Bahai khe Khristo snamwi kwlang kha, o berem tangnwio abo no rutugwi tikhlai di. Muitu khlai di, O bijab wng kha Jisu Khgristo bai phunukjakmani. Nwng tamo tamo ni kwplai wng na nang, omo smai tangjak. Nwng oro naidi mungsini man da mano.

PHAINAI JORA - JE WNGNA TONGMANI ULO WNG PHAINAI

Phunuk. 4:1-22:21

      Soi phunukjakma kotor , tututu khorang bai phiogwi rwjak kha. Chuknohani dogolam phiokjak kha tai a khorang hai hwnwi sakha, “kasaui  phai di  hakhe  omo ni ulo  tamo wng no abo ang nono phunuk anw.” (Phunuk. 4:1-3).Puila no Kaitor ni achukthaiyung no nukgra  kha. Phunukjamani bijab wng kha “achukthaiyung bijab.” Omo wngkha wngmung kotor wng na tong mani , o bijab o khobjak bai kha.O achuk thayung o achukgwi bujthumnani.Khairokna ni achukthayung tai nuk glak kha. Aro wngmarok  dorbar khotol o wngmarok se nuksinai.Swngchar no bujthum nai achuthaio achukjak tai Khorok chinwibwrwi bodol kerong twinairok.Khorok chinwi khe Smai Kwcham ni Jihudi dophani okra rok tai Smai Kwtal ni khorokchinwi Sagrirok.(Phunuk. 4:4).Kaitor ni Pholasini rok (Phunuk. 4:5;5:6) wng kha dorbar twidulnai, tai kwthang takjaknai rok khorokbwrwi wng kha dorbar naikolnairok Bujthumnaisa ni kok twi samung khlai nai.

   Tai mungsa nangkuk mani wng kha Mera bwsa bo sakbaithang Seal bijab.(Phunuk 5:1).Sabo a bijab no phiogwi man nai tong? Khoroksa bo kwrwi, mwthangjak bo simi se. “Bo kwplai wngjak a bijab no phiyokna ni.”  Khristo haching panthoro kwplai wng kha,salbwrwichini  salo.Bo Gethsemane o bo kwplai wng kha. Kalberi hathaio bo kwplai wngjak, Bo bini khorok bera kha hama nani phan kwrwi kha, aphuru bo hwn kha, “tabuk le paisuk kha.” Saltham ni salo bo kwthwi ni thangwi bacha kha., kwthwi no mechen kha tai sumsok , morke tai soitan no bo mechen kha. A borok Khristo tabuk swngchar ni hano segwi nakha, kwplai wngwi nakha.

     Kaisini seal phiokjak kheno satokmung kotor  chengjak sinai. (Phunuk 6). A Jora no satokmung kotor ni jora hwnjago.A kok diary Jirimia salango, Je\irimia 30.Israelrok satokjagwi dukhu manma haino man bai nai.Khristo bo a satokjama kotor ni kok no salango,o swngchar kotor o omo hai uaisa phano nang phaiya kho. (Mathai 24:21).Satokma kotor ni jora  Kaitor sumsok no bini samung khlai rwnai, ulo bini bwthai kirimasingcha no bo man nai. Kaitor bini yak no borok tai malmata rok ni sakani tisai tlang nai. Swngcharo hamya chaya , choba nanglainai, machaya manwngya wngnai, chacharara nang nai, kwsa komo paiya wngnai.Kaitor ni Sajlano poito khlai  yarok buj kotor thumjak bai nai.Tai lachima singcha khlaijak bai nai. Chwng khristian rok Jisu no simi nasigwi tong di. A wngmarok no twi ta uanadi, tamo ni hwn khe  mwthangnaisa sakbaithang chwng no naphai na phai nai , a sal ni chwng no phiyok nai.

KORAI KANAI KHOROKBWRWI ROK

Beremdok o chwng nugo,mungkotor “korai kanai khorokbwrwi” rok no. (Phunuk 6:1-8).A seal swbaijak khe no kasujak mani mwthakjak kha. A hamya ni phan kasujak kha. Jephuru a seal sichigwi khibijak khe no,choba o bwtharlai mani chengna naikha.Borok rok maichwlwi sar mani tabuk ma rakha. Bwkha yokmani tai kirimasingcha khe ma tong mani  jora manjak mani wng kha abo borok rok sak hamna simi nai mani , naslelai mani tai hamya sitra khe tong mani bwthai.

 Puila chwng nukmani korai kuphur tongthar tongwi sakhi rwmani , paithak  hamya manjak na tong mani swngcharo man kha. Ulo khe korai kwchak phai kha, swngchar gwnangwi choba ebrum kha.Khakchangma swngchar ni rosai tlangjak kha.Korai kosom chacharara machaya manwngya bai kuplwng, swngcharo choba nanglai tong mani bagwi. Paithago khe korai kormolele boknangwi thwi bai kha khairokma kwrwi kha maya khlai nai bo kwrwi kha.

  Seal dok (Phunuk. 6:12-17). dopha rogo kereng kurang wng bai kha,dopha rok kurugwi thang kha. Sak hamchana simi nailai sio.Chuknoha ni budul khengjak kha mwnagwi phai bai suk kha, twikwchar ni ha jangrijak bai kha, abo hai khe joto phunukjak bai kha. Ulo kirimasingcha khe swngcharo surisan ma panda chengjak kha, habugrarok, ochairok, gwnang kwrwisa rok, Kaitor ni aroni kharlai thang bai kha, thwina se sanlai sio, Bini sal kotor thamchi ni sal phai sokkha.

Kisa jora ni bagwi siring siring wng kha (Phunuk.7). Satokmung kotor jora mwthangjak nai rok tubujak kha.Borok kwbangma bohrok ni sumsok suchajak bai kha, Mera bwsa ni thwi bai suchajak kha, kuphur kwthar khlaijak bai  kha. A seal wngkha  Israel borok rok - Kaitor bini borok rok no thum na ni cheng kha , bini thani tubu bai kha. (Hosia 1:9-10).Kwbangma dopharok ni  borok rok  phai bai nai . Satokmung kotor ni jora Kothoma Kaham pirjak mani belai no nangkuk kha, bwkha kiphilwi phai bai kha.

TOTORO KONGSINI

Chuknohao soti thamchi siringcha ! Rwchapmung lobmung mwthakjak ! Seraphim bai cherubim bohrok ni kangkhung kholopjak! Bebak no siring siring ! Chuknohani bebak no nasinglaijak hamarohorna suda jora kwrwi,nasinglai mani.Nobar kotor phano singingsa. (Phunuk. 8).Swngchar swbai sukurubjak bai kha Choba , chacharara,tai boknangjak bai mani. Tabuk Bo swngchar no  bujthum na jora sok phai kha, Soitan sai man kha tai bisi jora kwrwi kha, thamchi tungjak suk kha.Chwng nuk kha mwtai hamya rok ni samung bahai khe khlaijak kha.200,000,000 swngchar gwnagwi berai laijak. Morkeo thangwi kwlai bai nai ! Bohrok ni sago sumsok mang kuplwng. Bohrok langmao thwina simi no bari.(Phunuk 9: 1-21). Omo hai khe no Soitan ni pathak jora swngcharo khlai mang tongkha.

Paithago chwng Soitan no nuk kha, sak no Antikhrist obotar wng mani.

Bini a kok no salang kha Phunukjakmani 13 beremo.(Daniel 12:11; Mathai 24:15; 2 Thesaloniki 2:3 rok no  khuktang di.) Antikhrist swngcharo sason khlai nai. Bo sak no khulumjakna muchungjago, Khristo no khulumya karwi. Bo swngchar ni political ojamna wngwi bacha nai.Bo swngchar ni joto ni slai hamya chaya borok wng nai. Bo wng kha kwrwng kuk sinai nuknai wngwi bacha nai borok rok ni bisingo tai borok rok ni ojama. Antikhrist wng kha  Caesar, Alexander, Nerio  tai Hitler  bohrok jotono kaisa se. Borok rok phailwi bo manya  paiwi bo manya , bohrok ni thani bini mari kwrwi hwn khe. Tabuk ni swngchar wng kha kwthalai poito khlai lai tong mani jora. Laithang nai bisi rogo omo hai khe kwthalai mani tai poito chalai tong mani nuktha ya. Malmata ni mari (Mark of the beast) manwi bugra ni kwtal chang chang mari eba  kwthalai tong lai mani mari.Omo ni nombor wng kha 666, “omo borok ni nombor.” 6 nombor wng kha hamya ni nombor.O 6 uaitham sajak kha  hamyarok no kwthamwi khoroksa.

Antikhrist ni paithak sokomojaknai ni thai wng kha  Gwndwk Horo , Khristo Jisu phai phuru .(Phunuk.19:20). Aro boknang bai nai Egypto wngma hai khe, thwi bai nai , watwi kothor phai nai , hor bai khampronai,  kukthora  rohorjak nai ,  swngchar mwnagwi thang nai, chacharara nang nai, sak ni kwsa hamgwlak,  bangla kotor phai nai, choba nanglai nai tai borok rok thwi bai nai. Omo hai birman man mani wng kha Kaitor thami kajak mani, Khristo no saknangya poito khlai ya wng mani bagwi.

RANGCHAK NI KHURI THAISINI

Soitan bini phan tongsak phan rwui samung khlai nai bo manna muchungwi samung khlai tong mano. A khuri wng kha Kaitor ni phan rohor mani Soitan arini bagwi. A khurirok wng kha Kaitor ni phan mwtai hamya soitan no sai phunuk mani.A “khuri” lukhlai mani wng kha Soitan yago romwi tong mano swkwmasugwi rwmani.Soitan  bwkha kotor khe Kaitor bai bataina chukya.Soitan totra sebwi tonjak kha. Bini hayaphang ma kwlwi kha. Bo mungsa khlai na chukli ya. O choba Armageddon choba khola o paikha.( Phunuk. 16:13-16). O choba ni kok no  berem 19 no kok swbai sajak tongo.  Paithak jora ni choba o, Khristo ojama segwi nakha, bini sengkrak bodol rok  bohrok ni bodol no sokomosugwi khibi bai kha.

SOKOMOJAK MANI.

A khuri thaisini bohrok sokomojakna ni kok no sakhlai kha. Abo ni ulo  omo hai wng kha, tongkaham khe tong lai mani, kwmasugwi thang kha.A hamya sitra ni kok no Kaitor phunugwi sa phano. Hai phano se borok rok Kaitor no hamya hwnlai tongo, bwkha kiphil lai ya. (Phunuk. 16:9,11). Tabuk kwcharo borok rok  phutani tomung tikhlai tubulai kha,borok rok kha phurwi manli ya gwja, Kaitor bai chalwi tong lai kha.Nasle lai khe choba khlaina chengo, tai bo kwbang khe hamya sitra khlaio. Kaitor uaisini satokna ni kok sakhlai kha.(Phunuk.17-20) Puila  tomung chamung kotor  swbaijak nai.- Motha (Ecclesiastical) (Phunuk. 17) Bania khlai mani (Phunuk. 18) Political (Phunuk 19 :11-19). Malmata tai patra diari rok(19:20-21).abo ni ulo khe Dopha rok no (20:7-9). tai  mwtai hamya Soitan (Phunuk 20:10). Paithago, mechenwi sokomojak mani kok sakhlajak kha. (Phunuk.20:11-15).

MERA BWSA NI SOIDOM NI SAMUNG

 Hallelujah Chorus sakhlai tongo, jora kolok romwi naising tong lai mani, a Habugra chini Bugra Jisu Khristo  phaina hwn mano sakhlaio. David ni achukthaiyung o achuk phai nai, Bini kwina kwtal bai malai nani.

(1 Thesaloniki 4:17). Morke swngchar ni komorwi thang thung.Soitan tai bini bodol  belai khe hamya sitra khlai suk kha, paithago Khristo bohrok no kasle rohor kha. Soichajak borok rok kha logwi nasinglai tong mani a dangsai no,tabuk achukna jora sok phai kha a achukthaiyungo.Mera bwsa ni kailai panda cheng sinai. (Phunuk 19:7). Kailai bari ni hor ni chamung panda hwn khe  o ha swngcharo .Borok kubui kwthar rok sokat yapharjak bai nai.Bohrok ni samung khlai mani bising twi. A jora nwng kha khatung khaja ni jora, Jisu swngchao bini kwina kwtal bai  phai yasak wng nai. Aphuru bo bini ha snam phai nai, Bisi saisa jora (Millennial Kingdom) .

Armadeddon ni choba pai mani ulo  (Phunuk. 19:17-19) Khristo bini ari rok no mechensugwi khibi bai nai.Antikhrist no kwthang horo khitarwi rwjak kha .(Phunuk. 19: 20). A phatra diarirok no romwi horni kundolo khitarwi rwi bai kha. Abo ni bumung hwn khe Gehena, aro satokjak mang tong nai tai paiphlai lang ya. Tai aro sogwi nai rok tai kiphilwi bo man ya, Khristo Soitan ni joto  muchungwio khlai tong mani komorwsugwi painai.

MILLENNIUM (BISI SASAI)

O jora no  Khristo Khakchang ni Bugra wng nai,Bo bini ha snam phai nai ha sakao,bisi sasai (1000). Soitan bisi sasai khaui chobwi tonjak nai. (Phunuk.20: 3). Khristo bai baksa borok kaham rok swngcharo sason khlai nai bo bai baksa. (Phunuk. 20:4,6). Borok hamya thwi nai rok bacha glak sasai bisi lai yasak. (Phunuk 20: 5).

 Sasai bisi jora swngcharo khakchangma kuplwng tong nai. Swngcharo tongthok chathok bai kuplwng wng nai. “Twijwlango twi kuplwng wng twi  swngcharo Bugra ni chwngsacha siyan bai kuplwng wng nai.”(Habakuk 2:14). Aphuru uanamasingcha sal tongthok mung bai khakchang mung  mang tong nai tai tongnani tongtho thok wng nai.Ualaimung tong glak, busu bwlwng tong glak, mwsa geguma borok uathar nai tong glak,text bo rwna nang glak, thwina bo kirina nang glak, kaplai koklai bo tong glak! A jora paina jora sok phai khe , soitan no kisa jora ni bagwi phiyogwi rwjak phinai. Bo haino hai dopha rok no belok phi nai.( Phunuk 20: 7-9). Chwng aphuru bohrok ni tomung no kaham khe sai man nai, bohrok Soitan no se chajak baio, Khriosto ni slai. Chwng omo rok no poito khlai man glak,  “Nokha bisi sasai  lai khe Soitan chobwi tonjak mani  phioyokjak nai.  Hakhe bo swngchar gwnangwi tong nai dopha rok no  lama koro rwna bagwi  ongkhorwi thang nai,  abo wng kha Gog bai Magog Soitan  bohrok bebak no choba  ni bagwi  kwrwngsao thumnai ,  bohrok twijwlang rukung ni haching swk  bang anw.” (Phunuk.20:7-9)

Soitan wng kha choba phwnang nai bo wng kha choba ni bokhorok. Sasai bisi khakchanma ni ulo  Soitan borok no thum bai kha Choba khlaina bagwi, Kisa borok rok wngya, thike bai man ya aswk borok kwbangma , twijwlang ni hachingsa swk bango. Kaitor ni aroni hor ongkhorwi phai kha , chuknoha saka ni, jotono khamporwi thang bai kha. (Phunuk. 20:19).Borok rok Kaitor ni kok khwnali ya gwja, a kok no uansugwi phano manya, “Bwkha wng kha bebak ni slai bandinai abo hamya kuk , bono sabo saui man nai.” (Jirimia 17:9) ?

SOITAN SOKOMOJAK MAI

Soitan no borok rok heleng khe nugo,Bo phan gwnang phano ! Bo wngkha swngchar ni borok rok no thokai nai. Bo chuknohani dagarwi khiklai rohorjak nai. Kaitor ni  yakchu wngwi tong phano.Tola kuthugo khiklaijak kha - Gwndwk ni horo.Khristo abo no molbrum brum ni thwi phlai ya  horni kundol hwno.Omo mwtai hamya soitan ni bagwi se snamjago. Tai bini logi ni suari hamya rok ni bagwi. (Mathai 25:41). Soitan thwiyasak ni alongo chobja kha  (Phunuk 20:10).

Kuphur kwchwng achukthaiyung snamjak kha paithak ni bujthumna bagwi.Uaisa achukma bai no joto borok rok no bujthumwi painai.  Phunukjakmani 20:11-15 no khuktang di. Thwi thang nairok bini bwskango tubujak bai kha. Twijwlang bini kwthwirok no rwi rohor kha. Mangkhor rok bo bini kwthwi no rohor kha. Patal bo bini kwthwirok no rohor kha. Thwinairok bujthumjak bai kha  bohrok ni samung khlai lang mani bising twi. (Phunuk. 20:12-13). Paithak ni Sokomojak na ni kok sakhlaijak kha.Tabuk chini  mwthangnaisa se bujthumanai wng kha. “Langma bijab bo bumung kwrwi rok bohrok horni kundolo khiklai rohorjak kha.” (Phunuk. 20 :15) Chwngsacha jora phai ya sini swkang no bujthumjak bai nai.Tai lamsokna nang nai baksa bono morke hwno,swngchar belai no chaya khlai kha, swngchar ni simalwng kotor phola kwthwirok ni tongthai.

MUNGSINI KWTAL MANWI

       Chuknoha kwtal bai Ha kwtal ……………………21:1

       Kwtal Borok …………………………………………21:2-8

 Kwina Kwtal …………………………………………21:9

 Nok Kwtal ……………………………………………21:10-12

   Nokthar Kwtal ………………………………………21:22

 Kwtal Pohor ………………………………………….21:23-27

 Paradaise Kwtal ……………………………………..22:1-5

ABO NI ULO TONGTHOK MANG TONG NAI

 Au! Kaitor ni kothoma paikha.(tai ulo bohrok khatungwi tongthok khe mang tong nai.”Kaitor kwplai no kok no khuktang di, Phunukjamnai 21 bai 22 no. Soitan kwplai wngwi man li ya,borok bai Kaitor no swkakna ni. Sumsok khlai rwi swkak na ni. Yaphang ni simi  Eden thai bwlwngo puila borok Adam tai bwrwi  Evi bai malai lai tong mani.  Bo chensuk kha, tabuk chwng Khristo jisu bai molbrum brum tong sinai!

Abo no kok swbakna tai naidi tai kok ta bang di. Hai wngyaui a kok rok no diaiwi tong di. Omo wng kha chuknoha ! Bini chwngsacha no swbai sana ni chini khugo kokthai kwrwi ! Kaitor bini borok rok bai se tongo. Joto  samung no uansugwi khlaijago tai bebak kok rwi smai tang mani hai no khlaijagwi tongo. Chuknoha le aro chwng manjagwi tong mani slai belai no juda kuk.  Aro ni bebak no naitho thok ! Tongtho thok! Phunukjakmani bijabo Khristo ni  paithak ni kok wng kha, “Kubui no ang dakti no phai nai.” (Phunuk. 22:20) Chwng tamo se hwn nai bono,  “Bugra Jisu nwng phai di.” (Phunuk. 22:20).